رواية Window 💞🏡
للكاتبه : sαℓeмα🔏
٭٭٭٭٭٭٭٭٭٭٭٭٭٭٭٭٭٭٭٭
عبدو :سمعيني صوتك
هاجر بتردد :به 😊
بعد دقايق وصوت الأغنيه واحاديثهم البسيطه❤
عبدو درس ع مطعم نزل ع السريع خذا غداء وركب للسياره
هاجر : وين بنمشوا
عبدو: تو انقولك
نص ساعه وكان عبدو وهاجر امقعمزين ع الكورنيش
تغدوا وكان جوهم سمح
كملوا مشوارهم وروحوا😻❤
كل واحد خش رقد
الساعه 6:30 ف العشيه
هاجر مقعمزه اتشوف شن عندها من واجبات وحفظ
هاجر ف فتره تهمل فيها قرايتها بس لما يكونن امتحانات جزئيه او نهائييه تقرا واتجيب امتياز
هاجر: اووف ياربي امتا تكمل السنه المتعبه هذي😤
قعدت تجهز ف الحاجات المهمه لأمتحاناتها
بحتت ف الساعه 8:00
هاجر: خلاص توا امتا مايحددوا موعد الأمتحانات نبدا كل مره ناخذ ماده انكملها
ركبت ل لجين
هاجر دقت الباب وخشت :السلاام عليكم
فاطمه :عليكم االسلام خشي ي جوجي تفضلي
هاجر شافتها لابسه :نازله لوطه ياعمتي فاطمه
فاطمه: اها نمشي انشوف حنك
هاجر: باهي لجين واعيه
فاطمه: اها خشيلها
هاجر فتحت الباب ع لجين وفاطمه نزلت لوطه
لجين دست التلفون :فجعتيني ي كلبه نحسابك واحد من خوتي
هاجر:خطير منضرك😂😂
لجين تمسك ف التلفون :سراج من الفجعا صكر
هاجر :خزي بدال مايقعد معاك ع الخط يشوف شن صار فيك
لجين عزقت فيها المخده :مش شورك انتي
هاجر حطت يدها ورا راسها : عبدو قاعد
لجين: ايوا قولي من البدايه عليش جايه
هاجر :خزي والله ما علي هكي
لجين : صدقتك انضني راقد مش عارفه ورن تلفونها
هاجر: نمشي انشوفه وانتي ردي ع الفسخه امتاعك
هاجر دقت ع باب داره
عبدو : خش
هاجر خشت
عبدو سقم تقعميزه وابتسم :اهلا اهلا انستي
هاجر :الله يانسك كيف حال كراعك
عبدو: تسطر شويه بس تمام ...تعالي قعمزي
هاجر: لاغير كنت بنطمن عليك نظفت كراعك اليوم
عبدو : لا والله
هاجر ضحكت : شن رايك انديرها انا
عبدو مسح ع لحيته : تبي تلعبي ع كراعي
هاجر عقدة حواجبها :لا نعرف صقع عليك باهي خليني انديرها
عبدو سرح ف عيون هاجر
٭٭٭٭٭٭٭٭٭٭٭٭٭٭٭٭٭٭٭٭
—ثمـ مـآذآ🌸
—ثمـ آني عند عينيگ لآحول لي ولآقوهہ💙❣
٭٭٭٭٭٭٭٭٭٭٭٭٭٭٭٭٭٭٭٭
عبدو فطن لروحه وقال : متأكده تعرفي
هاجر ضحكت وهزت راسها : وين حاط المعقم واللصقه
عبدو وراها مكانهن
وبدت هاجر اديرله ف كراعه
فكتله الفاشه لقتها دم
هاجر :حي مزالت اتصب كراعك دم
عبدو : تو بعد انعدي لعلاء انخش ع دكتور ايشوفها ليا
هاجر تمسح ف الدم
عبدو مغمض عيونه ورافع راسه فوق
خذت قطنه وعبتها مطهر جروح
عبدو :اخخخخ بشويه كنك تمسحي بغل
هاجر ميته ضحك : انت حساس
عبدو بحت فيها ورفع حواجبه : انا حساس😲 ولا انتي اللي ماشاء الله علي يدك
هاجر : عارف انحب لما حد ينجرح ولا يمرض انا انداويه اصلاً كنت انشوف ف بابا ديمه ايدير هكي
عبدو : يعني بتقعدي دكتوره
هاجر : الله محلاها الكلمه ان شاء الله
عبدو :ان شاء الله اتكوني احسن دكتوره❤
هاجر كملت لفتله اكراعه بالفاشه
هاجر :قانطه ولاكويسه
عبدو : لا تمام بكل
هاجر تحول ف القطن اللي معبي دم:انضني كان اتعدي للمستشفي يخيطوها اخرا
عبدو :كنها
هاجر: حسيت الخياطه مفكوكه عشان هكي صبت دم واجد
عبدو: تو بنصبي انعدي المستشفى اصلا
هاجر: كيف حاله علاء
عببدو :لعند امس ف المستشفى بعدها مش عارف شن صار فيه
هاجر سكتت
عبدو :بنشيل امي لأمه اتعدي امعاها
هاجر ضحكت : بصفتي من ان شاء الله
عبدو ضحك ع جنب : بصفتك مراتي وقدم باسها ع خدها
هاجر: انا خايفه مايوافقوش ياعبدو كان خطبتني
عبدو :تفاولي كويس وحدديلي دبشي عشان نطلع 😊
هاجر :و كراعك
عبدو: مايصيرلها شي
هاجر خذت دبشه :عليك عناد
طلعت اتحدد ف دبشه خش احمد
احمد: اووه مرات خويا
هاجر لفت عليه بصدمه: ننهار اسود صكر فمك
احمد ميت ضحك😂😂
هاجر :شن الكلام هضا
احمد : تحسابيني مش فاطن😂
هاجر ماتبش اتبحت فيه:تهيالك بس
احمد :وراسك الا موضوع جديات واتحددي ف دبشه اخرا😂
هاجر: لاحول ولا قوة الابالله عليك سكنه قلنالك مافي شي وبعدين مش اول مره انحددله دبشه
احمد قعمز يتفرج ع التلفزون :وين لجين
هاجر قعدت اتضبحلها خافت ايخش عليها
احمد: قتلك ضبحيلها انا
هاجر: نحسابك تبيها😁
لجين طلعت ماسكه شيتها دروحها تقرا :نعم
احمد : وراسك تبيلك كبسه مش مطمنلك
لجين بخوف :انااا شن درتلك😳
احمد: سلامتك
لجين مدتله الدبش بعدما خذاته من هاجر :هاك شيله لعبدو
هاجر :انا نازله لجين تعالي نبيك شويا
هاجر اتوشوش :ي خرا امسحي المحادثات وكل حاجه احمد شكله ناوي الكبسه وقوليله ايشيل عبدو مايخليش يسوق غير مابيتش ندويله انا تو يشك فيا زياده
لجين : باهي باه
لجين خشت لأحمد
لجين :احمد شيل عبدو ماتخليش يسوق
احمد: قوليلها ماتخفش عليه اللي توصي فيك عليه وطلع
لجين ضحكت بصدمه:نهاره الحيوان😨
بعد ساعات🎑
هاجر :ماما شن الهرجه اللي لوطه
مريم تلبس :مش عارفه انا نازله بنشوف
نزلن لقن اسامه يهزب
اسامه :امتا بتهتم بصحتك الخياطه ماقعدتش يومين انفكت نقعد نجري بيك بين المستشفيات ولا كيف
محمد :ي عبدو هذي خياطه مش لعبه الجلد المرا هذي تحمل خياطه وحده ثانيه لاكن تنفك هذي معش يقدروا ايدرولك شي
عبدو :ماقلتلهاش انفكي انا شن انديرلها
فاطمه :مش منك راكب نازل طالع خاش ماتبيش اتهمد روحك
احمد يضحك: اصبروا شويا خلوني انهزب انا
كلهم يفنصوا فيه
احمد :باه سكتت
خيريه :خلاص تو يقعد معايا هنا لا يركب ع دروج لا شي اقل شي اسبوع
عبدو ايبحت فيهم وحامق : خلاص كملتوا وطلع للصور وسيبهم
خشوا كلهم للحوش وقعدوا يهدرزوا
وهاجر تبحت فيهم وعقلها مش معاها تفكر كيف تطلع لعبدو
٭٭٭٭٭٭٭٭٭٭٭٭٭٭٭٭٭٭٭٭
لجين ف حوشهم تحكي هيا وسراج 💕
لجين : خوتي شكوا فيه امبدري احمد قالي بندير عليك كبسه معش نقدر انكلمك واجد
لسراج : بعد بكره انجي نخطبك
لجين انصدمت : شنو ،اكيده تبصر
سراج : نحكي بجديات شن نبصر خلاص هيا حلها هكي خير ماخوتك ولا حد يزرق عليك بعدها اتصير ممشكله بيني وبينهم
لجين : تي باهي خليها اشويه اخره
سراج: لالا خلاص كل مره تأجلي فيها اليوم ندوي مع امي
لجين خايفه : تي باهي كيف انقول لهلي انا
سراج : تبي انكلم انا عبدو
لجين عيطت :لالا ....تبيه يقتلني ،تو اندبر راسي بروحي
سراج : تمام
لجين : باي وسكرت وهيا تندب وخايفه كيف بتقول لهلها
نزلت تجري عارفه هاجر لوطه
خشت : السلام عليكم
الكل : وعليكم السلام
لجين غمزت لهاجر ومشت للكوجينه
هاجر قعدت شويه ولحقتها خشت عليها لقتها امقعمزه ع الطاوله وترعش
هاجر: كنك
لجين : سراج قالي بيجي بعد بكره بيخطبني
هاجر ضحكت : باهي وشن الي يخوف
لجين تخبط ف وجهها : وشن انقول لهلي تو يعرفوني دايره امعاه علاقه😱
هاجر : ادوي لامك وهي تدوي للباقي
لجين :لالا شن انقوللها ماما سراج جاي يخطب فيه بيش تذبحني
هاجر : باهي شن بديري
لجين : مش عارفه وهو سكر راسه ع بعد بكره
هاجر :تو ندويلها انا😁
لجين :شن بتدويلها
هاجر : خلاص بجديات خليها عليه بعد العشاء انجي نحكي مع امك لاكن انتي ديري دور العبيطه وماتعرفي شي
لجين :تمام
هاجر :انا بنطلع لعبدو
لجين :عدي انا قاعده هنا
اما عبدو كان ف الصور ايدخن🚬 وقاعد ع نقاله خش محمود قعمز امعاه
هاجر طلعت من باب الكوجينه لقت محمود امقعمز ردت تجري
عبدو فطنلها وضحك
محمود : تعالي تعالي
هاجر طلعت: نعم وبحتت ف عبدو تستعبط : خير ياعبدو
محمود ضحك : واللهي علي اساس ماكنتيش امعاه يعني
هاجر سكتت
محمود: عليش طالعه😉
هاجر : ااءء ننشر ف خرقه
محمود بحت ف يديها : وينها
هاجر :ف الكوجينه وخشت
لجين :شن صار
هاجر وجهها احمر : عمي محمود بره ووووه عليه (وتمروح بيدها)
لجين تضحك
٭٭٭٭٭٭٭٭٭٭٭٭٭٭٭٭٭٭٭٭
الساعه 12:00 ف الليل
هاجر تعشت ونزلت لعيت عمها اسامه (عشان اتقول لعمتها فاطمه ع موضوع سراج)
هاجر دقت الباب✊🏻
فتحتلها لجين :اهلين هاجر
هاجر حركت حواجبها : اهلين
وخشت هيا وياها وفاطمه كانت امقعمزه ف الصاله وتتفرج ع TV
لجين بتوتر ممزوج بإستعباط : تعالي انخشوا لداري
هاجر : لالا نبي عمتي فاطمه
فاطمه بإنتباه : نعم هاجر ان شاء الله خير
هاجر قعمزت هي ولجين : عمتي فاطمه نبيك ف موضوع
فاطمه كيف بتحكي قاطعها احمد لما خش للحوش وهو يدندن
قعدوا يبحتوا فيه لعند خش لدار عبدو بعدها رد طلع
فاطمه : شنو الموضوع ياهاجر
هاجر بتوتر : امبدري رن عليه سراج ...خش احمد مره ثانيه وسكتوا
خش احمد لدار عبدو شويه وطلع
فاطمه : شن يبي سراج
خش احمد مره اخره
لجين عيطت وهي تشولي بيديها : خلااااااااص وانت طالع خاش خلينه انشوفوا البنت شن تبي (ع اساس ماتعلمش 😂😥)
احمد رد عليها بنفس الاسلوب : شن بنديرلك هضا عبدو كل مره يبي حاجه من الدار
فاطمه : باهي امشي وانت ساكت هي
خش احمد للدار وطلع
فاطمه : كملي ياهاجر
هاجر بلعت ريقها ودوت بسرعه: امبدري سراج كلمني وقالي انه يبي لجين
فاطمه ملامح وجها نفس ماهنه : شن يبي فيها
هاجر مغمضه عين والاخره مفتوحه : يبي يخطبها بعد بكره
فاطمه برمت ع لجين بصدمه : انتي تعرفي 😨
لجين رفعت يديها وعيطت : لاااااااه😳
فاطمه سكتت واضح عليها تفكر
هاجر ولجين مسكن ف يدين بعض و متوترات ايراجن ف الرد
فاطمه : باهي خليهم ايجو توا ندوي لأسامه
لجين وهاجر يبحتن ف بعضهن ويضحكن
٭٭٭٭٭٭٭٭٭٭٭٭٭٭٭٭٭٭٭٭
يوم الخطوبه 💕
طبعاً كانت الخطبه لوطه الرجاله ف المربوعه والصبايه ف الحوش
لجين لبست قفطان اسود قصير مفتوح من عند الظهر مع قبال فضي ومدايره شعرها فوق وطالعه اتهبل😍
هاجر لابسه قونه سوده قصيره عليها كت دمي قصييير مفتوح من لاوره وقدام وقبال اسود وطالقه شعرها مافيش داعي انقوللكم كيف طالعه😍😱
هاجر قااعده ف المطبخ مع عمتها نجاة وانتصار ومنى
نجاة :هاجرر طلعي القهوه للرجاله
هاجر نصدمت:وين
نجاة :تي عدي اطلعي تو تلقي محمود ولاعبدو
هاجر سكتت وقعدت تبحت ف لبستها
انتصار :كان تبي تو انطلعها انا
هاجر بضحكه صفرا : لالا تريحي
منى : هيا عدي
هاجر خايفه وتفكر كيف تطلع
منى :نزلي القونه اشويه يمشي الحال
هاجر ضحكت :انزل القونه اتعره بطني😂
منى ضحكت :معناته توكلي ع الله وامشي
هاجر خذت نفس وطلعت راسها من الباب
منى دفتها : تي عدييييي وسكرت عليها الباب
هاجر قعدت امصبيه ف تركينه ف الصور وفي يدها الصفره
وكان عبدو ومنذر ومحمود واحمد امصبيين وعاطيينها بظهرهم
هاجر تنادي بصوت واطي ومحشمه : محموود😫
محمود برم وبحت فيها لقاها ماسكه السفره
شير لاحمد : عدي خوذ منها يااحمد
منذر قعد ايبحت فيها من فوق لوطه
عبدو حمق وصبه قدام منذر وغطا عليه بحيث ميشوفش هاجر وقعد ايبحت فيها وحامق وعيونه شرار
احمد خذا من هاجر السفره
هاجر : راجي راجي
احمد :نعم
هاجر : غطي عليه لعند انخش
قعد احمد يمشي وهاجر تمشي وراه لعند خشت
٭٭٭٭٭٭٭٭٭٭٭٭٭٭٭٭٭٭٭٭
الساعه 1:30ص
ركبوا كلهم لحواشينهم وعبدو كان طالع ومازال ماروح
هاجر خشت لدارها لبست بيجامه وكيف تبي تمسح مكياجها جاها اشعار من الفيس قعمزت ع السرير
عبدو خش للحوش قعمز في الصور 🚬📱وبعدها ركب
وهوا راكب بحت ف هاجر من الروشن
هاجر صبت : اهلا
عبدو وهو مكشخ : اهلين
هاجر : تي وين هضا كله ،كنك طولت
عبدو ساكت ولاوي وجهه
هاجر ركزت عرفت انه حامق من الموقف امتاع العشيه
هاجر تستعبط : شن درت انا😩
عبدو : شن درتي ..... قتلك تحجبي قدامه تطلعي عريانه
هاجر زرتها الضحكه : عريانه امتا صارت هذي😂
عبدو حمق : هااااجر
هاجر دمعت : تي واللهي طلعت غصبن عني انت ماشفتش عمتي نجاة كيف زرتني وبعدها منى دفتني وسكرت الباب معش قدرت انخش 😢
عبدو سكت
هاجر قعدت تعصر ف عيونها لعند نزلن دموعها
عبدو زراته الضحكه : خلاص خلاص راه يطلعن عيونك
هاجر ضحكت ومسحت دموعها
عبدو ايبحت فيها وساكت
هاجر : صاح امبدري سراج جا
عبدو : اهااا امبدري كنت امعاه
هاجر : شن جوك انت وياه ان شاء الله غير مابينتلش انك حامق منه
عبدو : لالاتمام ،انا في الاول كنت مش متقبل الفكره بس ( نسيت نحكيلكم طبعاً بطلنه 😍كان رافض موضوع الخطبه لانه حسهم لعبوا من وراه بس هاجر قنعاته بالموضوع)
هاجر : وتوا
عبدو هز كتوفه : عادي
هاجر تبحت فيه بشك: اكيده
عبدو قرب منها : غير خلينه منهم وقوليلي توا😍
هاجر بدلع : شنو
عبدو : وين ع الجمال هضا كله ❤
هاجر :........
الحلقه هذي نزلتها عشان خاطر saroo_xxانحس فيها الوحيده اللي اتبع ف الروايه😅
المتابعون ف صمت عطوني رايكم وينكم 💓
الحلقه الجايه فيها احداث مهمه واجد وهضا وين بتبدا الروايه 😘العشر حلقات الاولات تسخين بس
اسفه لو ف اي خطأ املائي اوغيره
انحبكم واجد💋
أنت تقرأ
Window 💞🏡(مـكتمـلة)
Roman d'amourرواية# بالهجه الليبيه تحكي عند بنت دلوعه ومشاكسه تقع ف حب ولد عمها #العسكري ويعيشو احلا ايام حب بس حتواجهم شوية مشاكل بسبب مرض (سرطان الدم 😢)فهل تنجح قصة حبهم ام تنهار.🔐
