علاقات زائفة

البارت الثامن والعشرون

حسن يكول 😭

ياليل الخميس احاه .. ها ياليلة الحنة
باچر تعب السنين برمشة عين اضيعنة
باچر وحشة؟ باچر حج ؟!
باچر وين بالي يهج؟
ذهب غيري حله بيمناك ؟!! عسى باليسرة يتهنة

______💔

الى من اكملت نصف دينها بقتلي.....

حيرة اتذكرج لو ابقة ناسيج
لا شنساج فني
شغمض عيني اذا اشوفج تضحكين
واذا اذني تسمعج افكس اذني ....
بنالج بيت حتة ويا تكعدين
وانة بالنجف بكبري ابني ....

______💔

من وصلت لبابهم واسمع هلاهل
هزهزولي الروح سعغه
"هاي الرادها وهاي التمناها"
جان ولفج شعره ليل ومن سمعها
تمرغل بمصباح زلفه...

_____💔

الاخرس...والعثر... والطاح والماشاف
ودموع المفارك... واليحب سكته
واحساس المذله وحسرة المسجون
هذن كلهن شفتهن من ازوجت انته

_____💔

ربت بية علة وهسة ربت بيت

_____

صميم يكول

حبني وشيل كل غربة على عيوني

حبني وخلهن يرجعن

حيلي

وضحكتي

ولوني ...

________❤

رحت ايفاد ، دزوني الجريده ، اني والفريق ، تحت اشرافي ، والكل استاذ صميم واستاذ صميم ، واني اوجه ، حمل الايفاد صار عليه كله، مخبوص اول مرة اخوض هيج تجربة وردت اثبت نجاحي بجدارة ...

صار مؤتمر صحفي بأحدى الدول ، وجان لازم اتواجد بيه اني والفريق ونسجل معلومات اول بأول با اعتبارنه صحفيين تابعين للجريده ، وبشغلنه تنافس قوي البقاء للأجدر ولصاحب الموهبه بجلب الاخبار الصحيحة وبصورة اسرع، لان بزمن الانترنت الخبر يطش خلال ثانيه بضغطة زر ، ويروح التعب كله ، لهذا جنت مركز وباذل كل جهدي بعملي ...

كاعد بالقاعه وهدوء تام ، والكل يستمع بأنصات للمتحدث ، اللي واقف بدايه القاعه الخاصه بالمؤتمر ...

ادون ملاحضات وبنفس الوقت اسجل الكلام بجهاز تسجيل للصوت حتى اذا فاتتني معلومه ، ارجع اسمع واسجلها ...

دك تلفوني جنت خاله وضع صامت ، تكرر الاتصال اكثر من مرة استأذنت من زميلي وكتله ياخذ مكاني ويسجل، طلعت ارد على المكالمه ، وصلت باب القاعه انتهت الرنه وردت ارجع ، دك مرة ثانيه ، طلعت جاوبت ..رقم من العراق ، منو هذا ؟؟ اني جهازي جديد لان القديم ضاع مني بالمطار والارقام كلها راحت ...

صميم : الو منو ؟؟

عمر : شنو نسيتني يالوصخ ...

صميم : لك ها كلب شلونك مشتاقلك يول ..