Insan bhi kitne ajeeb jazbaton ke bhanwar me ghoomta rehta hai na ?...kitni ajeeb hoti hai uske zindagi ki karwate, uske badalte mijaz ke mausam ?!
Kabhi maazi ki yaaden use paaon me bandhi baisakhi ki manind lagti hai, Zanjeeron ki tarah mano maazi ki yaaden uske wajood ko jakad leti hai aur wo usse bhagne me apni puri taqat laga deta hai. Aur kabhi...kabhi wo bahot taweel safar tay karke mustaqbil ki dehleez ko chhoo leta hai..lekin wahanse phir palatkar unhi mazi ki yaadon ko taaza karneme maze talash karta hai.
Kabhi haal se peechha chhudane jaddojahad me jut jaata hai to kabhi haal ke maazi banne ke khayal se hi khaufzada ho jaata hai. Mustaqbil ke aane ke khwaab, khwahishat ke mehal tameer karta rehta hai aur jab mustaqbil baahen phailakar saamne khada ho to wo mehal use makabare nazar aate hai. Apne jazbaton ke, apne waqt ke, apne un guzare hue lamhat ke, apni tamaam umr ke qurban hue manzaro ke makabare.
DarAsal insaan aajtak khud samajh nahi paaya ke wo chahta kya hai. Shayad hi wo itna mazboot, saabir aur hausalamand kabhi bana ho , jo apne maazi ke afsane ko lifaafon me band karke apne sandook me rakhe. Aur poorsukoon apna haal jiye. Aur jab mustaqbil dikhe to ranj o ghum bhulakar, saari kasak mitakar use gale lagaye, aur phir kabhi palatkar na dekhe.
Allahu Akbar!
That was my first ever passage in Urdu. I’m surely going to write Urdu some more. Its just soulful to even think in Urdu. MashaAllah !
