尹琊's 传说之主的夫人{The Legendary Master's Wife}

Chapter - 373 (ဖုန်းချီယွင်ပြန်ပေးဆွဲခံရခြင်း၊ ဖုန္းခ်ီယြင္ျပန္ေပးဆြဲခံရျခင္း)

[Unicode]💕

ယွီဝမ့်နန်လည်း သိပ်အ​ခြေအနေမဟန်လှပေ။ သူစစ်တလင်း၏တခြားနေရာဘက်သို့ ခပ်မြန်မြန်လှည့်ကြည့်လိုက်သော် မီးလျှံချီလင်မှ လူသုံးယောက်ကိုမျိုချပြီးမှန်းသိလိုက်ရပြီး နောက်ထပ်မျိုချခံလိုက်ရသည့်နှစ်ယောက်ကား ချန်ချင်းအာနှင့်ဖေးရှဲ့တို့ဖြစ်သည်။

ပြောရမည်ဆိုလျှင် တကယ်တမ်းဖေးရှဲ့သည် နတ်မိမယ်ဖူးရုန်ထက်အနည်းငယ်မျှ စွမ်းအားပိုကြီး၏။ သို့သော်လည်းသေရေးရှင်ရေးအခြေအနေတွင် နတ်မိမယ်ဖူးရုန်သည် ဖေးရှဲ့အားအကောက်ကြံလိုက်သည့်အတွက် ဖေးရှဲ့တစ်ယောက် ချီလင်၏အငမ်းမရမျိုချခြင်းခံရဖို့ ဖြစ်သွားတော့သည်။

စွမ်းအားရှင်သုံးဦးအားမျိုချပြီးသည့်နောက်တွင်မူ မီးလျှံချီလင်၏အရှိန်အဟုန်ကြီးမားကာ စွမ်းအားကြွယ်လွန်းလှသည့်ဖြစ်တည်မှုသည် နဂိုပုံစံနှင့်တော့ယှဥ်၍မရနိုင်တော့ပေ။ သူ၏စွမ်းအားမှာ သိသိသာသာကိုမှယုတ်လျော့သွားပြီဲဖြစ်ပြီး အရှိန်အဝါကလည်းအနည်းငယ်မျှလျော့ပါးသွားပုံပေါ်သည်။ မီးလျှံချီလင်သည်သူစားပစ်လိုက်သော လူသုံးယောက်၏ကျင့်ကြံအားကို ချေဖျက်နေရသည့်အတွက် ၎င်းအားပြုလုပ်ရန် အတော်လေးစွမ်းရည်သုံးစွဲရမည်ပင်။ မည်သို့ပင်ဆိုစေကာမူ မီးလျှံချီလင်သည် အားလျော့သွားသည့်ပုံစံနှင့်တောင် ထူးကဲလွန်းသည့်ခြိမ်းခြောက်နိုင်စွမ်းကို ပေးစွမ်းနေသေး၏။

ယွီဝမ့်နန်က စိတ်တွက်တွက်ကြည့်လိုက်သည်။ ပုံစံကြည့်ရသလောက် သူတို့ဤတာဝန်အား ပြီးမြောက်အောင်ထမ်းဆောင်နိုင်တော့မည်မဟုတ်။

ထိုလင်းရှောင်သည် ဒေါသပုန်ထနေပြီး ရေဆုံးမြေဆုံးတိုက်ခိုက်တော့မည်ကို သိလိုက်ရသည့်အတွက် ယွီဝမ့်နန်လည်း မကြုံစဖူးပထမဆုံးအနေနှင့် နောက်ပြန်ဆုတ်ဖို့အတွေးအား စဥ်းစားကြည့်ရတော့သည်။ သည့်အပြင်ထိုလူ၏နောက်ခံအင်အားကိုလည်း သူလေ့လာစုံစမ်းကြည့်ဖို့လိုနေသေးသည်။ အကယ်၍သူသာ ချီလင်နှင့်တကွ ရှေးဟောင်းဇာမဏီမိစ္ဆာမျိုးနွယ်တို့နှင့် ပတ်သတ်ခဲ့မိပါလျှင် သူ့အနေနှင့်မျိုးနွယ်စုရတနာကိုရယူမည့်ကိစ္စမှာ ပိုပြီးခက်ခဲသွားပေလိမ့်မည်။