#عكس_التيار ✨
حلقه44
"عزو صكر موبايل..كنها امي كنها
رحاب..شكله هبط عليها السكر داخت عليا ياعزو تعال شوفها
نزل عزو يجري وماما مقمعزه ع صالون
عزو..جيبي ميه وسكر بسرعه
ماما بصوت واطي..مافيا شي ساهله سكر هبط
عزو مقمعز ركبه ونص وماسك ايديها..ماخذيتيش حبه الريق صاح وامتاع الهضم صاح
ماما..نسيتهن
رحاب جت تجري بالطاسه..خوذي ياماما اشربي
عزو..كنك مش مركزه ع امي ف دواها
رحاب..ع ساس تاخذ فيهن نسأل فيها ديما
ماما..مش شورها انا نسيتهن عادي خلاص
عزو..لا مش عادي ياامي شفتي توا هبط عليك سكر
ماما..باه ان شاء الله توا معش ننسى
رحاب قمعزت تلاها ومسكت ايدها..الحق عليا مفروض نتابع فيك
ماما..مادخلكش انتي لاهيه بقرايتك
رحاب..لالا مفروض نشوفك وندير بالي منك حقك عليا يا ماما
ماما حطت ايدها ع رأسها ورحاب حطت راسها ع صدر ماما
رحاب..شنو حسيتي روحك
ماما..الحمدالله
عزو رفع ايديها وباسهن..ربي يخليك لنا يا غاليه
ماما ابتسمت..ويخليكم ليا ويفرحني بيكم
رن موبايل عزو صبى
عزو..انا طالع شويا وتوا نجي
ماما..ع راحتك
طلع عزو برا لجنان ورد ع اميره..
عزو..ايواه
اميره..شن في ياعزو نشغلت سمعت صوت رحاب و هيا تعيط
عزو..اسف صكرت عليك بس من فجعه امي هبط عليها سكر ورحاب انفجعت ماعرفتش تصرف
اميره..شنو توا باه كويسه
عزو..لا كويسه غير مش وأخذه الحبوب امتاعها قعدت معش تركز بعد فضى عليها الحوش ورحاب صغيره لاهيه بقرايتها مش مركزه ريهام كانت ديما معاها
اميره..ياعمري متعلقة بيهن واجد شكلها هذي الحياء شن تبي ادير صاح رحاب مزالت صغيره
عزو..اهو شن بنديرو توا نقعد مركز معاها خايفه تتعب و هيا صاحبه سكر وضغظ
اميره..سلامتها حبيبي
عزو..سلمك ياسمحه ميرو توا مطر نصكر بنخش تلاها شويا
اميره..خوذ راحتك يا عمري بعدين نحكوا
عزو ابتسم..انحبك
اميره تنهدت..نموت فيك باي
عزو..اوكي
صكر منها وابتسم وخش تلا ماما ورحاب"
"انا مقمعزه ع وطى ونعصد..تسنيم مديلي الصواني هيا
رشا..اصبري نحطو فيهن ف زبده
انا..باه هيا بسرعه
مريم..امس ماما عصدت تقول حاسه انه دنيا بتجيب
رشا..عليك عصيده تهبل بس
مريم ضحكت..بكل انتي امس
رشا..تمسح الكبد تهبل
مدتلي تسنيم الصواني وانا نحط فيهن ف عصيده ونعطي لرشا تسقمها وديرلها رسمه
حطينا ف الصفر وطلعنا حطينا لصبايا وقمعزنا
قمعزت انا ورشا ومريم وبشرى وتسنيم مع بعضنا هل دنيا ومعاهم ريهام واعميمه ورحمه وفاطمه بروحم
ام دنيا..الي عصدت سلمها عصاده
مريم..ميس عصدت
ام دنيا..سلمك عصاده ان شاء الله نعصدوها لكي ف جيابك
انا ابتسمت..تسلمي صحه
فاطمه..ان شاء الله ماتحكي بيهن داء ايدياتك
انا..سلمك يااعميمه صحه
مريم..حلوه مشاءالله
تسنيم..اها تهبل ينعليا نحبها بكل العصيده
بشرى..سمحه اها
انا..صحه سمحه ولا يعني
رشا..لا مشاء الله تهبل
انا..صحه وعافيه
كلهن..سلمك
شويا وصبينا شلنا الصفر لكوجينه
سليمه خشت..مشاء الله عليها ياميس
انا ابتسمت..صحه
سليمه..سلمك اطلعي اكيده تبي تهدرزي مع خيتك
انا..توا نلمو الحوسه ونطلعو مع بعضنا
مريم..صاح عدي ياميس توا نحن نلموها
انا..باه تمام ربي يعاونكن
طلعت قمعزت تلا ريهام
انا..شن جو
ريهام..تمام لعند توا
انا..شنجوه انس
ريهام ابتسمت..كويس جوه حتى كلامه مريح بكل ياميسو خطر عليا كلامك
انا..جد باهي ع مهم انتي متريحه
ريهام..يعني مش حنقول متريحه متريحه بس كيف ما تقولي تاقلمت معاه امس صارت حاجه وووووو
انا..تصرفه حلو بكل يبيك تفكري بينك وبين روحك ومايبيش يضايقك بكثر كلامه
ريهام..لا لا بس انا نبيه يقعد
انا ابتسمت..وهذا بدايه الحب ولا شنو
ريهام..تعود ماحتى حب ف اسبوع
انا..وليش لا انا حبيت ايهم ف اسبوعين بس و شفتي كيف حبي له وتعلقي بيه
ريهام..انتي تفرقي عليا واجد راه انتي كان قلبك فاضي
انا..ممكن صاح بس تقدري تحبي انس
ريهام..ان شاء الله يارب
أنت تقرأ
رواية #عكس_تيار
General Fictionالرواية للكاتبة Anosha Alriany للعلم الرواية مش انا اللي كاتبتها بس قريتها وعجبتني وحبيت ننشرها
