သဏ္ဍာန်ဆန်း

P_44_Ending (U)

အကြောင်းပြချက် မယ်မယ်ရရ မရှိဘဲ Norwayကို သူစေလွှတ်ခံရ၏။ ပြီးတော့ သွားခိုင်းသည့် နေရာကလည်း Norway ရဲ့ မြို့တော် Oslo ကိုပဲ မဟုတ်။ မြောက်ဘက်ပိုင်း ကျွန်းစုဖြစ်တဲ့ Lofotan အထိ။ ဒီလောက် ဝေးလံတဲ့ အစွန်အဖျားထိ လာရောက်ခဲ့ရတဲ့ စီးပွားရေး ပရောဂျက်က ဘယ်လိုအရာများ ဖြစ်နေမည်လဲ။
ဘာတစ်ခုမှ ရေရေရာရာ မသိဘဲနဲ့ သူဒီအထိ ရောက်တော့ ရောက်လာခဲ့ပါသည်။ လမ်းခရီးတလျောက် မြင်လာခဲ့ရသမျှ သဘာဝတရားတွေက  အေးအေးချမ်းချမ်း သာသာယာယာ ရင်သပ်ရှုမောစရာတွေကြီးပင်။

စိမ်းစိုနေတဲ့ တောအုပ်တွေ၊ တောင်တန်းတွေမှာ ရေခဲနှင်းခဲတွေက တချို့တဝက်လွှမ်းလို့‌ပေါ့။ လမ်းတွေပေါ် အိမ်တွေပေါ်မှာလည်း ရှိပါ၏။ ဒါက အရှေ့ပိုင်းက အပူပိုင်းဒေသတွေနဲ့ မတူသော အငွေ့အသက်တွေပါပဲ။ တောင်တန်းတွေ အကြားမှာ ရေပြင်ကျယ်ပြာပြာတွေက လည်း အပြည့်။ သေသပ်လှပစွာ ဆောက်လုပ်ထားတဲ့ ဥရောပလက်ရာ အိမ်ပုံစံလေးတွေကလည်း နောက်ခံရှု့ခင်းတွေနှင့် အတော်လိုက်ဖက်နေခဲ့သည်။

Lofotan ဆိုတာက Norwayရဲ့ မြောက်ပိုင်းမှာ တည်ရှိတဲ့ ကျွန်းစုလေးတွေ ဖြစ်သည်။
ငါးဖမ်းတံငါရွာလေးတွေ အမြောက်အများလည်း ရှိပါသည်။ Norway နိုင်ငံရဲ့ အလှအပဆုံး နေရာတွေထဲက အထင်ကရနေရာ တစ်ခုဆိုလည်း မမှား။ Northern lights တွေကို ကြည့်ဖို့ ရှု့ခင်းအလှဆုံးတွေထဲက နာမည်အကြီးဆုံး ဖြစ်တဲ့ ကမ္ဘာကျော် အရပ်ဒေသလေးတစ်ခုဟု သူသိထားသည်။

ဒါပေမယ့် အခုသူက အလုပ်ကိစ္စနဲ့ အစီအစဉ်မရှိဘဲ ထလာခဲ့ရတာပါ။ Northern lights တွေကို မြင်ရဖို့ မမြင်ရဖို့က မသေချာ မရေရာနိုင်ပေ။ အလင်းတန်းတွေ ဖြစ်ပေါ်လာမယ့် အချိန်အား တွက်ချက်ခန့်မှန်းပြီးမှ လာကြည့်ကြရတဲ့ Northern lightsတွေကို သူက မြင်တွေ့ရနိုင်ပါ့မလား။ သဘာဝတရားကြီးနဲ့ ပတ်သက်တဲ့ သူ့ရဲ့ အိပ်မက်တစ်ခုဟာ နေရာအတိအကျ ရောက်လာခဲ့ပေမယ့် အချိန်လွဲနေခဲ့သည်။ ကြိုတင်ပြင်ဆင်ထားမှု ဘာတစ်ခုမှ သူ့မှာ မရှိခဲ့။ ကံကောင်းရင်တော့ အံ့ဖွယ်သဘာဝတရားတွေ ဖြစ်တဲ့ ဥတ္တရအလင်းတန်းတွေကို သူမြင်ချင်မိပါသည်။
ကံများ ကောင်းလွန်းခဲ့မည် ဆိုပါလျင်။