علاقات زائفة

البارت الواحد والخمسون

يومي الذي فقدت نفسي فيه

تمنيت دومآ وتأملت وحلمتُ برجوع حياتي القديمة
تمنيت الرجوع الى ذلك اليوم الذي فقدت نفسي فيه .
فقدت بنان فقدت الطفلة المدللة المحبة للحياة..

كلنا او اغلبنا تأتينا ايام نفقد انفسنا تماما ، متى ذلك ؟

حين نفقد شخصآ عزيزآ
حين تفقد ثقة المقربين اليك ..
حينما تحاول ارضاء الجميع على حساب نفسك ..
عندما تتعرض للخيانه وتغفر بدافع الحب ..
عندما تتعلق بشخص ما ويخذلك وبالتالي يقتلك ..
هذا الشعور مدمر للغاية تبدأ به بفقدان نفسك رويدآ رويدآ ، تتلاشى احلامك تقتل طموحاتك ، يكبر حزنك يومآ بعد يوم تفقد كرامتك وذاتك شيئا تلو شيء ،سوف تفقد اجزاء منك وتلاحظ كيف تتطاير في سماءك..
وفي النهايه تفقد نفسك تمامآ ..
ولكن بأستطاعتك ان تجد نفسك وان تلملم اشتاتك ..
ثق بأنك قادر على ان تفعل ذلك ، ويوما ما سوف تجد نفسك القديمه ، ممكن ب اتصال من محب او عودة للعائلة ، وارجاع الثقه ، حينها  ستعود لكن لن تكون ذات الشخص القديم ، ستكون اقوى واكثر حكمه من السابق ستكون الجديد الذي لا يضيع مرة اخرى ابدآ..

سوف اكون بنان القوية..

________

بنان

من بعد الصار وخلصنه من قمر الحيه وعرفت روند فاضحتها برد كلبي شويه وقررت ما انطيها حيز من تفكيري واطوي صفحتها للأبد ...

مرت الايام هادئة وحلوة نوعا ما اشتاق لأهلي هواي بس اللي مصبرني روند ، مرات تروح لبيت اهلي وتخابرني وتكعد بنصهم اضل اسمع اصواتهم وسوالفهم ابجي لحد ما ارتاح ، طمعت بكرم روند وطلبت منها تفتحلي كامرا وكامت تفتح بدون ميحسون عليها اول شي رفضت بس من شافت اصراري وتوسلي بيها قبلت ..

كمت اشوفهم بابا وماما متغيرين سوده عليه بابا مريض وضعفان ايده بيها كانونه ومرات اشوفه متمدد ومعلكيله مغذي ، سألت روند كالت حالته تتعب بين فتره وفتره ، عرفت بابا اللي سمعه مو هين عليه ولاكدر ينسى ولا يهضم الصار بسهوله لهذا تأذه وتمرض مثلي ، اني وبابا نفس الكلب ، ماما  شويه عدها قساوة واخوتي طالعين عليها اله بابا ابد واني مثله ...

بدت صحتي ترجع ونفسيتي تتحسن مجرد اسمع صوتهم ، حسيت نفسي رجعت عشت وياهم ، اسرح بخيالي انو اني كاعده يمهم واسولف بس اللي يلسع كلبي من اتمنى احضن بابا لو ماما وهمه بعيدين عليه حيل انقهر واتأذه ..

رجعتلي صحتي الحمدلله اكيد مو مثل قبل بس مقارنه بذيج الايام الفاتت خير وبركه ، رجعت علاقتنه احنه البنات مثل قبل وقوت اكثر ورجعت سوالفنه الحلوة وضحكنه صح كلنا مكسورات وكل وحده كسرتها شكل بس نحاول دائما وحده ترمم كسر الثانيه ، صرنه نضحك على جروحنه هيج تبلدت مشاعرنه ، بحيث نتذكر الجرح ونضحك عليه ونكول شلون جنه نبجي على هيج اشياء تافهة ..