علاقات زائفة

البارت السابع والثلاثون

بنان

من بعد ما سديته من زهراء نمت والنومه نومه للمغرب..

كعدت غسلت ولفيت شالي ونزلت لكيت عمتي كاعده تقره قران وعمي يباوع اخبار رحت للمطبخ لكيت مسرة زوجه جراح وحنى اخت صميم ...

بنان : هلو بنات ..

التفتو الي وكالو هلو ب ابتسامة...

بنان : شنو دتسووون ..

مسرة :جراح وصميم وعمو رادو مشاوي على المنقله نطلع بالحديقه ، وجاي احضر بيهن اكصصه واملحه وهمه يشوون ...

بنان : اساعدج ..

مسرة : كيفج ..

نطتني سجينه وتخته وكعدت يمها بالكاع وبلشت اثرم اني بعمري مثارمه لحم للشوي كله ماما ومن تزوجت ممسويته ابد مرات اذا اشتهينه ناكل لو صميم يجيب لو نطلع نتعشى برة ..

انتبهتلي مسرة جان تكول ..

مسرة : ول بنان هذا ناعم حيل ، كبريه هذا يموع بالشيش ..

بنان : ها زين هسه اسوي اكبر ..

شوفتني الحجم الي هيه مسويته ، وكملت ثرم ، الناعم اخذته وخلته بماعون كالت تسويه كباب لباجر ....

كملنه واخذت الصينيه طلعتها بالحديقة ...

اجتي مسرة شعلت الفحم ، وعلكت البنكه عليه ...

خابرت جراح اجه ...

جراح : هله بنون شلونج يابه ..

بنان : هلو جراح الحمدلله انت شلونك ..

جراح : على الله يابه ، رجلج وينو ..

بنان: والله مادري جنت نايمه كعدت لكيته ماهو..

مسرة: بدل وطلع من العصر ..

جراح : خابرو خله يجي يشوي وياي مو فد ياكل ...

بنان : هسه اخابره ..

رحت جوة حتى اجيب الموبايل لكيت عمتي توها مكمله قران ...

بنان : قبل الله يمه ..

هدى : قبل الله اعمالج بنيتي ، شلونج نمتي زين ارتاحيتي ..

بنان : اي الحمدلله ...

موسى : وعمج ماله سلام ..

بنان : لا شلون انت الخير والبركه ، رحت وبست راسه ..

موسى : الله يبارك بيج بالله دوم بطاريج اكول زوجه صميم طيبه واصيله ..

بنان : شكرا عمو الله يحفظك النه يارب ..

موسى : يسلمج بنيتي ..

كمت صعدت فوك اخذت الموبايل ودكيت ميجاوب ، رجعنه للطناكير مال صميم ..

دكيت مرتين بالثالثه انغلق ..
ضجت عفت الموبايل ونزلت ..طلعت يمهم وكفت ، التفتلي جراح ..