فتحت عيني بكسل اووف هاي اني وين؟
كمت من مكاني بنعاس اتطوطح بنص الغرفة وكانه وحدة سكرانة
وخرت كفشتي عن وجهي لميت شعري بايدية نصيت بلكاع يم مخدتي اخذت الكتر مال شعري لفيته بدون ما امشطه سويته ظفيرة مخربطة اني هستوني كاعدة من النوم ويني وين التسريحات صحيح اني اميرة بس النومة بعدهة بعيوني
طلعت من المخزن فركت عيوني واني بباب المخزن اليوم الثالث ياربي خلاصك من هل العذاب ماريد حياة الاميرة ....الله ياخذجن يعسل وام ايوب اموووت منجن
نزلت جوة لكيت عمي كاعد
وهج/صباح الخير عمي
ابو امجد/هلة عمي صباح النور بنيتي شمكعدج من هسة بعد وقت
وهج/عمو هذة وقتي الي اكدر بي حتى اخلص شغلي من وقت
ابو امجد/الله يقوي عودج يا بوية
وهج/جوعان
ابو امجد/خلي يكعدون ونتريك كلحنة
وهج/براحتك
رحت لسلة الملابس طلعت ملابس امجد وملابس الباقين عفتهن بلكاع كبال باب الحمامات كفيت رداني ورحت اغسل وجهي فركته فرك نفشت وجهي بلمنشلة الي حاطيهة يم المغسلة
رحت للملابس شلتهن من الكاع اخذتهن ورحت اغسلهن
طلعت بلطارمة ماكدر افتح الغسالة لان بعدهم نايمين ومبين عمتي ماترضة ومابية حيل طلايبهم
رجعت للمطبخ طلعت علبة التايت من الكاونتر ورحت اغسلهن المي يلسع من البرودة اباوع على ادية صارن خشبات وحمرررر ياربي مو كلهة تلمهة علية خلي باب رحمة ينزل علية رحمتك
اغسل بيهن وبكلبي الف حسرة منهة على امي واختي الي ماعرف شنو اخبارهن واوضاعهن ببيت عمي الحقير ومنهة على حياتي وية امجد وامه وحياة الجديدة وشلون رح اكمل هل السنة ومنهة محرومة من راحتي ونومة عيني ودراستي ومستقبلي واحلامي يعني مارح اكدر اصير محامية حتى اطلع ابوية من السجن ومنهة تركت اختي وحيدهة بلسادس يارب لتخلي شهد تتصرف بعقل فارغ خليهة تهدء عاد على الاقل هية تكمل مستقبلهة بدال عني
باوعت لاصابيعي عليهن وغف التايت نفخت عليهن راح الوغف طلع دم من اصبعي هاي منين اجة هل الدم بسم الله؟!
بسرعة فتحت الولة غسلت ادية ماكو احساس بيهن وهذة اصبعي ينكط دم على الملابس حطيت ابهاي على الجرح بدة يحركني بس مو هذاك الكد احس بي لان من البرد خدرانات يابوية بدة يحركني بعد اكثر لان نحبس الدم
رحت غسلت ادية وكملت غسلهن شسويلك ظل طلع دم مو وقتك
شطفت الملابس وصلت لبنطرون امجد لكيت الحزام مالته مشعفر يمكن هو الي جرحني اوي حتى غراضه مثله وجعع
شلت الملابس ورحت شريتهن بغير جهة حتى من يجن النسوان للمجلس ما يشوفن الملابس
رجعت لمكان الي غسلت بي ملابس شلت علبة التايت ورحت للمطبخ لكيت فاطمة واكفة تسوي ريوك لك شكد بت اوادم بتسمتلهة اشرتلي بحواجبهة انو اروح نتبهت على نفسي نزلت ملابسي بسرعة عيب شوية ادب
