Alpha Section

16. Batch Leader

-CEDRIC-

Isang panibagong araw na naman ang dumating sa paaralan ng Eastwood High. Gano'n pa rin naman, wala pa rin akong alam kung ano'ng powers meron ako, or kung meron nga talaga.

Humihikab-hikab pa akong umaakyat papunta sa'king first period class sa room 409 nang magkasalubong na naman kami ng best friend, I mean former best friend, kong si Andrew ng papaakyat na ako papunta sa ikatlong palapag ng gusali. Sa isang iglap lamang, nawala agad ang antok ko.

Naging tensyonado pa rin ang paligid sa pagitan naming dalawa habang papaakyat ako at pababa naman siya. Saglit lang kaming nagkatinginan, pero gano'n pa rin ang tingin niya sa'kin, 'yung tipong balak akong patayin sa kanyang mga matatalim na titig.

Napakibit-balikat na lang ako tsaka nag-iwas ng tingin at nagtuluy-tuloy sa pag-akyat. Aaminin kong nami-miss ko na ang dating best friend ko, 'yung mga kulitan namin, 'yung mga gala namin, at marami pang ibang mga bagay na madalas naming gawin simula pagkabata.

Subalit wala na yata akong magagawa kung ayaw niya na akong kausapin, or kung ayaw niya nang makipagbati. Hindi ko naman alam na ang pagkapasok ko rito sa Alpha Section ang tuluyang sisira sa aming ilang taong pagkakaibigan.

"CEDRIC, mah men!"

Halos mapatalon naman ako rito sa'king kinatatayuan ng papaakyat na sana ako muli papuntang ikaapat na palapag ng may biglang umakbay sa'kin mula sa likod. Hindi ko na kailangan lingunin para malaman kung sino itong siraulong biglang sumulpot na parang kabute, halata na kasi sa energetic nitong boses eh

"Mitch naman eh, balak mo ba akong patayin sa gulat ha?" sita ko rito sabay alis ng kanyang kamay na nakaakbay sa'kin.

"Grabe, patay agad? Hindi pwedeng mao-ospital ka muna?"

Sinamaan ko lang ng tingin itong siraulo kong kaklase pagkatapos ay nagtuluy-tuloy lang ako sa paglalakad paakyat sa ikaapat na palapag. Naramdaman ko namang nakasunod sa gilid ko itong si Mitch.

"Sa tingin ko alam ko na kung ano ang property ko." rinig kong sambit ng kasama ko

Saglit akong napahinto sa paglalakad at seryosong napatingin sa'king kasama. Naku kung 'pag nagkataon, maiiwan na lang akong mag-isang walang alam sa kanyang property.

"'Di nga?" 'Di makapaniwala kong sambit.

"Oo nga kasi... Ito ha, sa tingin ko... 'yung property ko ay..." Muntik pa akong mapa-roll eyes sa pabitin effect niya.

Kita ko 'yung isang daliri niya na siyang sumesenyas sa'kin na lumapit sa kanya, kaya 'yun nga ang ginawa ko. Inilapit ko ng konti ang aking sarili sa kanya at matiyagang naghintay sa kung anumang kanyang sasabihin.

"ITSAAAAAAAPPPRRAAANNNNKKKKK!" Ay anak ng lahat ng animal sa mundo! Akala ko seryoso talaga 'tong loko-loko na ito.

Tumakbo naman ang loko ng mapansin niya yata ang nangingitim kong aura na para bang handa na'kong pumatay ng kahit ano'ng oras... specifically sa mga siraulong gaya niya.

"Hoy bumalik ka ritooooo! Humanda ka sa'kin!" Hinabol ko 'yung loko-lokong ito pero mabilis naman tumakbo ang lintik at agad na nakalayo mula sa'kin.

Humanda talaga ito kapag nakapasok na kami sa loob ng classroom. Baka nakakalimutan niyang magkatabi kami ng upuan?

Saktong naghahabulan kami sa ikaapat na palapag ng makasalubong namin si Kylie na papunta rin sa aming classroom. Agad naman kaming napahinto sa paghahabulan at lumapit sa kanya.

"Good morning. Anyare sa inyo at bakit kayo naghahabulan na parang isang couple?" tanong ni Kylie sabay tingin sa'min na para bang nanunudyo. The heck???