#عكس_التيار✨
حلقه39
منير فتح عيونه زين..شنو من جدك انتي تحكي اوكي غلطت ومعترف بغلطي بس مش درجه حبنا ينتهي
مريم تبحت فيه وقعدت دف فيه من صدره بقوه..تحسابها ساهله انت مش حاس بيا مش حاس وانا الي نحسابك تخاف عليا وع سمعتي وانا الي نحساب روحي مستنده ع حد يحميني هكي يامنير هكي يا حبيبي هكي
منير ساكت ويبحت فيها
مريم تبكي..معش تحكي معايا فاهم فوتني
منير مسك ايديها وهيا تكر فيهن بقوه
مريم..حول ايديك من عليا حولهن
منير بصوت هادي..اسسف عارفها ماتكفيش بس بجد اسف ماتقوليش انك تبي تسيبيني رد بالك تقوليها فوتيني ماتحكيش معايا ازعلي ديري الي تبيه بس خليك انا راضي ومتحمل ع مهم تقعدي ليا
مريم منزله راسها ودموعها ينزلن ع ايديها وايدين منير
منير تنهد..تحسابي دموعك مايحرقنش فيا يقتلن فيا حاس بالقهر انا
مريم تهز في راسها وتبكي..حول ايديك
منير..يكون ف علمك مستحيل نخليك تمشي فاهمه
طلق ايديها وبرم ومريم حولت شعرها ع ضهرها وتمسح ف دموعها وخشت لمزرعه ومنير طلع علق سيارته ومشاء"
"ساعه 10 نضنا كلنا وقعدنا نلمو سليمه وفاطمه ودنيا ع فطور وانا ورشا وتسنيم نلمو ف فراشات ومريم مزالت راقده ومحد نوضها
انا نرضع ف وسن..صباح الخير حبيبي
ايهم..صباح النور وينك
انا..نرضع ف وسن ونخش حمام ونطلع
ايهم..باه وجيبي وسن
انا..حاضر
صكرت منه وصبيت لبست وسن طاقيا وقونتيات وحطيتها ف قعاد وانا خشيت لحمام غسلت وتوضيت وغيرت لبستي و طلعت برا
سليمه..تعالي هيا افطري
انا..نشيل وسن لي ايهم
سليمه..باه وخليه يجي يفطر حتى هو
انا..حاضر
مشيت لجيها مربوعه ودقيت
فتح امجد يغبش..صباح الخير
انا..صباح النور ايهم وين
امجد..طلع توا
انا..صاح نحسابه هنا
امجد طبس يبوس ف وسن..عسل نجيها ياربي
انا ابتسمت..تسلم تعال افطر حطينا الفطور
امجد..باه ان شاء الله
برمت ولقيت ايهم حاط كراعه ع ماده ويولع ف دخان
انا مشيت شورا..صباحو
ايهم ابتسم ونفخ دخان..صباح الخير
حطيت وسن ع ماده تلا كراعه
ايهم طبس عليها وشمرها
انا..لفها كويس حبيبي صقع
ايهم..باه هاه
انا..تعال افطر
ايهم..ماعنديش نيه
انا..لا لا تعال افطر مزال بدري ع غداء
ايهم..باه يصير خير منير فراشه كيف ماهو توا كلمته قالي رديت لبنغازي
انا..و الله جد ازعمك صار بينهم حاجه
ايهم ينفخ ف دخان..مريم وين
انا..راقده مزال
ايهم حط وسن ف قعاد..جدوق منضرها يهبل
انا..اها تهبل هاتها خايفه عليها من صقع خلي نخششها
مشينا شورهم ايهم صبح عليهم وقمعز يفطر وانا خشيت جوا حطيت وسن ف دار وانا طالعه سمعت مريم ف حمام تكح شكلها تستفرغ شويا وطلعت حاطه ايديها ع بطنها
انا..لابأس كنك
مريم بصوت مبحوح..شكلي مرضت امس رقدت بشعري وهو مبلول واليوم نضت السته طلعت برا
انا..لا بأس عليك تعالي خوذي حليب ساخن
مريم..لا ماعنديش نيه ومانبيش نطلع نشوف منير
انا..روح لبنغازي
مريم رشفت خشمها..جديات
انا..اها قالها ايهم
مريم سكتت وخشت لدار وانا طلعت برا
سليمه..تعالي افطري ياخيه
انا..هيا جيت يااعميمه
جيت قمعزت تلاهم وصبتلي اعميمه حليب وحطتلي كعك معاه
فاطمه..نوضي يابشرى نوضي اختك
انا..شكلها مريضه راه شوفيها يااعميمه
فاطمه..كنها
انا..قالت رقدت امس وهيا شعرها مبلول
فاطمه صبت..ينعليا هالفرخه تبي تهبلني بعنادها
محمد جاي شورنا..صباح الخير
نحن..صباح النور
محمد..وين منير
سليمه..وينه
ايهم..روح لبنغازي
سليمه..روح كيف روح عليش
ايهم..و الله ماني عارف كلمته قالي روحت شكله عنده موضوع
سليمه..يستر الله وخلاص
محمد..شنو موضوع يوم جمعه
سليمه..صاح صدقت فيه
فاطمه طلعت تجري..محمد تعال اطلع اختك مش قادره تصبي ع كرعيها
محمد حط طاسه الحليب..كنها
فاطمه..مريضه خش بسرعه
خش محمد ونحن خشينا وراهم
رشا..كنها يابتي
تسنيم..شكلهم متعاركين واضحه
أنت تقرأ
رواية #عكس_تيار
General Fictionالرواية للكاتبة Anosha Alriany للعلم الرواية مش انا اللي كاتبتها بس قريتها وعجبتني وحبيت ننشرها
