علاقات زائفة

البارات الثاني والاربعون

حور

عمر ضل غايب عن البيت يومين ، تخبلت شلون اوصله بأي طريقه اتطمن عليه ، ثالث يوم الصبح سمعت صوته ، كمزت من فراشي  نزلت اركض وصلت لاخر بايه انتبهت على نفسي لا حجاب لا لبس مستور رجعت صعدت ، لبست دشداشه وشال ونزلت ، لكيته متمدد على القنفه بالهول ، ركضت عليه وحضنته ممصدكه رجعلي ، شيسوي خلي يسوي اهم شي ميبتعد عن البيت ويتأذه ، هنا يزعل يكسر كلشي يسوي حقه وما الومه ولا ازعل ، مثل ما هو انتشلني من قذاره وتقبلني بكل ضروفي ، اني هم اتقبله بكل حالاته ..

حضنته مبدر منه اي رد فعل .همست .

حور : خوفتني عليك وين جنت ؟

عمر : رحت ادور عليه ..

رفعت راسي من صدره وكتله ..

حور : منو هو ؟؟

حور : اللي عندج علاقه بيه ؟؟

صفنت بوجها بهتت ..

حور : توقعتك رحت لأهلي ..

عمر : وشعندي وي المخانثه واروحلهم ..

حور : لعد على منو تدور .

عدل كعدته وحجه مخنزر ..

عمر : رحت للجامعه سألت عليج هناك ، بالقسم وبالنادي وبكل مكان ..

حور : وان شاء الله توصلت لشي يرضيك .

عمر : للأسف لا مثل مارحت مثل ما رجعت ..

حور : ماكو حل غير نروح للدكتورة .

عمر : انه شاك ب احتمالين ..

حور : شنو وشنو ..

عمر : يا اما انتي جاي تلعبين على اعصابي وتوهميني بأنج بريئة يا اما كلبج كوي وماخايفه حسبالج انه ما أأذيج واضل ساكت ..

تقرب ولزمني من فجي حيل ..

عمر : سمعي لج فد الكاه ، واعرفه منو ب اقرب جول اذبحج واطم عارج ..

حور : واذا طلعت مظلومه ؟ شنو تسوي ؟ اني هسه ناطيتك كل العذر واكول حقك ، بس لصبري حدود وكل بشر عنده طاقه تحمل ، واذا صبري نفذ وطاقتي خلصت ، ومن بعدها تعرف اني مظلومه ، اخليك تحفى وما ارجعلك ..

عمر : حلو والله وتهددين هم ؟؟

حور : لان واثقه من نفسي ممسويه غلط ولو غلطانه ما اطلب منك اروح دكتورة ..

عمر : زين يابه نروح العصر ونثبت صحه كلامج ..

حور : نروح هسه لو تحب .

عمر : من كاعدلج هساع .

كمت من يمه مشيت خطوتين ورجعت التفتتله ..

حور : اصبلك غده ؟؟

عمر : اي شي ماريد منج ، وماكو مكان يجمعني بيج الى ان تجين وتحجيلي الحقيقه ..