رواية #عكس_تيار

الحلقة 41

#عكس_التيار✨
حلقه41

"انس بحت ف ريهام الي كانت لاصقه ف باب وخايفه..كنك خايفه
ريهام زمطت ريقها وقلبها يدق..لا عادي
انس..ماتخافيش توا بعد نوصلو نحكوا باهي
ريهام هزت راسها بس وصلو للحوش ونزل انس وريهام فتحت الباب جاء من جيهتها ونزلها وهو ماسك ايدها
خش بيها لحوش وركبو فوق لشقه
انس فتح الشقه..انستي شقتك تفضلي
ريهام بصوت واطي..الله يفضل عليك
انس..غيري دبشك وتعالي نصلو بعدها نتعشو ونحكوا براحه
ريهام زمطت ريقها وبحتت فيه..بس
انس..شنو قولي ماتحشميش تبي حاجه
ريهام..انا توا يعني
انس ابتسم..عليك العذر الشرعي
ريهام هزت راسها ومتحشمه
انس..تمام باه غيري وتعالي
ريهام..وين دار
انس شيرلها عليها..اهي خشي
ريهام..تمام شكراً
خشت ريهام لدار وسلحت عبايه وشاح و طلعت روب طويل لونه ابيض كان كت عادي مافيش اي حاجه ولبست عليه طرف كم وبرضو طويل لفت شعرها فوق ومسحت المكياج الي كان بسيط بكل وطلعت لقت انس يصلي حطت ايدها ع خدها وتبحت فيه
انس..السلام عليكم السلام عليكم
بحت فيها وابتسم
ريهام ابتسمت بشويا..تقبل الله
انس..منا ومنك صالح الاعمال نتعشو
ريهام..ماعنديش نيه تبي انت نحطلك
انس..تعرفي حتى انا ماعنديش نيه نحطو حاجه بسيطه
ريهام..كيف شنو تبي نديرلك
انس..تعالي ف مطبخ
ريهام صبت لاحقاته
انس..ندير نسكافي
ريهام..توا نديره
انس..لالا توا نديره انا توا تحبيه امتاعي
ريهام ابتسمت وقمعزت تبحت فيه..باه تسلم ايديك
قعد ادير ف نسكافي و هيا تبحت فيه وسارحه لين حط كبايه قدامها
انس..تفضلي
ريهام..شكراً
انس برم فتح تلاجه..عفواً ولو
طلع شكلاطه وقمعز مقابلها
انس..نحب الخفيف مانحبش نثقل ف ليل
ريهام..اها مشاء الله جسمك واضح انك محافظ عليه
انس..اها بس انتي رقيقه واجد ع جيتك ف مستشفى
ريهام نزلت راسها وسكتت
انس قرب ايده ومسك ايدها ريهام جسمها كله رعش مع بعضه وبحتت فيه
انس ابتسم..ليش سكتي انا متفهمك ومتفهم وضعك وانا بروحي خايف عليك وع شعورك يعني ومانبيكش الا راضيه مش حنكون اناني ونقولك هيا انسي اسامه وتقبليني بكل بساطه
ريهام..انا..
انس..ماتقطعينيش خليني نكمل
ريهام بصوت واطي..اسفه
انس..لا عادي مش مشكله بس الي بنقوله لكي نبيك تساعديني بيش تعيشي معايا حياء حلوه اسامه الله يرحمه هو مش قاعد ف حياتك بس نبيك تذكريه ف صلاتك ودعاك وهكي تكوني ماحسيتيش بذنب انتي صاح
ريهام ابتسمت وهزت راسها
انس..لازم تكون علاقتنا مبنيه ع محبه وموده ورحمه مانبيش تكون حياء ممله انتي توا ع ذمتي وانا واجبي نصبي معاك ف كل حاجه لانه نحن الاثنين نكملو بعضنا ومش انا بس الي قلت لازم تكون علاقتنا فيها حب حتى ربي قال

﴿وَمِنْ آَيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجاً لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآَيَاتٍ لِقَوْمٍ يَتَفَكَّرُونَ﴾