علاقات زائفة

البارت الواحد والعشرون

بنان : شكو شبيج؟؟

روند: لج هذا الشيخ اللي بالأحلام ...

بنان : لج هذا جراح اخو صميم ...

روند : جذذذذذذذذب بستحيل ، صميم عنده هيج اخ يا ويلي الطم شسوي هسه ...

بنان : ههههه بستحيل شنو ، ولج مستحيل ...

روند : هسه على الحرف جلبتي ، دشوفي ربج شخالق ، فوكاها ميباوع على نعمه الله كبل فات جوة ...

بنان : وينها نعمه الله ؟؟

روند : لعد اني شنو ، مو نعمه ، لج دشوفي حتى حجل لابسه ....

بنان : طلعيه من بالج حبيبتي ...

روند : ليش بله بعد ما لكيته وصارلي سنين ادور على هيج واحد وفوكاها سني ، بربج تردين بسهوله اتخله...

بنان : يا جلبه ، وشبيهم جماعتنه وتردين سني ؟؟

روند : يا اختي مليت سنين مكابلتكم نفس الوجوه اريد اغير شو سامعه من صديقاتي السني يدلل زوجته ....

بنان : وهاي شعليها بهاي ، لج انتي براسج دماغ لو شنو

روند : معليه لو دليمي لو ماريد ...

بنان : لج ينشلع كلبج سأليني اني ..

روند: وشبيج عيوني شحلاتج تخبلين ، وصمصوم مدللج دلال ...

بنان : شنو الفايده واني خايفه منه ، وانام واكعد ، اكول راح يخوني ...

روند : يا بطرانه ، هو منو ميخون بهذا وكتج ، اذا مو كدامج بضهرج ...

بنان : لا بشرفج ...

روند : والله ...

بنان : كافي لج عيب من البنات نتهامس وهنه كاعدات ..

عسجد: بنونه شعرج يجنن ، شنو لونه ، اريدن اصبغ على السبعه لان ما الحك هساع ...

بنان : ماعرف شوفتلي كتلوك واختاريت اللون وردت تنثرلي عليه خصل خفيفه ...

عسجد : حبابه انتي ذوقج حلو جثير تجين وياي للصالون ..

بنان : ميخالف بس اشوف ماما وصميم اذا قبلو بعيوني تدللي ..

عسجد : قنعي امج وانه عليه صميم ...

بنان : هاهيه ههههه..

لهناك وصاحو علينه تعالو جوة ،

كمنه دخلنه والكل ملتم ، اللمه اللي تصير قبل ايام العرس ..

الاكثريه راحو ، ضلت كم وحده من اقاربهم ..

بس اللي ضوجني بهاي الكعده ، اكو وحده هواي تتودد لصميم ، كلش ضجت وهو عادي يضحك وياها ويتشاقه..

واني كاعده بزاويه صافنه عليه ...

ما اعرف افسر شخصيته ، هاي الي سنه مخطوبه ، مكاعد احزرة ، تعلقت بيه ومدا افهم مدى تعلقي ،و وين راح ينتهي بيه هذا التعلق ، اشهر قليله بس عبالك صار سنين احبه وهم ما اعرفه ، ضليت اراقبه بصمت،
بديت ارسم شخصيته واخليلها ملامح بس ملامحة مواضحه صعبه وممفهومه ، شخصيته مكاعد اكدر احللها ،حسيتها اقرب للسهل الممتنع ...