رحت اكويله ملابسه بسرعة سويتهن على الي اكدرله وين اكو واحد يكوي ملابس بشكم دقيقة المهم اخذهن وهو ساد حلكه
رجعت للمخزن طلعت ملابسي تراك طويل بس ردانة مو نص ردان بس واصل لعكس الايد بلكي ما يمانعون على لبسي ويسولي مشاكل وهم يردون اي غلطة مني حتى يطلعون حركة كلوبهم
اخذت ملابسي ومنشفتي وطلعت ادور على حمام لكيت ريان يلعب بلسيارة مالته يصعدهة على الدرج بتسمت على حركاته الطفولية
وهج/ريان حبيبي
ريان/ها
وهج/حبيبي هم تعرف هنا اكو حمام
ريان/اي
وهج/وين يكلبي
ريان/تعالي وياية
كام من الكاع وخر شعره عن كصته لان شعره ناعم وطويل اجة لزم اصبعي الخنصر وجرني ويا للحمام بسته من خده كتله يروح يرجع يلعب
سبحت بسرعة خاف يصحوني طلعت من الحمام المنشفة ملفوفة على راسي
دا ارجع للمخزن طلع امجد من الغرفة جمدت بعد ماكو حركة بجسمي مدري شبية هو باوعلي بعصبية بدة ياكلني بعيونه بس اريد اعرف المرحوم شلون جان عايش وية هاي العائلة كلهم يخوفون ماعدى فاطمة وعمو ابو امجد
رجعت للمخزن شمرت المنشفة بلكاع المخزن بااارد اجتي قشعريرة بجسمي رحت للجنطة مالتي طلعت المشط مالتي بسرعة مشطت بس اريد اخلص حتى انزل ماريد اسمع حجي يغثني كبال النسوان او يسمعن احد ياذيني بكلامه
سويت شعري كبة حطيت الكب مال الشال على راسي شوية يدفي اذاناتي وفوكاه شال سويته شوية عدل وشوية مخربط حتى مايكولون تتشيك بفاتحة ابنة والله صرت احسبلهم الف حساب وهاي اني ما صارلي يومين
نزلت جوة اشوف النسوان الي كاعدات بباب الصالة يباوعلي صفح ونظرات عيونهن علية باوعت للجهة اليسرة لكيت بنات شابات بكصتي يباوعن علية ويتمنن يموتني هلة هلة اني وين جاية؟ لمركز سفاحين هههه
نزلت راسي رحت للمطبخ طلعت صينية من الكاونتر حطيتهة على الميز دا اطلع من المجمدة كلاصات المي سفطت كلاصات المي بلصواني وحطيت قوري المي الحار وقوري الجاي على النار يتهدرن حتى من يريدن جاي اكون محظرة كلشي وما اتاخر
اجتي فاطمة ابنهة واكعة على ايده الجكارة مال الملاية
وهج/ياعيني حبيب سلامات
فاطمة/اني اول مرة اشوف ملاية تدخن
وهج/يلة حبي ميخالف روحي للمجلس النسوان يستفكدنج اني يم ريان
فاطمة/الله يخليج بعد كلبي...يلة ماما كافي بجي يروحي هاي عمة وهج وياك
وهج/هو سبع وبطل شنو بجي شنو دموع
ريان ببجي/تووجعني اااهئ
وهج/يا عمرري راحت ولت بعد ما ترجعلك
ريان/بس بعدهة توجعني اريد ماما
وهج/شوف عدي وصفة كلش حلوة تخلي الالم يروح تريد احطلك؟
ريان/ايي
وهج/يلة نكوم نحطهة
شلته وكمت من على الكرسي وديته للحمام لكيت معجون اسنان حطيته على الغسالة مال الملابس اخذت جف ايده بايدي حطيتله شوية لان مو كلش محروك بس لان طفل يخاف منهة ويبجي
وهج/ها راح
ريان/شوية
وهج/مو كتلك يروح
ريان/شكرا عمة
وهج/بعد عماتي كلهن
لزمت خدوده بستهن احب الاطفال احسهم هدية من رب العالمين كائنات لطيفة تلطف حياتنة
