هاي مو غرفة هذة مخزن صغير حاطين بي غراض قديمة حيل من بعد ما طبكت الباب صار الهدوء سيد المكان اصلا ملك المكان اباوع على حياطين الغرفة لزمت عباتي حطيتهة على جتافي لان بردت بدون سبب قشعر بدني من الموقف الي اني بي
لكيت اكو جودليات ملفوفة ومحطوطة فوك ميز بي مراية مكسورة اخذت جوديلة وفرشتهة بلكاع كعدت عليهة اخذت نفس قوي وهج لتبجين هذة قرارج وهذة مصيرج انتي الي تتحملي ان بجيتي وان ما بجيتي مستحيل يتغير شي ابقي ساكتة والله يفرجهة
شلت شعري من على ظهري لفيته بلشال مالتي لان شعري بعده اخظر على غسلت العصر وقراصتي نكسرت مابية حيل اكوم لجنطتي واطلع گتر مال شعر وخرت عباتي عن جسمي شفت ادية حمر وبيهن كدمات حمر وبنفسجي من ضرب الاماية والابن اكيد يصير هيج اثار
كل لحظة حلوة دا تمر كبال عيوني من مؤمل تخرج ومن فتح المكتب مالته ومن جابته امي للدنية وفرحنة بي من وكف وياي باوقات ضعفي على مو ديانة من قرر يصير سندي بكلشي بنفس الوقت تخلة عني ابوية وهسة تخلة عني مؤمل وراح بدون ما يفكر بية راح لغير عالم بعد ما نتشاوف بعد مانضحك ولا نسولف ولا اغلط عليه ولا يسمعني كلام ما احبه ولا يصرف فلوسه على الاقراص مال الالعاب ويطلب مني فلوس واطي بدون ما احسبهن ارجعلي يخوية وكبر رحمة الله اطيك كلشي عدي بس ارجع ونور البيت احس نفسي مخنوك بدونك كل يوم هيج وقت جاي يمي تحجيلي اشياء تضحك صح جنت ما اضحك كبالك بس والله اضحك من اذكرهن واني بوحدي لو بلشركة هسة بعد منو يضحكني؟ منو يسئل علية؟
من كثر ما ختنكت كمت من مكاني طلعت من الغرفة نزلت جوة لغرفة مؤمل فتحت الباب لكيت حاطين شمعة يم فراشه والغرفة ظلمة لا يخوية غرفتك ظلمة ووحشة وانت مو بيهة فتحت الاضوية باوعت على غرفته معدلة هو دائما مخربطهة ويعدلهة بايده
اسنات/هذة تعديل ايده هو
امجد/اعرف...لان تعديله مو حلو هه
اسنات/هذاك حاسوبه
امجد/يلعب بي العاب
اسنات/هه بلستيشن
امجد/ويباوع عليه افلام رعب ويجي يمي يكلي شلون نعرف اكو جني لو لا
اسنات/ههه يخاف ههه....اهئ اهئ امممجد راااح
اسنات شبكتني وبجت باوعت للغرفة بالم مديت ايدي سديت الضوة وسديت الباب اخذت اسنات لغرفتهة لكيت فاطمة كاعدة تنيم بتهة وتبجي وتقرة قران حطيت اسنات يمهة وطلعت من الغرفة رجعت لغرفتي ذبيت روحي على الفراش باوعت على صورتي وية مؤمل وديانة احنة الثلاثة اخذنة هاي الصورة ثنينهم عزاز وثنينهم راحو بقيت بس اني ليش ما اخذوني وياهم؟ هاي ثاني ليلة مدا انام بيهة من بعدك
فتحت عيوني من حسيت بحركة يم راسي نظفت روحي وكمت بثانية شنو هذة بسم الله الرحمٰن الرحيم فارة؟! حشرة؟! ابو بريص؟! شنو؟
ماكو اي صوت رجعت كعدت بمكاني بس بخوف باوعت للساعة مالتي بلخمسة ونص كافي خلي اكوم هو نوم وماكو بالي كله يم امي هسة اني عرفت شنة مصيري اخر شي بس امي شنو ردة فعلهة من صحت ومالكتني؟
