#عكس_التيار✨
حلقه30
انا...اااااا ايهم
ايهم ناض مفجوع..كنك كنك
انا جيت نجري نطيت عليه حضنته..ننجججحت نننجحت بحت بحت
ايهم ضحك ومسك موبايل من ايدي..اوووو تانيه ع مدرسه مبروك من تقدم لتقدم
انا مبتسمه ورديت حضنته..حبيبي كله من فضلك انت تساعد فيا ياعمري
ايهم..احم باه ميس صيام وخري
انا وخرت..يييي اسفه نسيت
ايهم ابتسم..معليش معليش فرحه النجاح الف مبروك
انا..اممممم نبي هديه سمحه
ايهم..حاضر من عيوني احلى هديه لكي
انا صبيت..رد ارقد مزال بدري راه
ايهم بحت فيا بنص عين..طار نوم من حضرتك
انا ضحكت..معليش معليش فرحانه
ايهم ابتسم ع جنب..ان شاء الله ديما يارب
انا ابتسمت..ان شاء الله يييي نرن ع رحاب نشوف شن صار فيها
رنيت ع رحاب شويا وردت
انا..خيرات
رحاب..خير
انا..نتيجتكم اليوم شن صار فيك
رحاب..عزو مزال ماجاء عدا لمدرسه ينعليا ياميسو متوتره
انا..ان شاء الله ناجحه ماتخافيش
رحاب..يارب يارب
نسمع ف رشا تعيط
رشا..عزو جاء يا رحاب
معش سمعت صوتهن شويا ونسمع ف رحاب تعيط وعزو يضحك قعدت نضحك ع اهبالها
ريهام..الهبله خلاتك ع الخط
انا نضحك..نسمع فيها فرحانه
ريهام..مبروك حتى انتي
انا..الله يبارك فيك باركيلي له الهبله هذي توا مرات ف ليل نمر عليكم مرات مش اكيده
ريهام..يييي تعالي مرايفين عليك بكل
انا..ان شاء الله نشوف ايهم قبل
بحت فيا ايهم وهزلي راسه
انا..ريهام خلاص توا نجيكم باهي
ريهام..يييي تانسينا ياحنه
انا..الله يانسك نتلاقوا بعدين
ريهام..مع السلامه
صكرت منها وصبى ايهم يطلع ف دبشه من دولاب
ايهم..قبل نبي ندهورك اليوم بس يلا بكرا ولا بعده
انا..مش مشكله مره اخرى مرايفه ع هلي
ايهم..تمام ماديريش شي توا نجيبلك من برا تشيلي معاك دوبك دوب فطور خليك
انا حطيت ايدي ع بطني ونبحت فيها ومبتسمه..بابا خايف علينا ياوسن
ايهم برم وابتسم..وسن
انا ضحكت..شن رايك
ايهم..وسن وسن كيف ماتبي
انا..مرات يقعد خاطرك ف اسم
ايهم..لا عادي اول بطن شورك مره اخرى نسمي
انا..نجك ليا
ايهم...امممممم
انا ضحكت..ناويه نفطر ونفطرك
ايهم هز راسه..انا خاش لحمام وبنصلي ونطلع
انا..باه
خش ايهم لحمام وانا طلعت شورت قصير وتيشرت نص كم واسع قبل شورت بشوي ودرت شعري ذيل حصان وطلعت لكوجينه بديت ندير ف تارت مالح خش عليا ايهم وانا نحوس
ايهم..انا ماشي
انا..اوكي مربوحه
طلع ايهم وانا قعدت لاهيا ف فطوري"
"بشرى..باه بتكملي نهارك بكاء هكي نوضي سادك خلاص
مريم حولت ورغان بقوه..مش حاسه بيا ماهو انتي قلبي نحرق والله نحرق حرام عليه حبيته يا بشرى حبيته..وبحتت فيها ودموعها ينزلن ع خدودها..مش قادره نصدق الي انا شفته و لا كيف هو مادافعش ع روحه قالي بس مافيش منه كلام هذا بسس تصدقي كلامه ليا طلع كذب معقوله هكي ايدير فيا..حطت ايديها ع وجها ورافعتهن ع شعرها..قوليلي شن ندير بس
بشرى تنهدت وجت تلاها..باه معش تبكي انا متعوده عليك قوية مش هكي منهاره
مريم حاطه ايديها ع قلبها وتحرك فيهن بشويا..كسر قلبي وكسر قوتي يا بشرى معش عندي قوه بيش نواجه اي حاجه انا انا مصدومه مخنوقه انا مضحوك عليها
بشرى قعدت تبكي من كلامها..خلاص اسكتي ربي يكسره كيف ماكسرك
مريم تدوي بصوت واطي..وعدني وعدني انه مانتفترقوش شوفي محادثتنا
بشرى تمسح ف دموعها وتبحت فيها معش عرفت شن ادير
مريم تنهدت وتمسح ف دموعها..مش اول ولا أخرى اثنين يسيبو
بشرى..خلاص صبي اغسلي وجك شوفي كيف قعد
مريم صبت خشت لحمام قعدت تغسل ف وجها ودموعها ينزلن..ياربي نحبه ياربي
أنت تقرأ
رواية #عكس_تيار
General Fictionالرواية للكاتبة Anosha Alriany للعلم الرواية مش انا اللي كاتبتها بس قريتها وعجبتني وحبيت ننشرها
