بعد سبوع..
شحجي على هذة السبوع شكول اااللللله على هذة السبوع ماحسيت نفسي فصلية ابد ليش لان امجد مسافر سبوع رحمة الله الواسعة دركتني ودركت حياتي اكعد الساعة بلتسعة براحتي انظف براحتي اسوي اكل براحتي اي عيني تعلمت كومة طبخات من عمتي اما اني واسنات كل يوم نكعد بغرفتهة ونظل نسولف بما انو هية سادس مثلي اكعد اقرة وياهة شكد حاولت اتصل على امي من موبايل اسنات بس ماكو يطلعلي الخط مغلق حتى طلبت من عمي يتصل على عمي اني ماكتله اتصل على عمي اكله اريد اتصل على ابوية اريد اطمن عليهم والله الرجال مايكول لا يتصل وهماتين يطلع الخط مغلق اكيد عمي الحقير مسوي شي شغلة بلموبايلات
وهج/ونحط رمان؟!
ام امجد/اي احنة نحط رمان ناس تحط لبن
وهج/ويصير باباغنوج ههه
ام امجد/هه اي هسة صار
وهج/حلوة الاكلة وبسيطة
ام امجد/الطبخ كله بسيط بس يرادله تركيز وايد سريعة
وهج/اي صحيح
ام امجد/روحي غسلي اديج عدي شغلة وياج
وهج/اي هسة جاية
رحت للسنك غسلت ادية عمتي راحت للكلدور سديت المي نشفت ادية بملابسي ردت اروح لعمتي بس الخباثة اشتغلت بسرعة طلعت خبزاية اخذت منهة قطعة صغيرة رحت للباذنجان اخذت منه اكلتهن بسرعة مسحت حلكي ورحت لعمتي كاعدة بلكلدور تقرة قران
وهج/ها عمة كولي
ام امجد/صدق الله العلي العظيم... يمة اليوم امجد رح يرجع من السفر
وهج/لا هلة...هلة برجعته اي وشرايدة اسوي
ام امجد/على اي ساعة يطب روحي نظفيلهة غرفته وفتحيله التدفئة وحطيله ملابس على الفراش خطية يمة الرجال هلكان من التعب
وهج/هو بيش الساعة يرجع؟
ام امجد/مادري باي ساعة تلكي طبلنة كومي بنيتي نفظي روحج
وهج/صار عمة كايمة
كمت من يمهة واني معبسة صارلي سبوع مرتاحة راحة بس الله يدري بيهة وهسة رجعنة للقهر اهووو شجابه ليش مايبقة برة
ام امجد/كافي تتغوثين هذة رجلج
وهج/لا عمة مدا اتغوث دا ادعي بادعية تعجل برجعته...شلون عرفتني دا احجي عليه ياا
حطيت ايدي على حلكي وصعدت فوك رحت لغرفته طبيت بكل غرور
وهج/يعني انت وراية وراية لو هسة شنو يصير شوكت اخلص منك ماعرف
واكفة كبال صورته احجي وااشر بادية براحتي واحجي بلطريقة الي عاجبتني
صعدت دشداشتي كفيت رداني رحت للبردات فتحتهن والشبابيج هماتين رحت لفراشه شلت الجرجف مال الفراش نفظت المخاديد واللحاف رحت للكنتور طلعت جرجف جديد فرشته وحطيت وجوه المخاديد صفطت الحاف بمكانه اخذت الجراجف ونزلت حطيتهن بسلة الملابس حتى اغسلهن فد شوية ورحت للمخزن الجوة الي صاير بلمطبخ طلعت المكانسة والمكرافة وصعدت فوك كنست الغرفة من الطول للطول وبعدين مسحتهة بسرعة بس سويت المسح قاطين رجعت كلشي لمكانه صعدت وياية المعطر مال الجو رشيت بلغرفة اخذت ملمع اخشاب وجام رحت مسحت جام الشبابيج والاخشاب والتحفيات والصور مالاته الي معلكهن بلحايط رحت للحمام غسلته كله رجعت للغرفة سديت الشبابيج والبردات فتحت الاضوية والتدفئة الصراحة اشتغل واحجي على امجد بس ابد ما دعيت عليه
