" ထွေး "
" ဟုတ်ကဲ့ အဘ "
" ညနေက အဘလာကြိုတုန်းက ပြန်ထွက်သွားတဲ့လူငယ်လေးက ဘယ်သူတုန်း "
လကလေးသာသာအောက် ကွစ်ပျစ်ကလေးဝယ် အကြမ်းအိုးတစ်အိုးက ကုန်လုပြီ။ နွေဦး၏ လေငွေ့နွေးနွေးများက ဘုန်းကြီးကျောင်း၏ ပရဝုဏ်အတွင်း ဝေ့ကာဝိုက်ကာ တိုက်ခတ်နေ၏။ တစ်ချို့လေအသုတ်များတွင်တော့ တမာရနံ့အချို့က ပါလာ၏။
" ဘေးက ရက်ကန်းရုံကပါ .. ကျုပ်ကိုပြောတာတော့ ပန်တျာကျောင်းကဆရာတဲ့ "
" နာမည်ကရော "
" တိမ်မိုးရောင်ပါတဲ့ "
" သိသလား "
" ဟင် "
" ထွေးကဘယ်သူလဲဆိုတာ သူသိသလား "
" မသိပါဘူး .. ကျုပ် မပြောပြမိဘူး အဘ "
" တကယ်လို့များ နောက်ဆုံဖြစ်ရင် ပြောပြလိုက်ပါ .. သူလည်း သိသင့်ပါတယ် "
" ဟုတ်ကဲ့ အဘ "
" သွားအိပ်ချေတော့ .. အဘ ကပ္ပိယကြီးတို့ဆီ သွားလိုက်ဦးမယ် "
အကြမ်းအိုးထည့်ရာ ဗန်းငယ်အားမကာ အဘကတော့ ကပ္ပိယကြီးတို့ အိပ်ရာ မီးဖိုဆောင်ဆီ သွားလေပြီ။ လေတစ်သုတ်သည် အေးစိမ့်လာ၏။ ကြည့်ရတာ ညနက်လာလေပြီ။
ဧည့်ဆောင်ဇရပ်ကြီးသည် အတော်ကျယ်ဝန်းသော်လည်း တံခါးရွက်ကြီးများပိတ်ကာထား၍ အတော်လေး လေလုံ၏။ ရတနာငါးပါးအား ဦးချကန်တော့ပြီးနောက် မို့ထူထူခေါင်းအုံထက် မှေးစက်မိတော့၏။
....................................
" ထွေးကလေး "
လှည့်ကြည့်မိလေတော့ ဆရာ။ ဆရာသည် လက်ထဲမှာ အိတ်တစ်ခုကိုင်လာလေ၏။ ထိုအိတ်ကလေးက ဘာများဖြစ်လေမလဲ သူတွေးနေမိသည်။ ဘာလို့တွေးသလဲဆိုတော့ ဆရာတစ်ယောက် သူ့ဆီလာလျှင်ဖြင့် မုန့်တစ်မျိုးစီယူလာတတ်လို့လေ။
ကလေးပီပီ မုန့်တော့ကြိုက်သား။ တစ်ဆယ့်ငါးနှစ်သည် မုန့်ကြိုက်တတ်သည့်အရွယ်ကလေးပါလေ။
" ဆရာ "
" ဒီနေ့ ကလေးတွေရော မတွေ့ပါလား "
VOUS LISEZ
အိုဘယ့်မှုံရွှေရည်(Completed)
Roman d'amourStart Date: Sep 22nd, 2020 End Date: May 21st, 2021 ဟိုးရှေးရှေးတုန်းက ဇာတ်သဘင်တစ်ခု ရှိသတဲ့။ တစ်ရက်တော့ ပိုင်ရှင် ဇာတ်ဆရာကြီးက ဆုံးပါးသွားလေတယ်။ အဲ့ဒါနဲ့ ဇာတ်ဆရာကြီးရဲ့ ညီဖြစ်သူက သူေဋ္ဌးတစ်ယောက်ကို ရောင်းလိုက်ပြီး ထွက်ပြေးသွားပါလေရောပေါ့ကွယ်။ သူေ...
