مددت يدها بتعب اخيراً خلصت المطبخ .. بتروح تاخذ دش وتجلس مع قهوتها تكمل قراءة .. هذي هي حياتها معه هدوء دائماً محتل البيت هو يا في المكتب حقه او في دوامه رغم انه صار له يومين مايداوم وهذا الي مقلقها وهي تشغل نفسها بترتيب البيت او تتابع وحالياً بعد ماعرفت انه مصاب بالاكتئاب بدأت تقرأ كتب تشخص الأكتئاب وكيف ممكن تتعامل معه.. طلعت لصاله ماشافته موجوده .. اكيد طلع او في المكتب حقه ..كملت مشيها طالعه للغرفه تتروش بس تفاجئت فيه نايم بالغرفه .....
بعد اكثر من نص ساعه طلعت من الحمام بانتعاش .. ناظرت لسرير شافته مازال بنفس وضعيته نايم ..
لبست وصلت المغرب بما انه الصلاه كانت منتهيه من فتره
ونزلت اخذت قهوتها وطلعت على الغرفه بما انها اكثر دفه من الصاله ، جلست على الكنبه وبدأت تقرأ .....
___________________
جلست جنبه : متى مسافر ؟
ماهر بانشغال وهو ويكتب على الكيبورد : احتمال يوم الثلاثاء ليه ؟
ليلى : محتاجه مصروف للعيال بطلع العصر اشتري لهم ملابس و محتاجه بعد مبلغ عشان بنت عمي ولدت وبجيب لها هديه
ماهر : تمام تكفي الف ؟
ليلى مسكت رقبتها : ماتصير الفين ؟
ماهر بابتسامه عشان مايزعلها : خذي الفين كم ليلى عندي انا ؟
ليلى ابتسمت : يعطيك العافيه ، تبي شي ؟ بروح اشوف محمد اذا نام او لا
ماهر : لاسلامتك ... مجرد ماطلعت تنهد بعمق مو مرتاح للمبالغ الي تسحبها يحس وراها بلى بس ساكت عشان عياله مايبي يصير شي ممكن يأثر عليهم رغم انه فاض فيه الصبر بس بيتحمل ...
رجع يشتغل بس رفع عينه وابتسم اول ماشافها واقفه عند الباب : تعالي
مشت عنده وجلست على حضنه : بابا رح تسافر ؟
ماهر وهو يبوس راسها : ايه يابابا مسافر يومين وراجع مارح اطول
ريتان : متى رح تيجي ؟
ماهر وهو يلعب بأصابعها : الخميس ان شاء الله
ريتان : متى يجي الخميس ؟
ماهر بضحكه : هممم يعني لمن حمودي يخلص مدرسه
ريتان : اهاآآآ يعني مارح تتأخر !
ماهر بضحكه : ايه
ريتان : طيب انا ابي انام عند جده آمنه و إيلاف
ماهر : خلاص انزلك تجلسي عندهم
ريتان : وحمودي ؟
ماهر : حمودي عنده مدرسه اذا خلص دوامه اخليه يجي مع ماما عندكم العصر حلو ؟
ريتان : ايه حلو ، التفتت عليه وقربت من وجهه وحطت كفوفها على فمها وهمست : جيب لي حاجه حلوه
ضحك على حركتها : وش تبين ؟
حطت اصبعها السبابه عند فمها بتفكير : همممم ، اييه صح ابي مكياج !
ماهر بدهشه : اف ! مكياج مره وحده !
ريتان وهي تمسح على خده بنعومه : اييه عشااان اذا رحت عند غاده وساره احط مكياج زي مامااا
باس عينها : تمام يلا روحي نامي زي حمود عشان اجيب لك مكياج
ردت له البوسه وتمددت على فخده : لا بنام عند بابا
ابتسم ومسح على راسها : نامي ، ورجع يكمل شغله ...
_________________
فتح عينه يناظر سقف الغرفه مايدري الساعه كم ولا يبي يدري اصلاً ، ينام ويقوم على أمل ان هالايام تمضي ويرجع طبيعي يرجع يحس بالي حوله يحس لسبب هو عايش فيه ، بس كالعاده يحس بس جسمه الصاحي اما عقله ووعيه بغيبوبه ، وكأنه جثه بلا روح تمشي على الارض ... مد يده لجهتها في السرير بس ماكانت موجوده ! ، قام بتثاقل وفتح النور وناظر في الغرفه بس ماكانت موجوده ... ، طلع من الغرفه مايدري ليه تخيل انها طلعت وتركته ؟ ابتسم بستهزاء من الافكار الي تجيه ونزل للصاله ، مشى داخل للمطبخ يدورها بس ماكانت موجوده ! وينها ؟ مسك راسه برعب وناده : نسمه ! مشى ركض طالع للغرفه وسحب جواله يدق عليها ، تركته ! وهو صار يخاف من الجلوس لحاله تروح تتركه بأصعب حالاته ! ، تكلم اول ماردت : وينك ؟
نسمه : قمت ؟ تعال فوق للسطح الجو يجنن
اول ماسمع صوتها تلاشت كل مخاوفه وتنهد براحة : تمام جاي
نسمه : ترا الجو بارد البس ثقيل
ابتسم : تمام
سكر معها ولبس جاكيته وطلع للسطح ، فتح الباب شافها جالسه
نسمه : صباح الخير
تقدم وجلس جنبها : صباح النور
نسمه بضحكه : احب نظامنا المخربط !
جواد : كنتي نايمه ؟
نسمه وهي تمد شالها على كتفه حتى تتلامس اكتافهم : نمت بعد العشاء وقمت ع الثنتين
جواد : والساعه كم الحين ؟
نسمه : اربع ونص ، تبي حليب ساخن ؟
جواد : عادي
صبت له حليب وحطت صحن الكوكيز قدامه : اليوم ١٤ الشهر طلعت اشوف القمر ، والجو بارد ويجنن حرام يروح علينا ... رغم اني ماحب الشتاء كثير
جواد : ليه ؟ الاغلب يفضل الشتاء على الصيف
نسمه : وماحب الصيف بعد ! احب الربيع .. ضحكت .. رغم ان الربيع مايجي عندنا بس شهر مارس يكون حلو الجو فيه فهذا ربيعنا !
اخذ نفس عمييق وصوت اقرب للهمس : آذار شهد معاناتي
نسمه بستغراب وماسمعت من جملته غير الاولى: آذار ؟
أنت تقرأ
لآذار صورةٌ أخرى من «الحنين» لآذار لغةٌ أخرى من النّبض.
Romanceقد يهدأ الطّقس الرّبيعيّ قبـل أن يغتال هدأته، وقد يرجئ وقـد البراكـين؛ حتّى تتمّ الولادة: ولادة السّكون الـمرعب، وألـمعيّة النّرجس، وأقـبية الوحدة، وكلّ السّنين الّتي شنقت أطيافها... ولادة فضاءٍ من الأمس الـمخمّر بالذّكريات، وبانتكاسات الـمواضي الـم...
