Window 💞🏡(مـكتمـلة)

الحلقه الاولى💞

ـ هاجر ولجين في حوش جدتهم لوطه

الساعه 12:00ف الصبح

هاجر : لجين شن رايك انسيقو دروج الحوش
لجين : واللهي نحنه ضمينه ضمينه انكملو ونديروا الدروج
هاجر : خلاص انعدي نركب نعلق التوبو ونجيب سياقتنه والصابون وانتي جيبي سياقتكم ونبدو
لجين : تمام
ركبت هاجر لحوشهم و جابت الحاجات وبدت اتسيق هيا ولجين لعند وصلو في الدروج امتاع حوش عمها اسامه( بات لجين )
لجين : هاجر مديلي التوبو
هاجر وهي بتمدلها التوبو عثرت فيه وطاحت من علي الدروج
لجين تعيط :هااااااااجر ......حي علي يامااااما 😨
هاجر قعدت تشقلب ع الدروج لعند وصلت قدام حوش جدتها 😂
لجين نزلت تجري وتعيط : ياماماااااا ....ماماااا
هاجر طايحه وتعيط : كراعي .......ايييي ياممممامي 😭
نزلتلها لجين تخبط ع وجهها: تره وريها ليه شن صارلها
طلعت عمتهن نجاة: شن صار كنك 😳
هاجر : اااااااااااه كراعي مش قادره انحركهااااا😭😭نبي نموت ووه عليه
نجاة اتصبي فيها : صبي بشويه هيا شن دخل الموت ف كراعك
هاجر تعيط و تبكي : مش قااااااادره ياعمتي ااااه😭

٭٭٭٭٭٭٭٭٭٭٭٭٭٭٭٭٭٭٭
محمد (بات هاجر) مقعمز ف الصاله يتفرج ع التلفزون سمع صوت عياط هاجر
محمد: هذي هاجر اللي تبكي
مريم طلعت من الكوجينه تجري : حي عليه بنتي😱
ونزلوا مهما الاثنين يجاروا
هاجر بعد شافت باتها زادت ف البكي😭

٭٭٭٭٭٭٭٭٭٭٭٭٭٭٭٭٭٭٭٭

عبدو في الجامعه مع صاحبه علاء
علاء: شن عندك اليوم
عبدو يتكسل :واللهي ماني عارف اول حاجه بنديرها بنروح نرقد 💤
علاء : الامتحانات قريبه كان بتحشم علي وجك وتقره شويه
عبدو ضحك: تمام تمام ،باللهي بحت هذي كيف تزن علينه من بدري كيف الذبانه😂
علاء ضحك بصوت عالي : لالا مش ذبانه نحله قول عليش
عبدو شقلب عيونه بملل : عليش
علاء: لان النحله تزن ع العسل اللي زيي 😂
عبدو : مفضاك😪،ماتبي شي
علاء: سلامتك خلينه انشوفوك بعدين
عبدو: سلام

٭٭٭٭٭٭٭٭٭٭٭٭٭٭٭٭٭٭٭
في الحوش
العيله كلهم متجمعين لوطه ماعده عبدو ايراجوا في هاجر تروح من المستشفي هيا وباتها
خيريه : زعمك شن صار في هاجر
مريم : توا رنيت علي محمد قالي امروحين
فاطمه(ام عبدو): تي باهي شن صار فيها
مريم تنهدت :مش عارفه
لجين: واللهي طيحتها واعره مش حتطلع منها بي بلاش
خيريه فنصت فيها : اسكتي انتي ياما لسان قولي كلمة خير
لجين : حاضر ياجديده 😪
شويه وخش محمد شايل هاجر وكراعها مجبسه تحت الركبه بشويه
كلهم انصدموا
قعمزت هاجر ع الصالون وقعدوا يهدرزوا في اللي صارلها
٭٭٭٭٭٭٭٭٭٭٭٭٭٭٭٭٭٭٭٭
الساعه2:00
كل حد ركب لحوشه عشان ايتغدوا وروح عبدو من الجامعه
لجين في الكوجينه تغسل في الماعين وفي جنبها فاطمه تطيب في الشاهي خش عبدو يبي يشرب اميه
فاطمه: سمعت شن صار في بنت عمك
عبدو داك راسه في الثلاجه : من؟!.. هاجر
لجين :عارف ياعبدو امبدري انسيق في الدروج انا وياها طاحت ونكسرت كرعها
عبدو انصدم : الله الله الله امتا صار هضا كلله 😳
لجين : امبدري في الصبح
عبدو : هو عمي محمد اليوم ماسك ف المستشفى صاح
فاطمه هزت راسها بمعني اهااا: خليك اليوم مرات يستحقوا حاجه
عبدو سكت
خش عليهم احمد :امي يبيك باتي
فاطمه: ربك يستر كان ما راجل عمتك تهاني صارت فيه حاجه اليوم مريض واااجد قالوا وطلعت
لجين خافت وخبطت ع وجها :حي حي (خلي نحكيلكم شويه لجين اتحب سراج ولد عمتها تهاني وهو ايحبها ويكلموا ف بعض)
عبدو بحت فيها وهو مستغرب: كنك
لجين توترت : لابس شي وجعتني منى لو باتها مات(منى اخت سراج )
عبدو يبحت فيها بنظرات شك : اهاااا نزل الغلا ع منى توا
٭٭٭٭٭٭٭٭٭٭٭٭٭٭٭٭٭٭٭٭
فاطمه خشت علي اسامه في الدار
اسامه: علي راجل تهاني توفه
فاطمه شهقت : ان لله وان اليه راجعون
شويه ونقلب الحوش علي بعضه وكلهم يجرو ويوتو في ارواحهم عشان يمشوا للعزاء
هاجر : ماما كيف ايصير فيه انا مانقدرش نمشي من كراعي
مريم : تو بلكي لجين تقعد امعاكي
هاجر سكتت وهيا عارفه انه لجين مش حتقعد لانها تبي تعزي سراج وماتقدرش اتسيبه ف وقت زي هضا
وطلعوا كلهم وقعدت هاجر بروحها في الحوش
٭٭٭٭٭٭٭٭٭٭٭٭٭٭٭٭٭٭٭٭
الساعه 6:00م
عبدو روح للحوش عشان يقعد امعا هاجر لان مريم وصاته عليها
ركب علي دروج وقف قدام حوش عمه محمد وطق الباب✊🏻
(هاجر كان عندها العلم انه عبدو حيروح عشان يقعد امعاها )
هاجر وهيا قاعده ع نقالها: خش
خش عبدو متخزرط : حئم
هاجر بحتت فيه
عبدو: شن الجو
هاجر :تمام، كنك روحت بدري
عبدو:حضرت الدفينه وروحت ماعندي ماندير وانتي قاعده بروحك
هاجر : بابا جا
عبدو: حضر الدفينه ورد للعمل قال مايقدرش يقعد عنده عمليه
هاجر تحكي في سرها :(يعني اليوم راسي وراسك 😩)
عبدو :انا بنركب فوق كان تبي حاجه رني عليه
هاجر : اوكي
عبدو ركب لحوشهم وخش يدوش
هاجر قعدت علي نقالها شويه وحست روحها تبي الحمام
هاجر : وووووه انزربت😰
وسكتت شويه تفكر : لالا مستحيل انكلمه .....عليك حشمه☺
حاولت انها تصبي وبعد كمين محاول ماقدرتش
هاجر : وووووووه ياربي شن اندير !! .........لالا انكلمه خير مانديرها ع روحي هنا وخذت نقالها ورنت ع عبدو بس هو كان في الحمام يدوش وماسمعش
بعد نص ساعه تقريباً
هاجر اتلوه في حوشهم ومش قادره اتخش للحمام😂
طلع عبدو من الحمام لابس تيشرت وشورت و ينشف في شعره قعمز ع سريره فتح نقاله لقا مكالمه فائته من هاجر صبا ونزللها
دق ع البااب✊🏻
هاجر :خش😢
خش عبدو : لقيتك رانه عليه
هاجر وعيونها دموع : نبي الحمام
عبدو مافهمش وسكت
هاجر: مانقدرش نمشي 😥
عبدو: تبي انشيلك للحمام يعني...!!
هاجر هزت راسها وعيونها دموع من الحشمه
عبدو قعد ايحك في راسه ومتخزرط وزارته الضحكه😏 ومش عارف كيف ايقدم ويشيلها😸
هاجر متحشمه وفي نفس الوقت تبي الحمام ضروري وتقول في عقلها(بسرعه خلصني قبل مانديرها تحتي😪)
عبدو عد لعند 3 في سره وقدم رفعها
هاجر غمضت عيونها بالقوه ودموعها نزلن وقعدت يابسه
عبدو قعد ايبحت فيها ومبتسم لعند حطها قدام الحمام نفخ روحه وحول ابتسامته
هاجر بعد حست كرعيها وصلن للوطاه حلت عيونها وبحتت في عبدو
عبدو بحت فيها تلخبط ومشا للصاله
هاجر سكرت باب الحمام
عبدو قعد يبرم في الصاله بحت في يديه لقاهن يرعشن قعد يضحك بدون صوت: تي هضا شنو 😅
بعد شويه هاجر بحتت في روحها ف المرايه وقعدت تحكي بصوت واطي : (هيا ياهاجر اشجعي واطلعي لعند امتا بتقعدي في الحمام) وصبت قدام باب الحمام وخذت نفس وفتحاته
عبدو كان ع نقاله سمع الباب انفتح جاها
هاجر تنهدت :الله يسامحك ياعمي علي مالقيت الا تموت اليوم
عبدو قعد يضحك 😂
هاجر فنصت فيه : اضحك اضحك
عبدو يبحت فيها ومبتسم
هاجر عاودت غمضت عيونها:هيااااا خلصني😠 .....وحق ربي انبهدلك اليوم
عبدو : ولا يهمك
رفعها وتردد قبل مايدوي امعاها: مانبيش ناكلك راه☺
هاجر فتحت عيونها :عارفه ،لاكن مانقدرش انبحت في عيون حد بذات بالقرب هضا
عبدو رفع حواجبه : هذي تعتبر نقطة ضعف 😏 وحطها ع صالون
هاجر : شكراً
عبدو: عفواً
هاجر: كسدت بروحي حتي نت مافيش خليك امعايه
عبدو ابتسم وعجبه كلامها :شويه بس وركب لحوشهم جاب شيتاته وقعمز في الصاله في جنبها وقعد دروحه يقرا وهوا مش مركز ويبحت فيها
هاجر تقلب في قنوات التلفزيون ومره مره تبحت في عبدو
عبدو :......

تفاعل بليز💞