#عكس_تيار✨
حلقه14
"منار..رحاب كنك
قربت منها ورحاب صبت
رحاب بصوت هادي..ماكني شي
منار..كنك تبكي شن صاير
رحاب..تي قتلك مافي شي انا
ركبت تجري لسطاح وقمعزت ع كرسي وقعدت تبكي وشهقاتها كل مالها يزيدن
ماما..شوفها ياعزو وانت نازل معش جت البنت
عزو..ماعندها وين تعدي ياامي اكيده تهدرز مع بنات
ماما..باه سلم وليدي شوفها وخليها تركب
عزو طلع يلبس ف كندرته وطلع وصكر باب وراه
شاف ضي سطاح وصوت رحاب كان عالي ركب يجري
عزو منفجع..كنك يارحاب كنك تبكي
رحاب برمت عليه وحطت ايديها ع وجها
عزو جاء قدامها ويكر ف ايديها..تي كنك شن في ماتخوفينيش شن في
رحاب مستمره ف بكاء وماتردتش
عزو فكلها ايديها وماسكهن ويبحت فيها..كنك شن في ف حد دارلك حاجه احكي ازف ماتخوفينيش
رحاب..ممعءءءش بننقعءءد هنااا
عزو..من داويلك شن في
رحاب ردت تبكي
عزو تنهد وكرها ع صدره..وحياتك عندي يارحاب الي تبيها تصير اصبري عليا قبل شهر هذا توا نسيبوها لهم
رحاب..ااه يابابا وينك
عزو رفع عيونه فوق مايبيش دموعه ينزلن..انا باتك وخوك وكل حاجه انتي تبيها اسكتي بس خلاص
وخرها وماسك وجها بين ايديه ويمسحلها في دموعها
عزو..خلاص اسكتي باهي توا امي تخاف عليك
رحاب هزت راسها
عزو..انزلي خلاص هيا ع شنو كانت دازتك
رحاب..لخالي عبدالله
عزو..توا نكلمه انا انتي معش تنزليلهم
رحاب تنهدت..باه
نزلت لشقه
ماما..وين خالك
رحاب..توا يكلمه عزو
ماما..وين كنتي
رحاب..انا خاشه لدارنا
ماما..تعالي ترا بحتي فيا
رحاب..شن تبي كنك
ماما..كنك تحسي ف حاجه وجك مش عاجبني
رحاب..لا عادي غير تاعبه
خشت لدار وعزقت روحها ع سرير وانهارت بكاء"
"وعيت لساعه 11 خشيت لمطبخ وقعدت نبرم ف مطبخ مش عارفه شن ندير غداء
طلعت مفروم ومكرونه وقعدت نطيب فيها وطلعت فواكه بيش نديرهن عصير حطيت حاجات ع نار وقعدت ندير ف سلطة وتيت طاوله الي ف صاله كانت رخام حطيت عليها تباسي وكل حاجه وبحتت ف ساعه لقيتها 1 ونص كملت حوسه مطبخ وخشيت دوشت ولبست فستان اصفر كم ومن كتوف نازل شويا ع ذراع وصدره فيه فتحه بسيطه وضهر نفس شي لعند ركبه مشطت شعري ودرت ميك اب خفيف ولفيت شعري من قدام وباقي خليته مطلوق سمعت صوت مفاتيح طلعت من دار
انا ابتسمت..اهلين حبيبي
ايهم..اه ميس هلا
قربت منه وسلحتله جاكه
انا..شكلك تعبان
ايهم..اها بكل
انا..خش دوش ع سريع
ايهم..لالا بعد غداء جيعان توا
انا..باه غير وتعال تلاقهى واتي
ايهم..باهي مش حنطول
انا..باه
خش لدار وانا حطيت لغداء وصبيت لعصير
ايهم خش لصاله..سلم ايديك
انا..سلمك حبيبي ان شاء الله يعجبك
ايهم..اكيده حلو كيفك
قمعز وبدا ياكل وانا نراجي فيه شن يقول قعد يحرك ف حواجبه بعدها بحت فيا
انا..شنو
ايهم..راجي مزال
قعد ياكل أخرى
انا..هيا قريب تكمل ومزال هذا كله
ايهم..اممم ممم ااا حلو حلو مشاء الله عليك
انا..صاح حبيبي سمح ولا تجامل فيا
ايهم..كان شين راه قلتها لكي من اول عليش بندس
انا ابتسمت..صحه وعافيه
ايهم..سلمك كولي انتي
قعدت ناكل بشويا
ايهم..كل حاجه بشويا انتي
انا..ههههه هكي نحب
ايهم..تاخذي ف حبوب
انا..اها ناخذ
ايهم..راك تنسيهم
انا..وكان صار حمل من عند ربي يعني هذي نعمه انا مانرفضهش
ايهم..كنك رديتي ف كلامك مانحن اتفقنا توا لا ع سبه قرايتك
انا..مارديتش انا بس انت كنك مدقق ع موضوع
ايهم بحت فيا ورفع حاجبه..لا مش مدقق بتحملي قيدك ع روحك انا نفكر فيك بس
انا..اها
سكتنا نحن اثنين
انا..شن درت ليوم
ايهم بدون مايبحت فيا..شن بندير شغل يعني
انا..اها ربي يعاونك
ايهم صبى..في شاهي
انا..اها في
ايهم..صبيلي لانه بنرقد
انا..باه هيا
صبيت صبيتله شاهي
انا..تفضل حبيبي
خذاها مني وانا لميت حوسه لغداء وقعدت نغسل ف مواعين خش عليا بيحط طاسه
ايهم..كنك ماحطيتيهن ف غساله
انا..عادي طشه هنا
ايهم..حطي فيها مره اخرى توا نعلمك كيف تولعيها
انا..باه
كملت حوستي وطفيت ضوايا وخشيت لدار لقيته راقد ع جنبه وماد ايديه قدامه ابتسمت وخشيت تلاه بشويا رفعت ايده وحطيت راسي ع ايده ونزلت ايده لأخرى"
أنت تقرأ
رواية #عكس_تيار
General Fictionالرواية للكاتبة Anosha Alriany للعلم الرواية مش انا اللي كاتبتها بس قريتها وعجبتني وحبيت ننشرها
