اتصل على ابوه : يبه انتظرك بالمقهى الي قدام الفندق
هيثم : تعال ادخل للفندق
معتصم برفض : لا انتظرك في المقهى .
بعد ربع ساعه من الانتظار دخل ابوه .. استغرب انه جاي لحاله ووقف يسلم عليه: الحمدلله على السلامه
هيثم وهو يجلس : الله يسلمك ، اخبارك ؟
معتصم : بخير عايش الحمدلله وش الزياره المفاجئه هذي ؟
هيثم : مو مفاجئه معطيك خبر من فتره
هز راسه بتفهم ورفع يده مستدعي النادل ياخذ طلباتهم
هيثم : صاحبك ذا مطول عندك بشقه ؟ لاني جاي شغل ومابي اترك سما لحالها في الفندق ف ياليت تستعجل صاحبك ذا عشان يطلع
ناظر في ابوه لثواني : ليه جايه معك دام عندك شغل؟ ماقدر اقوله يطلع ثاني شي شقتي مفتوحه للكل يعني بأي وقت رح تشوفهم جالسين بشقه
هيثم : ليه انت فاتح لهم بيتك سبيل ؟ مافي خصوصيه عندك ؟
معتصم تجاهل اخر كلمات ابوه وجلس يشرب بالقهوه الي وصلت قبل ثواني بسيطه
هيثم : المهم قولهم ان اختك موجوده ولاحد يدخل شقتك الفتره الجايه
معتصم وهو يحس الضغط وصل مليون عنده : طيب الفندق آمن اكثر من الشقه على الاقل في هناك أمن و حراسه
هيثم : مارح اكون متواجد دايماً عندها على الاقل عندك يكون في احد عندها تجلس معه
معتصم وهو ماله حل ثاني غير الموافقه : طيب ثلاث ايام وخلي الانسه تشرف عندي
هيثم : ليه ثلاث ايام ؟ ليه مو اليوم؟
معتصم : يبه ! ثلاث ايام اضبط وضعي والبيت
هيثم : ثلاث ايام وياليت لو تستعجل وتخليها يومين
سكت وكمل شربه للقهوه ماعنده اي رد لابوه ومايقدر يرفض له طلب لانه بنهايه ابوه وهذا طبعه يحطك تحت الامر الواقع ويجبرك على الشي بس عشان نفسه وعشان يرضي ذاته .. دخل جواله بجيبه ووقف بعد مادفع الحساب : يلا يبه اشوفك بعدين
هيثم من غير اهتمام : مع السلامه .
مع بداية غروب الشمس اكتست السماء لونها القرمزي معلنه عن نهاية يوم مليئ بالاحداث الغير متوقعه ، رائحت القهوه المنتشره متداخله مع روائح المخابز ، رائحة لها لذه خاصه ! كانت معطيه شعور بدفئ رغم برودة الجو ، اخذ نفس عميق محاول يخفف من الحرقة الي بقلبه ، انه يكون مجبور ينصاع لكل كلمة يقولها ابوه حتى لو بعدم رضى منه وبعدم قناعه هذا شي يقهره ويحرق دمه ! ابوه جالس يكرر نفس المشهد لاكن المره هذي معه مو مع امه ! .. ركب السياره ونطلق لعند راكان هو الوحيد الي بيخفف عنه التراكمات الي يحس فيها ، دق عليه وماهي إلا ثواني حتى يرد راكان : هلا هلا متعصم
معتصم : هلابك ، فاضي؟
راكان : ايه فاضي تبي نتقابل؟
معتصم بضيق : ياليت ولله ، بس وين؟
راكان : تعال عندي بالبيت نجلس لاني تو راجع ومتجمد من البرد
معتصم : تمام خمس دقايق وكون عندك
راكان : ريان معك؟
معتصم الي كان ناسي امر ريان شهق بتذكر : ولله ناسيه تاركه في البيت من بداية العصر
راكان : اسحب على هالسحليه وتعال بس تلقاه نايم ولاهو داري عنك
معتصم بضحكه : تمام دقايق وكون عندك ..
___________________
شتاء طويل على وشك البدء على الجميع ، ببرودة طقسه و أجواءه المختلفه نسماته البارده ورائحة المطر الي ترافق اي غيمه ماره ورائحة الحطب الي ماتخلوا من اي بيت .. ، جالسات بالحوش وريحة الحطب مختلطه مع ريحة فوران الشاي ومليه المكان ، سحبت بريق الشاي عن النار وصبت كاسه لآمنه : سمي خالتي
آمنه وهي تاخذ كاسة الشاي : الله يسعدك ياندى على كثر ما داريني
كملت صب لإيلاف وهي مبتسمه
إيلاف وهي تشرب من الكاسه تكلمت بمتعه : الله زمان عن الطعم ذا !
آمنه : ايه ولله شاي الشتاء غيير
إيلاف بترجي : ماما الله يوفقك خلينا نروح للبر ! جالسه انتظر الشتاء عشان اجواء البر و النار
ندى : نايف امس كان هو وجواد في البر وطابخ لجواد بعد
إيلاف : رح اقول لابوي نطلع للبر نهاية الاسبوع كلنا
آمنه وهي تناظر للاجواء تكلمت بحسره : ياحسره مين كلنا ؟ انا وانتم ونايف وماهر واهله وابوكم ؟ الطلعه مالها طعم من غير الجمعه
ندى بتخفيف : خالتي ! مو ملين عينك حنا ؟
آمنه : ولله ملينها وشبعانه منكم بعد بس برضوا اشتاق لهم ! كانت اتمنى ازوجهم ونلتم كلنا بنهاية اسبوع مع بعض والبيت يمتلي بأصواتهم بدل مايكون بالهدوء هذا ،
إيلاف بحرقه على امها : ماما تراهم حولك ومالهم حجه بالقطيعه هذي ! اذا على المشاكل مع نفسهم انتهت ذيك المشكله بس كلهم يستهبلوا اذا هم حابين الوضع بكييييفهم لاتهتمي لهم
امنه كملت شرب الشاي وهي تستمع لإيلاف الي بدت تشتم خوانها بصوت واطي
التفتوا لباب الشارع الي فتح ودخل منه نايف الي تكلم مجرد ماشافهم : ماشاء الله جالسين هنا !!؟
ندى : ايه ولله تغيير
جلس جنب امه ورفع ايده وراها : اخباركم
آمنه : بخير الحمدلله
اخذ كاسة الشاي من ندى وركز : اخخخ ، شفيكم ؟
ندى : مافي شي
نايف وهو يأشر على إيلاف : الراديو شفيه ساكت ؟
ندى بضحكه : منفسه
نايف : ليه
إيلاف بعصبيه : اخوانك التافهين
نايف : ليه في شي صاير ؟
آمنه : مافي شي صاير ولله بس نسولف وتنرفزت
نايف لإيلاف : لاتتنرفزي ولاتحرقي اعصابك كلهم كبار وعارفين الصح من الخطأ
إيلاف وهي ترفع كتوفها : بكيفهم .
___________________
أنت تقرأ
لآذار صورةٌ أخرى من «الحنين» لآذار لغةٌ أخرى من النّبض.
Romanceقد يهدأ الطّقس الرّبيعيّ قبـل أن يغتال هدأته، وقد يرجئ وقـد البراكـين؛ حتّى تتمّ الولادة: ولادة السّكون الـمرعب، وألـمعيّة النّرجس، وأقـبية الوحدة، وكلّ السّنين الّتي شنقت أطيافها... ولادة فضاءٍ من الأمس الـمخمّر بالذّكريات، وبانتكاسات الـمواضي الـم...
