خلصت صلا كعدت على الجودلية مالتي متكسرة اااخ ظهري عدلت ظهري لان متقوس وماريد تصير عدي حبدة من هسة....هه صارت وراحت فقراتي يصيحن يبووو وعمتي ام امجد هم تصيح
وهج/ها عمة
ام امجد/نزلي وين صرتي
وهج/اي اجيت ...اخ شنو هذة برجلي
باوعت على باطن رجلي لكيت الجرح الي نجرحت بي ببيت عمي صايرة ازرك اووي هستوني يالة حسيت بي
غلست عليه ومشيت بسرعة نزلت بسرعة تلكتني اسنات وجهة احمر دم الدموع بعيونهة
وهج/اسنات شبيج
اسنات بحسرة/مابية شي
وهج/روحي بدلي وغسلي تعالي حتى تتغدين
اسنات/كليلهة لامي ماشتهي
مسحت دموعهة بذراعهة وصعدت فوك منو مضوجهة؟
رحت للمطبخ طلعت الاكل من الفرن كل ما امشي يوجعني الجرح شكو الة هسة يالة تطلع صارلك يومين ماكو الم الة هسة؟
طلعت مواعين من الكوانتر وخواشيك خبز وطرشي وسويت بسرعة زلاطة اجتي عمتي طلعت دولكة مي حطتهة على الميز
وهج/ع عمة
ام امجد/خير
وهج/شبيهة اسنات ليش تبجي
ام امجد/وحدة من صديقاتهة شايفتهة وسائلتهة ليش غايبة صارلج اربع ايام تذكرت مؤمل ورادة للبيت تبجي
وهج/حبيبتي...حبابة خليهة تجي تاكل ميصير تبقة بدون اكل
ام امجد/ليش هية شنو الي رح تسوي غير تاكل
وهج/كالت كوليلهة لامي ماشتهي
ام امجد/اوف ياربي صبر كلبي
وهج/الله يساعدج
بعدني دا احجي وية عمتي اجة امجد وجوة ايده اسنات تبجي يمكن امجد مدللهة لاسنات...خطية اسو تجبي وتشاهك ياعيوني الله يساعد كلبج
امجد/يلة اكعدي اكلي
اسنات/والله ماعدي نفس اكل
امجد/اذا متاكلين اني ما اكل واني جوعان
اسنات/لا اكعد اكل شعليك بية
امجد/انتي بنيتي الصغيرة شلون شعلية بيج
باوعت على عمتي لكيتهة تبجي وتمسح دموعهة بصمت
رجعت باوعت على امجد واسنات خطية ...واني الثولة ابجي وياهم تذكرت توامي شهد حبيبتي مشتاقتلج بكد رحمة الله شكد مشتاقة اسمع صوتج وسوالفج الحلوة حابة اكعد واحجيلج كلشي دا يصير باختج الصغيرة الي اصغر منج بيوم هه
مسحت دموعي بلخلسة طب عمي من برة سلمنة عليه راح صعد يبدل اسنات كامت للسنك غسلت وجهي ورجعت كعدت يم امجد صبيت الغدة بلمواعين اجو كلهم كعدو ياكلون
عفتهم ياكلون براحتهم مشيت للكلدور كعدت على التخم شلت رجلي شفت الجرح والله صاير سيمنة هو خلاني اصخن باول يوم نجرحت بي وهسة مثل السيم بلرحل يوجع معقولة بقت كزازة برجلي؟! لا مستحيل ما تبقة جا متت الم
نزلت رجلي وظليت ناطرة يخلصون غدة حتى اتغدة وراهم سبحان الله جنت اكل ست وجبات بليوم هسة صرت بس على وجبة وحدة اتغدة الظهر واكطع لا عشة ولا ريوك باوعت على بطني مسفوطة على ظهري هلللة رجيم مميت عن قريب سنزور النجف وشكرا
ظليت كاعدة افكر بالف شغلة بامي واختي وحياتي وامجد واسنات وعمي وعمتي وايوب ورجب وعسل وامهة وابوهة والمرحوم وحياتي والجرح والفصليات وووووو اااييييييه افكار تخلي الگلب يتلخ
