علاقات زائفة

البارت التاسع والثلاثون

العتب يا سادة اهتمام

والصمت بداية انسحاب

__________

سلمنه على عيالي و ودعتهم ، دمعت عيوني لان تعودت عليهم عمه هدى تخبل وعمو موسى وجراح ومسرة وحنى ، كلهم احبهم ويحبوني ، ومرات من يجون البنات زها وعسجد ، كلش نتونس ، تمنيت همه قريبين يمي بغداد جان عشت وياهم وبنصهم ، مستحيل افكر اعزل عنهم ، هلكد ما نفسهم طيبه ويحبوني ..

مرات الانسان يحب بشر ويتعلق بيه من كلمة وحده ، يعني مو اله يسويله معجزات ، واني ب ابتسامه وحده احب الشخص ويدخل لكلبي ، وبسرعه أأمن بيه وابدي احجيله ، ادق تفاصيلي ، مشكلتي اني كتاب مفتوح لمن هب ودب يدخل يتصفح ب اوراقي براحته وياخذ المفيد ويفوت ، شكد تنصحني حور وحتى روند انو ما احجي لاحد ولا أأمن بأي شخص ، اله مقرب مني كلش وكون مختبرته قبل ، واعرفه امين جيد لصندوق اسراري ، كل انسان عنده اسرار بحياته حتى لو جان مرتاح وماعنده مشاكل لابد عنده سر مخبيه على صفحه بخانه الذكريات وساد عليه الباب ، اله اني
اسر العزيز ولكل عزيز عزيز وهيج ضاع سري ..

وهاي الصفه اللي سببتلي مشاكل كلش هواي بحياتي وصلتني لحد القتل !!!!!!

طيبه قلبي وحبي للناس وبياض داخلي ربي ينجيني بكل مرة اعثر بيها ، لكن كل مرة تسلم الجرة اكيد لا ، كثر تكرار الخطأ يولد مشاكل ونزاعات
واني ما اتعض اكوم من خطأ وارد اوكع ب اكبر منه ..

اني انسانة عاطفتي تتغلب على صفاتي الباقيه
شخصيه معطاء لابعد الحدود ..

اسامح بسهوله ، زعلي قصير وابدآ ما اطول الزعل

اذا الشخص اذاني ودمر جزء من كلبي

ب ابتسامه وحده منه ، ارجع وياه مثل قبل واحسن بعد ..

وانسى اسائته

سواء حبيب صديقه اخت اي كان ....

كل انسان عنده اخطاء لكن خطأ عن خطأ يختلف ..

الاخطاء الها درجات ، واني ابلغ اعلى انواع الخطأ، من هاي الناحيه...

اليوم احجيلكم اول خطأ بحياتي مريت بيه ..

هو دست كرامتي وسامحت زوجي ، مجرد شفته تعبان
ومهموم ، رحت وحاوطته بروحي وبقلبي قدمتله انواع الاهتمام في سبيل ترجع اله راحته وما اسلبهة منه بالنكد والزعل وتالي بيش جازاني ؟؟؟؟؟..

اني انسانه ضحوكه ، ابد ما احب لا انكد على الانسان الي عايش ويايه ولا اطول بزعلي وياه ، هاي اني وهاي تركيبتي ..

الخلل وين بتربيتي بنشأتي ، بعيشتي بمحيط هادئ ومملوء بالحب والتضحيه والتكاتف الاجتماعي ..

حبيت جو الاسري اللي بيت اهلي انقله لبيتي ..

علمود من يصيرون عندي اطفال يربون بجو كله حب وامان واستقرار نفسي وعقلاني ..