ဝန်ခံချစ်စကား ကြားပါရစေ ဝန္ခံခ်စ္စကား ၾကားပါရေစ ✅✅✅

အခန်း (၁၂)

Unicode - ပထမဆုံးသောလက်ဆောင်

* * *

'S' မြို့တော် လေယာဉ်ကွင်း -

Li QingYuan နှင့် Fang Yu တို့နှစ်ယောက် ခရီးဆောင်သေတ္တာများကို ဆွဲလျက်လျှောက်လာကြသည်။

"Mr. Li ၊ ခင်ဗျား ကုမ္ပဏီကို တကယ်လိုက်မလာတော့ဘူးလား။"

"အင်း၊ ငါအိမ်ပဲ တန်းပြန်မှာ။ အိပ်ရေးဝအောင် အနားယူဖို့လိုနေပြီ။"

သူ့စကားကြောင့် Fang Yu မနေနိုင်ဘဲ ထပ်မေးမိတော့သည်။

"ဒါပေမဲ့ နေ့လည်ကျရင် စာချုပ်ကိစ္စနဲ့ပတ်သက်ပြီးတော့ အစည်းအဝေးလုပ်မယ်လို့ Su ဥက္ကဌ ပြောထားတာရှိတယ်မဟုတ်လား။"

"အဲ့ဒါမင်းကိစ္စလေ။ ငါက တရားဥပဒေဆိုင်ရာ အကြံပေးအရာရှိပဲဆိုတော့ စာချုပ် ချုပ်ပြီးသွားတာနဲ့ ငါ့တာဝန်ပြီးသွားပြီလေ။"

"ဒါပေမဲ့ ဆွေးနွေးညှိနှိုင်းမှုတွေလုပ်တော့ ခင်ဗျားကိုယ်တိုင် ထဲထဲဝင်ဝင် ပါဝင်ခဲ့တာဆိုတော့ ဒီကိစ္စနဲ့ပတ်သက်လို့ ခင်ဗျားရဲ့ ထင်မြင်သုံးသပ်ချက်တွေကို ကုမ္ပဏီဘက်ကလည်း ကြားချင်နေမှာပေါ့။"

"ဟ... နေပါဦး၊ မင်းက ဘာလို့ အစည်းအဝေးသွားတက်မှာလဲ။ စာချုပ်ချုပ်တုန်းက မင်းမပါဘူးလေ။ တကယ်တော့ မင်းလည်း ငါ့လိုပဲ မင်းအိမ်ပြန်ချင်နေတာ မဟုတ်လား။

ဟူး... မင်း Su Hang ဆီမှာ ဒီလောက်နှစ်တွေအကြာကြီး အလုပ်လုပ်ပြီးတာတောင် အခုထိ သွက်လက်တက်ကြွနေသေးတာကိုတော့ လုံးဝလက်ဖျားခါတယ်။ အပတ်တိုင်း အလုပ်ခရီးသွားရတဲ့အပြင် အစည်းအဝေးတွေလည်း တက်ရသေးတဲ့ ငါတို့ဘဝကြီးကတော့ကွာ... အား။"

"ဒါက အလုပ်ပဲလေဗျာ။ ဟိုတစ်ခေါက်တုန်းက ဘောစ့် 'M' နိုင်ငံသွားတဲ့ခရီးစဉ်ကိုတောင် မှတ်မိသေးတယ်။ လေယာဉ်စီးတာတင် ဆယ့်သုံးနာရီကြာတယ်၊ ပြီးတော့လည်း နှစ်ညဆက်တိုက် မအိပ်ဘဲနဲ့ လေယာဉ်ပေါ်က ဆင်းတာနဲ့ချက်ချင်း ကုမ္ပဏီတန်းသွားပြီး အလုပ်ဆက်လုပ်ရတယ်လေ။"

"အေးကွာ... လက်ထပ်ပြီးတော့လည်း အလုပ်ကိစ္စနဲ့ ချက်ချင်းခရီးထွက်သွားသေးတယ်။ မင်း သူ့လုပ်ရပ်တွေကို နားလည်နိုင်သေးလားကွာ။"