#عكس_تيار✨
حلقه7
"ثاني يوم ف صبح
نضت خشيت دوشت وطلعت خاشه لدار لقيت أيهم يصكر ف سير امتاع ومزال مش لابس تيشرته قعدت نبحت فيه ومستكه برم عليا
أيهم..خشي توا نطلع انا
قعدت ساكته ونبحت بس
أيهم ابتسم ع جنب..خاطري نعرف ليش تنستهي هكي عموماً انا طالع بعد تلبسي تعالي نفطرو
طلع وصكر لباب وراه وانا قمعزت ع سرير قعدت نذكر ف شكله كيف جسمه مقسم وعريض قعدت مبتسمه ومغمضه عيوني نشم ف عطره ف دار
فطنت لروحي وصبيت طلعت سروال ابيض وبلوزه قصيره كلها وبر فوشي مايلا لموف مسحت شعري شويا وطلقته وبخيت عطري ودرت روج وطلعت
أيهم..باهي الي طلعتي
انا..طولت
أيهم..لا لا شن رايك
قمعزت ع طاوله قعد يرن تلفوني
أيهم..قصه شكلها تأ
انا بصوت واطي..افطر معش تراجيني
أيهم..اوكي براحتك خلاص انا سفره وانتي سفره وكان تبي توا ننقل دبشي لدار لآخر بيش معش يقعد ف بينا حكى بكل هذا شنو نظام يريحك
انا قعدت نبحت فيه كيف يحكي وعيوني ملينات دموع رمشت عيوني نزلن ع خدودي الدموع
انا بصوت واطي..كيف ماانت تحب ياايهم عادي
خذيت تلفون وخشيت لدار سمعته طبق باب بقوه
رديت
موده..خيرات
انا..خير
موده..شن جو
انا..ماشي كويسه
موده..صاير حاجه صاح امس ليل متاخر ماقدرتش نكلمك
انا..اها
موده..في حاجه
انا قعدت نحكيلها ع كلامه..معش عرفته انا كيف مره كويس ومره بمزاجه
موده..غير راجي بس انتي مزال ما شفتي شي منه هذا تاني يوم لكم باه شن رايك تقربي انتي منه شويا وتحكيله هكي
انا..لا لا مانبيش خليه يملح هو يجيني مش انا نجيه
موده..اممم يعني نفهم منك انتي تبيه
انا ابتسمت بشويا..اها نبيه
موده..هههه كنت عارفه انك حتحبيه
انا..ههههه سامطه باه قوليلي شن ندير
موده..من ثاني يوم وصار فيك هكي
انا..بتحكي ولا لا انتي
موده..خلاص نبصر ياحصله
انا..هيا قوليلي توا نحن ماشين لقريه اسبوعين مانبيش اسبوعين هذينا يمشن ع فاضي
موده..اولاً أيهم حلالك يعني انتي تبيه معناها لازم يبقى لكي تمام
انا..اهم تمام
موده..خلاص عامليه ب استكراد توا تشوفي شن يصير بعدها
انا..كيف يعني
موده..يعني ماتحكيش معاه بكل امسكي روحك قدامه والبسي وتعطري خليه يموت بيش يقرب منك
انا..هكي رايك
موده..إسألي اي حد حيقولك هكي
سمعت باب اصكر
انا..موده أيهم جاء توا بعدين نحكوا
موده..هههه اوكي"
"يوسف..مع من تحكي
موده..مع ميس
يوسف..اها شن غدانا
موده..مكرونه
يوسف..اها
موده برمت عليه..كنك حبيبي رايقيلك
يوسف..ولا شي
موده..اوفا عليا انا
يوسف..يييي موده ماتسكنيش
موده سكتت وبرمت تقرض ف سلاطه..ع راحتك
يوسف صبى طلع من تلاها
موده..كنه الحصله هذا"
"أيهم..ميييس ياميييس وينك اووف
خش عليا وانا مقمعزه نمشط في شعري
أيهم فنص..نعيط انا كنك ماتردي
انا بحتت فيه ورديت نبحت ف مرايه..ماسمعتش
أيهم..تهيالي صوتي كان عالي
انا جبت شعري ع جنب ونمشط..اهم مش عارفه ممكن بس انا ماسمعتكش
أيهم رفع حاجبه..بعد الغداء طول بنطلع مش تقعدي تمرخي
انا..باه
صبيت وطلقت شعري وحركته شويا وهو يبحت فيا مشيت لدولاب وفتحته نطلع لبسه
أيهم..باه قتلك
انا ماسكه بلوزه ف ايدي ومانبحتش فيه..نعم
أيهم..شن رايك نتغدو برا
انا..الي يريحك
أيهم..اها باه خلاص معناها البسي وخلي نطلعو لانه بعد غداء توا يقعد زحمه
انا..باه نلبس ونطلع
أيهم..باه نراجي فيك برا
طلع وانا طلعت سروال بيج واسع وبلوزه كحليه قبل ركبه بشويا وعليها طرف اسود طويل وشاح اسود وسبيدرو اسود مكيجت مكياج بسيط وبرمت ع دار وطلعت ماسكه شنطتي الي فيها دبشنا وفوني ف ايدي حطيتهن ف صاله ومشيت نبرم ع الحوش طفيت ضوايا و حاجات
أيهم..ها شن كملتي
انا..اها شنطه ف ممر
خش لممر وانا طلعت لصاله
جاني ماسك فوني ف ايده
أيهم..موبايلك
خذيته منه وطلعت هو صكر الباب وينزل قدامي
منير..اووووو العرسان
انا ابتسمت..هلا شنجو
منير..تمام والله شن جوك انتي
انا..كويسه انا
منير..طالعين توا
أيهم..ان شاء الله
منير..باهي كويس
أيهم..هيا
طلعت قدامه ونزلت فتح باب حوش وطلعنا لجنان وطلعنا برا
هو فتح سياره من لاوره وحط شنطه وانا جيت بنفتح الباب عصى معايا مابيتش نقوله قعدت ندير فيه بروحي
فتح روشن أيهم
أيهم..ماتعرفيش ديري شي بروحك
انا كشخت..توا نديره بروحي
أيهم..باه توا نشوفو
معش با يفتح دقيت عليه
انا..ممكن تفتح باهي
ابتسم ابتسامته الحقيره وفتحلي
أيهم..ههههه مش ع ساس بديريه بروحك
سكتت وقعدت ع فوني
أيهم..باه به
قعدت نرن ع عزو وحطيت فون ع وذني
أيهم..مع من تحكي
رد عليا عزو
انا..الوو
عزو..هلا كيف حالك
انا..الحمد الله كيف حالك انت شنجوكم
عزو..تمام الحمدالله انتي شن اخبارك وجوك
انا..كويسه انا رايفت عليكم والله
عزو..والله نحن اكثر مكانك فاضي
انا ابتسمت..توا نجيكم لين تملو مني؛؛سلملي ع هلي
عزو..يوصل تبي حاجه
انا..سلامتك مع سلامه
عزو..اوكي
صكرت منه وبحتت ف أيهم كان حاط ايده ع لحيته وقارن حواجبه
أيهم..بعد نسألك تردي شنو تردي عليا فاهمه
سكتت ودرت روحي ماسمعتش
أيهم فنص وعلى صوته..سامعه ولا لا مش عليا انا طروح هذينا
هزيت راسي وقعدت ماسكه دموعي سكتنا نحن اثنين لعند وصلنا لمطعم
أيهم بحت فيا..انزلي
نزلت بدون صوت وهو يمشي ورايا قمعزنا ع طاوله
أيهم..شن تبي تطلبي
مسكت المينو
انا بصوت واطي..اطلب انت ع راحتك
بحت فيا وانا نزلت راسي صبى طلب ورد قمعز
مد ايده مسك ايدي انا رفعت راسي فيه
أيهم ابتسم بشويا..ماكانش قصدي نزعلك بس انا هكي مسرع مانتنرفز
انا كريت ايدي..لا عادي ولا يهمك
سكت لين جاي غداء وتغدينا مشاء سلك حقهن وطلعنا من مطعم"
أنت تقرأ
رواية #عكس_تيار
General Fictionالرواية للكاتبة Anosha Alriany للعلم الرواية مش انا اللي كاتبتها بس قريتها وعجبتني وحبيت ننشرها
