Window 💞🏡(مـكتمـلة)

الحلقه السادسه💞

رواية Window 💞🏡

للكاتبة :sαℓeмα🔏

٭٭٭٭٭٭٭٭٭٭٭٭٭٭٭٭٭٭٭٭
بعد اسبوع وثلاثة ايام 📅
الساعه 3:08م
العيله كلهم ملتمين لوطه وايراجوا في عبدو
هاجر تستنا ف الكوجينه وفرحانه ومعاها لجين
لجين : اففففف كنه طول
هاجر بخوف : مش عارفه ان شاء الله خير
احمد خش :جعااااان
هاجر : تي اسكت وانته ديما فاتح فمك وتقلد في صوتها جعاااااان نعساااان 😂
لجين : صوت عبدو جا وطلعت تجري
لحقها احمد هاجر مشت وراهم وكان تلقي حتي هيا تجري لاكن مش قادره من كراعها 🙅🏽
بعد الغداء
كلهم امقعمزين ف الصاله عبدو امقعمز امقابل هاجر ويبحتوا في بعضهم
خيريه فطنتلهم قالت : عبدو النت غادي كويس ولا اتجي هنا وشيرتله ع مكان جنب هاجر
هاجر تخزرطت وبرمت دروحها تحكي مع لجين
عبدو يستعبط ودار روحه مافهمش : شن دخل النت ياجدتي 😅
خيريه : نسأل بس😼
هاجر بحتت في امها : ماما انا اليوم بنبات هنا
مريم : لا لا عليش دايريلك سرير كان يوم يومين وتباتي لوطه
نجاة : خليها
خيريه : خلاص والله الليله هذي مانك بايته الا هن
هاجر تبحت في مريم وترقصلها في جواجبها
٭٭٭٭٭٭٭٭٭٭٭٭٭٭٭٭٭٭٭٭
الساعه 2:53ص
هاجر تأكدت انه خيريه ونجاة رقدن مشت للدار الاخره ورنت ع عبدو
عبدو : شن صار
هاجر : رقدن
عبدو: تمام شويه ونجي
قعمزت هاجر في الدار بروحها وولعت التلفزيون
شويه وخش عبدو
هاجر : اهلاً اهلاً كنك طولت
عبدو ضحك : كيف تحسبيلي ف الوقت
هاجر : اكيده
عبدو انطرح في جنبها وحط راسه ع كرعيها
هاجر خافت: ووووواو علي التهور امتاعك😩😂
عبدو ابتسم  ورفع راسه بحت فيها: اندور ف النت ع قولت جدتي 😂😂
هاجر ضحكت
عبدو مسك يدها وباسها في كفها: محتاج جرعة حنان 💕🙈
هاجر تبحت فيه وساكته وقلبها بيطلع من صدرها💓
عبدو يبحت فيها وسارح
هاجر خذت نفس وحطت يدها في شعره : رايح متغير
عبدو: كيف يعني
هاجر تمشي في يدها في شعره : مش عارفه رايح ناقص و شعرك طول
عبدو رفع راسه وبحت فيها: متغير سمح ولا شين
هاجر ضحكت: لا انت عندي ديما سمح مهما تغيرت 💕🙉
عبدو بحت فيها : يانا عليا نا 😍
هاجر تحشمت : ببببطل😳
عبدو ضحك :باهي خلاص
وسمعوا صوت حد نازل عبدو صبا قعمز وهاجر قعدت من الخوف اتصبي وتقعمز معش عرفت وين تعدي 😰😵
وخش عليهم احمد
عبدو: يلعن وسكت
هاجر :ووووه عليه قريب ركبتلي السكر😖
احمد ضحك: شن اديروا
هاجر تحشمت منه وسكتت
عبدو: انته شن نزلك
احمد يضحك: اندور ف خبزه وقعمز باهي احكولي شن اديرو
عبدو : شن بنديروا يعني وطلق فيه المخده درق وجهك ياجرو
احمد طلع وهوا يضحك خش للكوجينه وبعدها ركب
هاجر خبطت ع خدودها: حي علينه فطنلنه😳
عبدو : مادويش تو نزره يسكت ع المهم وين كنه نحنه
هاجر هزت كتوفها بعدم درايه
عبدو خذا نفس : هاجر اتحبيني💞
هاجر ابتسمت ابتسامه بسيطه ووجها انحمر وهزت راسها بمعني اهاا
عبدو ابتسم : باهي قوليها
هاجر هزت راسها بمعني لا
عبدو : انبكشتي 😅
هاجر تغير في الموضوع : وووه الجو بدا يصقع 😺
عبدو قرب منها : تعالي اندفيك😍😋
هاجر ضحكت ع جنب: ماشاء الله تستغل ف جميع الفرص
عبدو ضحك وصبا : مافيش فايده منك .....شي جفاااف 😂
هاجر رفعت حواجبها : صحراء ......تتبي تركب ؟
عبدو هز راسه : جدتي قريب اتنوض تاخذ دواها ،شن انقوللها بعد تلقاني
هاجر : قوللها مافيش نت ف حوشنه😂😂
عبدو ضحك : شويه ونرن عليك وركب
هاجر فرشت وانطرحت تراجي في عبدو يرن عليها
٭٭٭٭٭٭٭٭٭٭٭٭٭٭٭٭٭٭٭٭
بعد مرور ايام🌌
الساعه 1:30
عبدو يوتي في روحه يبي يرد للمحور هوا وعلاء
خش عليه احمد نعسان: عطيني مفتاح سيارتك انروح بهاجر عمي اليوم ماسك وموصيني عليها
عبدو ضحك عليه : عدي ارقد تو انروح بيها انا
وخذا مفتاح سيارته وطلع : امي انا ماشي مشوار وجاي ع السريع تبي حاجه
فاطمه : لالا سلامتك
طلع عبدو وهوا يسخن في السياره جاه علاء
علاء صفرله : وين ياطير
عبدو برم عليه : مشوار سريع
علاء : هيا نوصلك انا مافيك ماسخنتها السياره
عبدو طفه سيارته وركب امعاه: بنروح ببنت عمي من المدرسه
علاء بحت فيه وزارته الضحكه😂
عبدو رفع حاجبه:هااا عليش تضحك  😏
٭٭٭٭٭٭٭٭٭٭٭٭٭٭٭٭٭٭٭٭
هاجر في المدرسه
رن الجرس 🔔
طلعن البنات
سلمى : اااااه ياهاجر امتا تصح كراعك ونقعدوا انروحوا مع بعضنه ع كرعينه
هاجر: حتي انا نراجي فيه بالساعه والدقيقه
خطم عيل من احداهن هو وصاحبه وخبط هاجر بكتفه
هاجر حمقت ومدت شنطتها وكبوطها لسلمى
ومشتله: كنك انت 😡
العيل بوجه ينرفز: انتي الي كنك
صاحبه : تي فوتها ياراجل بنت
العيل : تي شنو يعني تو نكسرلها وجهها
٭٭٭٭٭٭٭٭٭٭٭٭٭٭٭٭٭٭٭٭
درس علاء السياره قدام المدرسه
وقعد ايسقم ف شعره
عبدو بحت فيه
علاء: تي واللهي ماني مفوتها النزله مدرسة بنات ثانوي وانا لابس لبست العسكريه ......تي والله كراعي ع كراعك ونزلوا
٭٭٭٭٭٭٭٭٭٭٭٭٭٭٭٭٭٭٭٭
هاجر زادت حمقت وقعدت تدف فيه من صدره بكل قوتها والعيل يوخر وهاجر ادف فيه وتعيط : بتضربني.... هضا مانقص بيش انقصهن لكي ايديك يا عييييل 😡
وخش عبدو وعلاء ع اللقطه هذ
عبدو من الصدمه قعد امصبي في مكانه ويتفرج 😨
هاجر ادف في العيل والعيل يبي ايدفها مش قادر عليها دفت هاجر العيل وسلمى حطت كراعها وراه تعكف العيل وطاح
علاء : تي هيا يار وينها بنت عمك
عبدو مصدوم وشيرلها ع هاجر: اهيه بنت عمي
علاء انصدم :ااااااه
عبدو فطن لروحه مشا يجريلها
هاجر بعدما طاح العيل ركبت فيه كانشوات بي كراعها الصاحه والمدرسه كلها اتفرج عليها
عبدو جاها : هااااااااجر😡
هاجر خافت : عب......ع ..عبدو  ودارت روحها تبكي ومشتله
هاجر دروحها تبكي: عبدو ضربني 😭😂
عبدو متعصب: تي وين اضربك العيل ماخذش نفس امعاك
هاجر تبحت في الوطا ودايره روحها تمسح في دموعها الوهميه😂
علاء مشا ركب للسياره وقعد يستنا فيهم وهو ميت ع روحه من الضحك😂😂
عبدو رفع العيل من تيشرته ولصقه ع الساس وقعد يهزب فيه
جت سلمى وهبه وفرح يجرن لهاجر
هبه : من هضا ياهاجر
هاجر: عبودتي 😋
سلمى تنش بيديها : ووووووه عليه ووووووه ياهاجر 😍
فرح : نبي انعدي انسلم عليه انا😂
هاجر : هيا خلاص تحشمن ونزلن عيونكن.☺
هبه: هوا شن اسمه ؟
هاجر : عبد الرحمٰن
هبه : باه هو اسمه عبد الرحمن وادلعوا فيه عبدو من نين جت عبودتي
هاجر: هضا دلعي انا 😂
اشويه وشافت عبدو جاي جهتها
هاجر خافت : ووووه عليه جاني 😣
سلمى : قوليله نابشك
هاجر : بيش ايبطلني بكل 😱شن انقول حي عليه عليك عااار
عبدو جاها : هياااا😡
هاجر خذت دبشها من سلمى ومشت وراه
هاجر: بشويه كراعي مانقدرش نجري زيك
عبدو يمشي وماردش عليها
خطم ايوب هضا صاحب هاجر اوكثر واحد متقرب منها
ايوب شير لهاجر : اوووووو عميشا عطيك الصحه ✋(ايوب ملقب هاجر بـ ِعميشا)
هاجر ضحكتله : اووو ايوب
عبدو عض لسانه وبرم عليها عطها نظره وبحت في ايوب : تعال تعال
ايوب جاه ومستغرب : نعم
عبدو عاقد حواجبه : مع من تحكي انت
ايوب استغرب : كيف ياهاجر مش ع اساس ماعندكش خوت
عبدو : شن دخلك بيها انت
هاجر تفنص لـِ ايوب من ورا عبدو
ايوب فهمها وبحت في عبدو : اااه قزدك شورك سامحنه
هاجر تبحت في عبدو وخايفه
عبدو شير بيده : طِير من قدامي
ايوب : بس صحه لكي ياطير طايح ف وحده تحك تنحك والله مافيها 😂😂
عبدو ضحك ع جنب وسكت وايوب مشا
هاجر بحتت ف عبدو : عليش لابس لبست العمل
عبدو :بنعدي
هاجر سكتت وقعدت تمشي وراه
عبدو يمشي قدامها : غريبه مادرتيش اامسلسل الهندي الي اديري فيه كلما نمشي
هاجر تحرقله في دمه: تي لاخلاص تعودت شي مره تروح تلقاني ناسيتك 😂
عبدو بحت فيها بتكشيخه 😒
خطمت بنت اتبحت في عبدو
هاجر فطنتلها : انجي انطيرهن لكي عيونك 😡
عبدو بحت فيها وضحك
هاجر متعصبه : عليك ناس ماتحشم 😡
عبدو : اسمعي امعايه علاء صاحبي مانبيش نسمع صوتك في السياره
هاجر : به 😉
وركبوا السياره
هاجر حطت كبوطها وشنطتها وقعمزت ورا عبدو
طول الطريق وهما ساكتين
هاجر قدمت راسها عند عبدو وقالتله: عطشانه
عبدو ضحك غصب عنه : مش منك من المصارعه اللي كنتي دايرتيها
علاء يضحك من دون صوت
شويه ووصلوا للحوش
درس علاء السياره ونزل عبدو فتح لهاجر الباب ومد يده عشان اينزلها لانها ماتقدرش تنزل بروحها هاجر مسكت في يده ونزلت
هاجر : شنطتي
عبدو : عدي بس توا انجيبها لكي
خشت هاجر للصور اتراجي في عبدو
عبدو خذا شنطت هاجر وكبوطها وخش للصور
هاجر خذتهن منه
عبدو جا يبي ايخش ايجيب ادبشه هاجر مسكاته من يده
هاجر : راجي شويه نحكي معاك
عبدو : نعم
هاجر تبرم في البطمه امتاع الجاكه امتاعه: كنت نبي انتأكد انك مش ماشي زعلان مني
عبدو : لا مش زعلان لاكن تو نحكوا في الموضوع هضا
هاجر بهزوه: امتا بعد شهر
عبدو رفع حاجبه
هاجر تلخبطت : قزدي كيف بنحكوا وانت ماتردش ع رسايلي
عبدو : تو لما نحصل فرصه نرن عليك
هاجر قعدت تبحت فيه وساكته تبي تبكي وماسكه روحها : تي كنه الاسبوع مسرع ماكمل😢
عبدو ضحك
هاجر : مش شوري دير حل ست شهور واجد
عبدو: تمام تمام
هاجر ابتسمت وعيونها تعبن دموع
عبدو: نركب انجيب ادبشي ونسلم عليهم ونجيك
هاجر هزت راسها بمعني باه وقعمزت ع كرسي في الصور
ركب عبدو سلم ع هله وخذا دبشه ونزل سلم ع جته وطلع للصور لقا هاجر امقعمزه ع الكرسي وتبكي بالعبره😢
عبدو: هااااجر
هاجر قعدت تمسح في دموعها وتمسك في روحها : نعم
عبدو : سألتك بالله كم مره قلتها لكي الجمله هذي "خلاص بكا عاد"
هاجر : تبيني انوقف ابكا معش تعدي 😢
عبدو: تو نحاول
علاء قعد ايضبح لعبدو من بره
عبدو بحت ف هاجر: باهي ماتبيش تسلمي عليه قبل مانعدي
هاجر صبت حضناته وهي تبكي : رد بالك ع روحك💕
عبدو: حاضر خلاص انتي بلا بكا
هاجر : تمام
عبدو : هي سلام وطلع
ركبت هاجر لحوشهم متنكده ورقدت
عبدو طلع لعلاء وركب للسياره
علاء : ساعه نستنا
عبدو يبحت قدامه وساكت
علاء ينابش فيه : صار قتلي هذي بنت عمك
عبدو ابتسم
علاء ضحك: تي بس والله راكبه امعاك
عبدو  : شن هيا اللي راكبه ؟
علاء :قزدي واحد في العسكريه وطول وعرض كيفك ماتبيلش وحده نيه تبيله وحده كيف هذي وضحك قتلك ان شاء الله اتعارك انت وياه تقعدوا تضاربوا 😂😂😂
عبدو ضحك : تي اسكت انت يامتاع فوزيه وعبير
علاء ضحك
٭٭٭٭٭٭٭٭٭٭٭٭٭٭٭٭٭٭٭٭
بعد ايام 🍃
هاجر ناضت الساعه8:00
غايبه عن المدرسه وعندها موعد في المستشفي عشان كرعها
محمد : هاجر هيا وقت ع الموعد
هاجر: تي باهي يابابا وطلعت
وصلوا للمستشفي
وبعد ساعه وهما يستنوا في الموعد خشت هاجر هيا وباتها للدكتور ،الدكتور قعد ايفكلها في الجبس وهاجر تبكي
الدكتور: كنك اتحسي في حاجه
هاجر هزت راسها بمعني لا
محمد : كنك
هاجر تمسح ف دموعها : شي شي
الدكتور كمل ايفكلها وهاجر دموعها ينزلن وتذكر ف اللقطات الي صارن بينها وبين عبدو وتقول ف عقلها(انا نبيه ....امرايفه عليه 😭....)وتفكر (زعمك لوكان مش انكسرت كراعي وبات امعايه الليله هذكي كان حيحبني 😢)وسارحه وتفكر
الدكتور كمل : تره صبي ياماما
هاجر ماسمعتش
محمد : هاجر صبي
هاجر صبت وخذت قطعه من الجبس وقالت للدكتور: عادي ناخذها
الدكتور :عادي ،تره وريني تقدري تمشي
هاجر مشت وهيا ماسكه ف يدها قطعة الجبس بالقوه وتفكر في عبدو
٭٭٭٭٭٭٭٭٭٭٭٭٭٭٭٭٭٭٭٭
الساعه 10:30ف الصبح
روحت هاجر هيا وباتها من المستشفي وخشت لجدتها
خيريه اول ماشافتها فرحت : ماشاء الله ماشاء الله ع بنيتي
هاجر ابتسمت وهي مضايقه
نجاة : خلاص ياهاجر انتهت قصة كراعك
هاجر : لامازال لازم علاج طبيعي
نجاة: باهي تحسي فيها لما تمشي
هاجر : مش واجد  ونطرحت ع كراع جدتها
خيريه قعدت تلعب بشعرها وتحكيلها لعند خذها النوم
الساعه 5:09 ف العشيه
هاجر ناضت لقت روحها راقده لوطه والدار فاضيه
صبت ومشت للدار الاخره
نجاة: صح النوم وين هضا كله
هاجر تكسلت :مازال خاطري نرقد اخره
نجاة: عدي بدلي وتعالي منى بنت عمتك تهاني جايه
هاجر : به وركبت تكت ع لجين
دقت الباب✊🏻🏾
فتحلها احمد هاجر تخيلاته عبدو
هاجر:عبدو .......ااه احمد
احمد ضحك :كنك
هاجر :ودرت رسمي ..كلملي لجين
احمد خش
شويه وجتها لجين
هاجر :قتلك منى بنت عمتي تهاني جايه اكيد ايجيبها سراج
لجين ضحكت :حي حي ع التطورات فكيتي الجبس😂
هاجر : اهاا امبدري فكيته
لجين : باهي خلاص انا نلبس وونتلاقوا لوطه مرات انشوف سراج
هاجر :تمام
ركبت وتت روحها ولبست سروال جينز وبلوزه وردي خفيف
ونزلت هيا ولجين وقعدوا ايهدرزوا مع منى ولما روحت جاها سراج وشافاته لجين وفي الليل ركبت هاجر لدارها وكتبت لعبدو رساله عن يومها كالعاده وهوا شافها وماردش
الساعه 3:45 ف الليل
هاجر تبكي مرايفه ع عبدو و قاهرها انه مايحكيش امعاها وفرحانه انها فكت جبس كراعها بس في نفس الوقت متنكه علي شان عبدو مش معها وهي كانت اتمنه انه اول شخص ايكون معاها ف اللقطه هذي قعدت ماسكه طاقيته وتبكي بالعبره 😭💔✋🏼
حست روحها مضايقه صبت وطلعت تبي تنزل للصور وهي طالعه من الحوش بحتت في مطلع الدروج فوق قابلها حوش عيت عمها اسامه زادت اضايقت نزلت لوطه للصور قعمزت ع الكرسي وذكرت لما تقابلت مع عبدو ف الصور
٭٭٭٭٭٭٭٭٭٭٭٭٭٭٭٭٭٭٭٭

.في گل طـيآت هہذآ آلمـنزل ذگرآگ , أنت لآ تفآرقني آبدآ...💛🌹

٭٭٭٭٭٭٭٭٭٭٭٭٭٭٭٭٭٭٭٭
حست روحها صقعت تنهدت وقالت: زعما انت وين من الصقع هضا ياعبودتي 😭💔🌁
ورن نقالها (عبدو )
هاجر فرحت ومسحت دموعها وردت : الو
عبدو يضحك :هلا
هاجر بطير من الفرحه : اهلين
عبدو : كنه صوتك متغير ...مريضه!
هاجر خانقتها العبره: لالاكنت نبكي
عبدو : تو قزدك انا انغيب انغيب ونرد نلقاك تبكي انا متصل بيك علي اساس فرحان ....عليش تبكي!
هاجر تبكي: انا مانبكيش غير عليك ومنك .....رايفت عليك انا مش حالها هذي ياعبدو ديرلي حل نبيك
عبدو سكت
هاجر تبكي: انت عليش فتحت الموضوع هضا وسيبتني ....لو تبيني صاح رد ومعش تعدي
عبدو تنهد :باهي تو انشوف
هاجر تمسح في دموعها وساكته
عبدو ايغير في الموضوع : حولتي الجبس
هاجر: اااها اليوم
عبدو :باهي شن تحسي فيها كراعك
هاجر :امبدري وجعتني شويه بس توا احسن
عبدو سمع صوت ريح احدها استغرب: وين قاعده انتي
هاجر : في الصور
عبدو عقد حواجبه: عليش😱
هاجر : مضايقه وما جانيش النوم
عبدو : صقع ياهاجر حرام عليك تو تمرضي
هاجر سكتت
عبدو :صبي اركبي
هاجر : خليني كل مانخش للحوش نضايق
عبدو ضحك: صبي ياعميشه
هاجر ضحكت :شن خطرها عليك 😂
عبدو :عجبني ...هيا صبي
هاجر صبت :باهي راكبه وركبت لحوشهم
خشت هاجر لسريرها:خشيت
عبدو :في سريرك توا
هاجر: في سريري
عبدو : غمضي عيونك وتخيليني في جنبك
هاجر حطت راسها ع المخده وغمضت عيونها وقعدت تخيل فيه
عبدو مغمض عيونه ويتخيل في هاجر  : لو كنت في جنبك تو شن تبي تقوليلي
هاجر تستفز فيه: كنت نقولك انا ......شي رايفت عليك 😂🙊
عبدو حمق :هاااااجر
هاجر تضحك : عيونها😍
عبدو ضحك :تجري بيه انتي
هاجر : انا ماسكتها ماسكتها وبعدها انقولها لكي في تليفون مايصير شي لازم live
عبدو :باهي شن صار ف قرايتك السنه هذي انتي شهاده
هاجر تنهدت: ماشيه
عبدو : طبعاً مش فاضيه تقري اتشلطي في العويل
هاجر :تي حرام عليك هي مره وشهدت عليه الدنيا كلها
عبدو:لازم تحولي منها المدرسه هذي
هاجر خافت :تي لا خلاص هيا اخر سنه بعدها جامعه
عبدو : بعدها تعدي تضربي شباب الجامعه😂
هاجر حمقت :تقصر عليه في وقت انت نسكر كان هضا
عبدو :اتسكري بعدها شن اديري
هاجر :شي انمد وجهي
عبدو :باهي هيا غمضي عيونك وارقدي حتي انا بنرقد💤
هاجر غمضت عيونها وقعدت تسمع ف صوت انفاسه💨
وقعدوا ساكتين لعند رقدت هاجر
عبدو بصوت هادي :هااجر ...!!
هاجر راقده وماردتش عليه
عبد يسمع ف انفاسها عرفها رقدت : تصبحي ع خير حبيبتي 💙وسكر الخط
٭٭٭٭٭٭٭٭٭٭٭٭٭٭٭٭٭٭٭٭
الساعه 11:30 ف الصبح
هاجر ناضت ع صوت هرجه وعياط ف حوشهم انفجعت وطلعت تجري من الدار:ماما ....ماما وينك لقت امها مش قاعده والباب مفتوح نزلت لقت فاطمه مقعمزه ع الدروج وتبكي وومعاها خيريه ومريم و نجاة يسكتن فيها ولجين مقعمزه قدام حوشهم وتبكي واحمد امصبي وماسك بكيته
هاجر خافت : ياماما شن صار ...كنكم
احمد: عبدو انصاب 💔
هاجر من دون اي مقدمات طاحت داخت
خيريه قعدت تعيط :تي مش هكي ... فجعتها 😱
مريم جت تجري لهاجر وتنوض فيها
احمد قدم رفع هاجر ونزل بيها لوطه وكلهم لحقوه
مريم :......

اسفه لو في خطأ املائي اوغيره ف الحلقه هذي او ف الحلقات اللي فاتن
ياريت تعطوني رايكم وتوقوعاتكم ف شن بيصير ف عبدو وهاجر💗

انحبكم واااجد💋