لعنة أسيف

الـحـلـقـة الـسـابـعـة والـعـشـرون

بهتت ملامح الجميع بعد ماتفوهت تلك الشقراء بكلمات ستسبب مشكله جديده داخل منزلهم ...

حدجمها بتحذير ان لاتكمل باقي حديثه لكنها وببساطة ردت له النظرات بأخرى متحديه...

تمتمت بابتسامه لعوب وعينيها مثبته على ابن عمها : بجد براڤو عليك يا "أسيف"، عرفت ازاي تحل المشكله وتنقذ سمعه مراتك اللي بقت زي اللبانه في بؤ الناس !.

تمتمت "ليلى" بحذر: قصدك ايه؟.

اجابت بذهول مصطنع: ايه دا، هو "أسيف" مقلكيش على اللي حصل، تؤ تؤ تؤ، ياحرام ينفع كده، معقول متعرفيش؟.

وزعت انظارها بين زوجها وتلك الشقراء لتردد: يقولي ايه، مش فاهمه؟.

اجابتها بابتسامة عريضه: واضح انك متعرفيش فعلاً، خلاص مش مشكله انا هقولك، امبارح...

_ ســـــــــــابــــــيـــــــــن!!.

هدر بها "أسيف" بصوت اجفل الجميع ما عداها هي، بل كانت تناظره بتحدي سافر...

تمتم بتحذير خطير: اسكتي وخلي يومك يعدي على خير!.

التوت ابتسامتها بمكر وهي ترد: بس انا مش عايزاه يعدي على خير، ايه رأيك بقى، البنت لازم تعرف كل اللي حصل؟.

_ في ايه يا "أسيف"؟.

هتفت بها" ليلى" بقلق كبير ليجيبها هو بحسم دون ان يزحزح نظراته عن الأخرى: مفيش ياحبيبتي، "سابين" افتكرت حاجه تافهه و....

قاطعته "سابين" بتبرم مزيف: اخص عليك يا "أسيف"، بقى شرف مراتك وسمعتها بقو حاجه تافهه كده!.

زج على اسنانه من تمرد تلك الشقراء عليه وتحديها له امام الجميع وكانها تخبره انها لا تخشاه مهما كان جبروته وقوته...

حتى انها لم تهتم لنظرات "رامز" وزوجته التحذيريه كي لا تكمل باقي حديثها، لكن وببساطه هي لم تكترث لهم...

تمتم "رامز" باستماته: "سابين" خلاص اسكتي!.

استطردت بحاجب مرفوع: الله في ايه، انتم مش عايزيني اتكلم ليه، هو انا هقول حاجه غلط، البنت لازم تعرف ايه الي حصل فيها امبارح...

_ "سابين" قولتلك اسكتي!.

همهم بها من بين اسنانه بغضب بدأ يشتعل داخله بسبب تلك المتمرده التي نظرت له ببرود مستفز...

انتبه الى صوت زوجته التي تساءلت بنبره مهتزه: "أسيف" بالله عليك قولي في ايه؟.

هم بالرد لكن الشقراء قاطعته: انتي بتسأليه ليه، قولتلك اسأليني انا وانا هجاوبك...

انتفضو جميعهم أثر تلك القبضه التي ضربت الطاوله امامهم بعنف كبير ادى الى اهتزاز جميع الأطباق الموضوعه فوقها...