ဖြေသိမ့်ခြင်း နတ်ဘုရားလေး (အိုးရှင်း)
အခန်း-၂
ငါလေးရဲ့ နယ်မြေက ကျဉ်းတယ်လို့ ပြောရမယ်။ အိမ်လေးသိပ်မများတဲ့ ရပ်ကွက်ငယ်လေး တစ်ခုပဲ ဖြစ်တယ်။ ငါလေးက နေ့တိုင်း အဲဒီရပ်ကွက်လေးကို ပတ်ပြီးတော့ လူတွေရဲ့စိတ်ကို ဖြေသိမ့်ပေးတယ်။ ပုံမှန်အတိုင်းအရ မနက်တစ်ကြိမ် ညနေပိုင်းတစ်ကြိမ် ပတ်ပြီးတော့ လူတွေကို ကူညီတယ် ဆိုပါစို့။
ကူညီတဲ့ နည်းလမ်းကတော့ ထွေထွေထူးထူး မပြောင်းလဲသွားပါဘူး။ တချို့လူတွေက အလိုသိပ်နည်းတယ်လေ။ တချို့က ငါလေး မနိုင်တာမျိုးအထိတော့ ငါလေးက မကူညီနိုင်ဘူးပေါ့။ ဘယ်တတ်နိုင်မလဲနော်။
ငါလေးရဲ့ နယ်မြေလေးထဲမှာ ချစ်မှုရေးရာနတ်ဘုရားငယ်လေး တစ်ပါး ရှိသေးတယ်။ သူကလည်း ကြိုးနီလေးတွေကို လိုက်ချည်နေတာ တွေ့သားပဲ။ သူ့နာမည်က မီဂါတဲ့။
မီဂါက ငယ်သေးတယ်။ သူက ချန်းနတ်ဘုရားရဲ့ လက်အောက်မှာ ရှိတဲ့ ဌာနခွဲတွေ လက်အောက်က ဌာနခွဲ အသေးလေးတွေ လက်အောက်မှာ ရှိတဲ့ နတ်ဘုရားငယ်လေး တစ်ပါး ဖြစ်တယ်။ ပြောရရင်တော့ ငါလေးနဲ့ အဆင့်အတူတူပဲပေါ့။
နောက်သုံးယောက် ရှိသေးတယ်။ နှစ်ယောက်က အကြောင်းဆီလျှော်အောင် ပြုပြင်ပေးတဲ့ နတ်ဘုရားငယ်လေးတွေ ဖြစ်ပြီးတော့ ကျန်တဲ့ နောက်ဆုံးတစ်ယောက်ကတော့ တိုက်ခိုက်ရေးဌာနကနေ ပို့ထားပေးတဲ့ နယ်မြေထိန်းသိမ်းရေး နတ်ဘုရားတစ်ပါးတဲ့။
သူတို့သုံးယောက်လုံးက ဌာနတစ်ခုတည်းမှာပဲ အလုပ်လုပ်ကြတာလို့ ပြောလို့ရတယ်။ နယ်မြေထိန်းသိမ်းရောင်းဌာနပေါ့။ ဒါပေမဲ့ နည်းနည်းဆန်းကျယ်တာက အဲဒီက တိုက်ခိုက်ရေးဌာနကနေ ပို့ပေးလိုက်တဲ့ နတ်ဘုရားက အိုဝင်တောင်ကို ကျော်ဖြတ်ဖူးတာပဲ ဖြစ်တယ်။
သူက ငါလေးတို့နဲ့ အရောတဝင်မနေဘူး။ ပြီးတော့ သူ့တာဝန်ကလည်း လူသားလောကမှာ ဆိုရင် မရှိသလောက် ရှားတယ်လို့ ပြောလို့ရတယ်။ နတ်ဆိုးတွေ၊ မိစ္ဆာတွေကို တိုက်ခိုက်ရတာ ဖြစ်လို့ လူသားလောကမှာတော့ သူ့တာဝန်က မရှိသလောက် ရှားတယ်။