علاقات زائفة

البارت الخامس والخمسون

بنان

شفتها تبجي مردت كلبي مرد ذبيت بنان من حضني وكمت الها جريتها من ايدها وكعدتها .وكعدت ..

بنان : تعاي انتي شنو سالفتج ليش تريدين تفرطين بزوجج لوحده غيرج وين اكو وحده تسوي سوايتج ترة هذا موت بطيء تعرفين لو لا سواء روند او غيرها شلون تقبلين وحده تشاركج بزوجج ..

مسرة : تعبت من الملامة تخيلي عمو موسى جان ويايه وميقبل احد يحجي بهذا الموضوع علمود ليجرح مشاعري ذاك اليوم هو فتح الموضوع يكلي عبر ال ٣٥ شوكت يشوف جهالو هم حقو ومن هالحجي ، مرات اسمعو يحجي وي جراح ، قبل جان يعارك ويصيح هسا صاير يسكت من يحاجوه يعني شنو بنان معناتو يريد طفل يشيل اسمو ، نوبات يسرح بتفكيرو واحجي وبالو مو وياي ، انتظر لحد ما يجيب ابنو ويدخلو عليه ويكلي يابه انه تزوجت وخارج البيت حت ما اجرح مشاعرج ، بنان انه اريد ازوجه بنيه واحجي وياها وافهمها شعوري بلكت روند تفهمني وتقدر وضعي وتخاف الله بيه ..

كمت ابجي مكدرت احجي كلمه كلامها زرف كلبي مجرد سمعته منها متحملت شلون اذا عشته الله ليكولها يمكن ساعتها اموت ما اتحمل ..

بنان : يعني هسه تريدين اروح احجي وياها..

مسحت دموعها وهزت راسها ب اي ..

بنان : مسرة انتي مجرد تحجين بالسالفه متي بجي شلون اذا صارت صدك..

مسرة : ادعي الله الصبر ..

بنان : هذا رجلج وتحبيه شلون تكدرين فكري بعد فدوة .

مسرة : هو لان رجلي واحبه اريد يصير عندو ضنه ويفرح.

بنان : عفيه انتي هم اكو مثلج بالدنيا ما اتصور والله .

مسرة : هسه شوكت تروحين..

بنان : بس يجي صميم اصبله غده واروح ..

مسرة : ياغده وراح يصير الغروب ..

بنان : هو اليوم يتأخر خابرني عدهم شغل مكثف ..

مسرة : لتتأخرين عليه ..

بنان : اللي يسمعج منتضره خبر يفرح كلبج ومهم ..

مسرة : بالنسبه الي مهم ..

بنان : الله يبرد كلبج ..

راحت واني ضليت الوب شلون بيه مسرة ورده متستاهل تنكسر هيج كسره وهلمره خلتني اني الواسطه واني اتخبل من سالفه اخطب لاحد واجمع راسين بالحلال ، لان بعدين كلشي يصير تنذب براسي واضل اكل بروحي ..

كمت نشفت شعري وشسورته  ،لان اول ماطلعت من الحمام اجتي مسرة ملحكت حتى امشط ، خليت مكياج وبدلت وانتضرت جيه صميم علمود نتغده سوة ، نزلت احضر بالغده خابرته ، كال نص ساعه واوصل ..

رحت يم عمتي كعدت لكيتها تخيط ..

بنان : شنو كاعد تخيطين ..

هدى: اليوم رحنه انه وعمج للسوك ولكيت قطع قماش حلوة وسعرها زين واشتريت كم قطعه النه والكم ولبيت جراح .