علاقات زائفة

البارت الثاني عشر

بنان تكول

انا من اصحاب الغيرة الهادئة

اقيم بداخلي مليون حرب صامتة

ومليون حريق 🔥

وعندما التقيك ابتسم وكأن لم يحدث شيء...
______

بنان : بمنو احلفك وتحجيلي ، زين عوفك لتحجي ، بس كلي شوكت حبني هو وليش اختارني اني بالذات ..

عمر : راح احجيلج حت كلبج يرتاح ..

بنان : ياريت واكون ممنونه منك ..

عمر : دحجي ( باوعي) بويه ، بالبداية من جيتو وصارت الكونة تذكرين ..

بنان : اي اتذكر .

عمر : بيومها تراهن صميم عليج ، كال هذا خشمها العالي اله اكسرو ...
حاجيتو وكتلو ما يجوز اللي تسويه ، بنات العالم مو لعبة ، تحب وحده تعوفها تحب الخ ...

كالي انه لا احب هساع ولا بعدين ، انه اتونس وبس ..

عفتو ما حاجيتو ، اكثر البنات اللي يصادقهن ، هنه رايدات لعب ، لهذا السبب انه ما احجي ولا اتدخل ...

صادق اشكال الوان من وحده لوحده ...

فد من شافج عجبتيه ...

هنا صميم حطج براسو ..

بده يلاحكج من مكان لثاني ، مثل منكول تفرغ الج ...

عاف دروسو وصحبانو ..

لهنا تمام ..

بنان : تمام كمل ..

يحجي واني شنو كلبي يتكطع افور بداخلي ..

عمر : بيوم جنتي تقرين الصبح واجاج جايب اكل وياه ...وكعد يمج ..

بنان : اي اتذكر .

عمر : بيومها انتي ما نطيتيه مجال ، وجنت انه واكفلو فد ليغاد عنكم ..

بنان : اي شفتك كعدت يمه من اني كمت وحاجاك وضحكت ..

عمر : صح كتلو هاا حرمه ترزلو لصميم ..

هو كال افه عليك انه حرمه تعصيني اجيبها اجيبها ، ضحكت بوكتها لان عرفتج انتي مو من هالنوع وراح تعبينو ...

بنان : انت شنو جان موقفك من الصار ؟؟؟

عمر : ماراضي .

بنان : شلون مراضي وانت وياه وياه وحتى للزوراء لحكتونه ، وهنا بالمجمع هم ...

عمر : صميم صاحبي من احنه وصغار ، ولد ديره وحده ، وصرنه بجامعه وحده ، صح هو غلطان فد مو معانتو اتركو ، لو اتدخل بتصرفاتو ، هو جبير وفاهم ويعرف اليضرو من الينفعو ...

لهذا تشوفيني وياه دوم ، بالنسبه لروحتي للزوراء ، انه هذا مو ثوبي ولا من اطباعي ، فد جيت حت امنعه يتهور وياكم ...

بنان : وتريد افسر كلامك خوف علينه لو شنو ؟؟

عمر : انه عندي خوات ، واخاف لا بيوم الله يعابيني بيهن وساعتها اموت ما اتحمل ، واللي ما ارضاه لخواتي ما ارضاه لبنات الناس...