جميلة عشقت الوحش 🤍🖤

الفصل الثلاثون⁦♥️⁩

ليس هناك من هو اكثر عنادا من القلب .. لا يرضخ لأوامر ولا يستمع لنصيحة .. لا سلطان عليه سوا سلطان العشق .. قالوا لو اعلنت الحرب على قلبك لن تخرج من تلك الحرب بلا جروح .. حتى لو كنت منتصراً تذكر ان الخاسر هو قلبك .. لذلك يمكن القول في الحقيقة لا يوجد انتصار حين يتعلق الامر بالقلب .. فإما ان تخسر قلبك حباً او تخسره حزناً وقد قررت الجميلة ان لا تدع للحزن مكاناً في حياتها بعد الان .. قررت ان تسلم قلبها لذلك الوحش وهي مطمئنة انه سيُحافظ عليه فهو انتظرها كثيرا ولن يُضيعها بعد ان وجدها .. عاد عاصي وجميلة لمنزل ليو وشرعت جميلة في تجهيز الحقائب فبعد ساعات قليلة سيعودون لأرض وطنهم الحبيب حيث تنتظرهم مفاجآت كثيرة .. تضع جميلة قطعة ملابس في الحقيبة ليقاطعها دق بسيط على الباب وتطل كيارا من خلفه
كيارا: ممكن ادخل؟
جميلة: اتفضلي
كيارا(وهي تشير لحقيبتها): محتاجة مساعدة؟
جميلة: لأ ميرسي انا تقريباً خلصت
كيارا: طب ممكن اتكلم معاكي شوية؟
جميلة: اه طبعا اتفضلي
كيارا: لا تعالي نتمشى تحت شوية
جميلة: اوكيه
نزلت جميلة برفقة كيارا وعقلها منشغل بسبب تغيرها وعن ماذا تود الحديث معها لترد كيارا عن سؤالها الذي لم تسأله
كيارا(بدون مقدمات): ايه رأيك نكون صحاب
جميلة(باستغراب): صحاب؟!
كيارا: ايوة .. بصي انا ماعنديش صحاب كتير وتقدري تقولي عايشة حياتي في الشغل مع ليو وبس .. لما شوفتك مع عاصي بصراحة غيرت منك شوية
جميلة: غيرتي مني انا؟!
كيارا: ايوة .. غيرت من الطريقة اللي عاصي بيبصلك بيها .. لمعة عينيه معاكي عمري ما شوفتها في عينيه لأي حد .. على فكرة انا وعاصي كنا صحاب بس بصراحة انا كنت معجبة بيه
جميلة(بنظرة ذات مغزى): ما انا اخدت بالي
كيارا: انا بعتذرلك عن تصرفاتي في الفترة اللي قضيتيها هنا .. عاصي لما دخل معايا اوضتي برغم عصبيته منك مرضاش يقرب مني .. وقتها حسيت اني هكون بجرح كرامتي وكبريائي ك ست لو قربت منه ف قررت اني اساعده يخليكي تغيري يمكن تعترفي بحبك
جميلة(بذهول): يعني رقصكم وهزاركم دا كان خطة؟!
كيارا(بابتسامة): بصراحة ايوة وبصراحة اكتر انا مبسوطة انها نجحت
جميلة: وانتي عرفتي منين انها نجحت؟
كيارا: من وشك اللي نور وابتسامتكم اللي مرسومة على وشكم
جميلة(بهمس): ايه العيلة اللي بتعشق الخطط دي
كيارا: بتقولي حاجة؟
جميلة(بابتسامة): لا لا ابدا .. بقول انا موافقة اننا نكون صحاب
كيارا: تمام .. دا رقم تليفوني ياريت نفضل على اتصال ولو احتاجتي حاجة مكالمة واحدة وتلاقيني عندك في مصر
جميلة: تمام وانتي برضو لو احتاجتيني خليكي عارفة ان ليكي اخت هناك
كيارا(بدقات قلب متواثبة): اخت؟!
جميلة: ايوة .. لو مش هيضايقك
كيارا(وهي تحتضنها بقوة): بالعكس .. هفرح جداً
تفاجأت جميلة من حضن كيارا ولكن سرعان ما ابتسمت وربتت على ظهرها بهدوء .. كان ذلك المشهد جميلاً وبالاخص لتلك العيون السوداء التي تراقبهم بابتسامة ليقطع تلك المراقبة صوت ليو
ليو(بابتسامة): مشهد جميل مش كدا؟
عاصي: فعلاً  ..(ثم إلتفت إليه ليردف).. جهزت اللي طلبته منك؟
ليو: ماتقلقش بجهزه بس انت واثق من اللي انت عايزه دا .. انت عارف الحاجات دي مفيهاش هزار
عاصي: عارف, ودا الحل الوحيد .. مش هعرف ارتاح غير كدا
ليو: تمام في اقرب وقت هبلغك بيه
عاصي: وأنا هستناك
///////////////
يجلس كريم بمنزله وهو كل دقيقة ينظر لهاتفه .. اليوم الجمعة .. الساعة العاشرة صباحاً .. باقي ٩ ساعات وسيعلم بمن دمر حياته .. سيعلم هويته .. سيعلمه وحينها لن يرحمه ابدا
////////////////
تقف جميلة بالاسطبل لتودع تلك الفرسة التي رأتها وتعلقت بها
جميلة(وهي تربت على رأسها بحنان): سلام يا حلوة .. هتوحشيني
عاصي(وهو يقترب منها): تحبي ناخدها معانا؟
جميلة: ناخدها؟!!
عاصي: جوليت دي اصلا بتاعتي .. كسبتها في سباق مع ليو
جميلة: اسمها جوليت؟
عاصي(وهو يربت على الفرس الأسود بجانب جوليت): ايوة .. ودا روميو
جميلة: روميو وجوليت .. حلوين اوي
عاصي: من صغرهم وهما مرتبطين ببعض ولما كسبتها من ليو فكرت اخدها معايا مصر بس وقت ما جيت انقلها لاقيتها بتعاند وصهيلها علي وكذلك هو زي ما يكونوا رافضين يبعدوا عن بعض .. بصراحة ماهنش عليا افرقهم ف سيبتها هنا وبقيت كل ما اجي ايطاليا اركب روميو شوية واركبها هي شوية وخلاص
لمعت عيون جميلة من جملته عن عدم رغبته في تفريقهم .. رغم قسوته التي يُبديها للجميع يظل قلبه منيراً
عاصي: بتبصيلي كدا ليه؟
جميلة(وهي تسحب عينيها بخجل): مفيش .. هو احنا هنرجع امتى؟
عاصي: كمان ساعة .. جهزتي الشنط؟
جميلة: ايوة كله تمام مش ناقص حاجة
عاصي: في الحقيقة هو ناقص حاجة واحدة بس
جميلة: حاجة ايه؟
عاصي: دي
قالها عاصي وهو يخرج علبة خاتم من جيبه .. فتح العلبة ليطل بداخلها خاتم والدته ذو الفص الاخضر كعيون تلك الجميلة .. نظرت جميلة للخاتم باعجاب ليردف عاصي
عاصي(وهو ينظر للخاتم بعيون لامعة): دا خاتم امي .. اديتهولي قبل ما تموت و ادت لعاصم السلسلة وقالتلنا يوم ما قلبنا يدق نديهم للي قلبنا يختارها
صمتت جميلة بخجل ليقترب عاصي منها ويمسك يدها بحب ويردف بنبرة ساحرة يشوبها الحب
عاصي(وهو ينظر لعينيها بعيون عاشقة): تقبلي يكون قلبي مكانك وتكملي معايا حياتي لآخر يوم في عمري؟
هزت جميلة رأسها بفرحة وابتسامة ترتسم على شفتيها ليُلبسها عاصي الخاتم قبل ان يجذب يدها برفق ويُحيط خصرها وهو يهمس
عاصي(بنبرة عاشقة): بحبك يا جميلتي
///////////////
يستعد كريم للمغادرة لتقف نور امامه بارتباك ليردف هو بهدوء
كريم: فيه حاجه يا حبيبتي؟
نور(وهي تفرك اصابها بارتباك): كريم، هو انت زعلان مني ؟
كريم: لا طبعاً ليه بتقولي كدا
نور: اصلك بقالك يومين متغير وسرحان ومش بتتكلم .. انا ضايقتك في حاجة؟
كريم: لا يا حبيبتي انا بس بفكر في حاجة مهمة تبع الشغل
نور: طب هو انت هتنزل دلوقتي؟
كريم: ايوة
نور(بنبرة يشوبها الخوف): هتتأخر؟
كريم: لأ متخافيش وبعدين احنا قولنا ايه .. هنتشجع ومش هنخاف من حاجة
نور: حاضر
كريم: الحراسة تحت ماتقلقيش ولو احتاجتي حاجة كلميني تمام؟
هزت نور رأسها بهدوء ليردف هو بحنان
كريم: يلا بقا سلام يا حبيبتي
قالها كريم وهو يقبل رأسها بهدوء ويتحرك مغادراً فعاصي على وصول وعليه ان يستقبلهم بالمطار ومن ثم سيذهب لموعده .. موعده الذي ربما لن يكتمل!!
////////////////
وصل أخيراً عاصي وجميلة وعمر لمنزل عاصي .. راحة اجتاحت صدر جميلة حين علمت انها لن تقيم بمنزل صفوت الزيان ولا مع تلك الحية نادين .. ما ان وصلوا وفتحت فتيحة الباب مرت ثانيتين فقط قبل ان تنطلق الزغاريط منها بفرحة ادهشت جميلة ولكن الابتسامة ارتسمت على وجه عاصي لمعرفته سبب فرحة فتيحة فقد لاحظت ذلك الخاتم الذي يزين اصبع جميلة والذي تعرفه جيداً عن ظهر قلب فهو خاتم صديقتها الحبيبة والدة عاصي .. جذبت فتيحة جميلة لأحضانها بفرحة هامسة لها
فتيحة(بهمس يشوبه الفرحة): مش قولتلك قلبه حبك .. ربنا يهدي سركم يا حبيبتي
تلون وجه جميلة بخجل .. كيف عرفت فتيحة؟!!!! .. جذب عاصي يد جميلة فقد اخبره كريم حين استقبلهم ان ما امره به قد تم .. تحرك عاصي بجميلة للطابق الثاني بعد ان اخبر فتيحة بالاهتمام بعمر وتفريغ الحقائب لتبتسم فتيحة على لهفة ذلك الوحش على جميلته ورغبته في اسعادها
//////////////
يجلس كريم بذلك الكافيه وهو ينتظر ذلك الذي بعث رسالة له .. ترى هل يمكن ان يكون احد يمازحه او يعبث معه .. ترى هل يعرف بالفعل من فعل ذلك بزوجته .. كيف يعرفه .. ولماذا يتحدث معه الآن بالتحديد بعد سنوات من ذلك الحادث اللعين .. ينظر لساعته التي تشير للخامسة .. حسناً أتى مبكرا ولكن السبب لهفته ليعرف .. عقله لا يستطيع التفكير بشئ آخر .. يرتشف قهوته وعينيه شاردة بالطريق .. يتخيل نفسه وقد عرف من فعلها .. يتخيل نفسه وهو ينتقم منه .. يتخيل وهو يعذبه ويتفنن في جعله يعاني كما عاني هو لسنوات وكما عانت من سكنت قلبه فترى هل سيحقق انتقامه؟!
///////////////
يا عاصي واخدني فين بس؟!!
قالتها جميلة وهي تتحرك مع عاصي بدون فهم لأين تذهب .. وقف عاصي امام غرفة ليردف بحماس طفولي
عاصي: غمضي عينيكي
جميلة: نعم!!!
عاصي: غمضي بقا
جميلة(وهي تغمض عينيها بطاعة): طيب اهو
عاصي: اوعي تفتحي .. تعالي
قالها عاصي وهو يمسك بيدها ويدخلها تلك الغرفة بهدوء
جميلة: افتح؟
عاصي: لا لا استني
جعلها عاصي تتوسط الغرفة ليردف وهو يترقب ردة فعلها بحماس
عاصي: فتحي
فتحت جميلة عينيها لتتفاجئ بأن تلك الغرفة ما هي إلا مكتبة كبيرة .. جناح كامل على شكل مكتبة ضخمة .. يوجد المئات بل الآلاف من الكتب .. لمعت عيون جميلة بفرحة وانبهار
جميلة(بنبرة يشوبها الكثير من السعادة): الله جميلة اوي اوي
عاصي: عجبتك؟
جميلة: دي تحفة
عاصي: دي هدية جوازنا
نظرت له جميلة بفرحة مخلوطة بحب لتهمس
جميلة: ليه عملت كدا ؟ دا كتير اوي
عاصي(بابتسامة عاشقة): مافيش حاجة كتير عليكي
جميلة: بس انت عرفت ازاي اني بحب القراية!!
عاصي: انا لاحظت لما كنا في اسكندرية وفي البيت القديم اللي هنا ان كان فيه مكتبة ولما روحنا بيتي اللي في ايطاليا لاقيت عينيكي لمعت لما شوفتي المكتبة ف عرفت انك غاوية القراية
جميلة: ولحقت تجهز كل دا امتى؟!
عاصي(بنبرة يشوبها الغرور): الظاهر انك لسة مش عارفة انتي متجوزة مين
لمعت عيون جميلة بفرحة وابتسمت بهدوء ليقترب عاصي منها ويمسك بيديها مردفاً بنبرة عاشقة
عاصي: اهو انا علشان ابتسامتك دي مستعد اموت
جميلة(بلهفة): بعد الشر عنك
عاصي(وهو ينظر لعينيها بعشق): تعرفي يا جميلة .. يوم ما نطيتي ورايا في البحر حسيت ان روحي بتتسحب مني .. نسيت ساعتها كل التعب اللي كنت فيه وبقيت بحارب علشان اوصلك حتى لو دا اخر حاجة اعملها .. لما رجعنا البيت وهدومك كانت غرقانة ماية وبتهلوسي حسيت بقلبي بينخلع من بين ضلوعي .. لما الدكتور طمني عليكي حسيت كأن روحي ردت ليا تاني .. انتي احتليتيني يا جميلة .. احتليتي كياني .. بقيت بتنفسك
احتضنته جميلة ودفنت رأسها بأحضانه فكلامه ذلك دغدغ مشاعرها وجعل دقات قلبها تضرب بقوة كالساعة العملاقة أما هو فلف ذراعه حولها يضمها اكثر لصدره وكأنه يريدها ان تدخل بداخله ويخبئها عن العالم اجمع فلا يراها غيره ولا يحبها غيره .. مرت بضع دقائق وفتحت جميلة عينيها وكأنها استوعبت شيئا للتو لترفع رأسها وهي تردف
جميلة: عاصي
عاصي: ها؟
جميلة: هو مين غيرلي هدومي لما طلعت من البحر؟
عاصي(بتلقائية): أنا
جميلة: انت؟!!
عاصي: ايوة ماتقلقيش انا اللي غيرتها
جميلة(بنبرة يشوبها الغيظ والغضب المخلوطين بالخجل): أنت اللي غيرتلي هدومي!!
صمت عاصي لثواني يستوعب سبب غضبها ليُنير عقله عندما فهم ما تقصده
عاصي: ااااااه .. انتي قصدك.. جميلتي انا عاصي الوحش .. بقتحم اماكن وبفك مسدسات وبغطس لفترة طويلة من غير نفس وبفك اعظم كلبش .. تفتكري هيكون صعب عليا اغيرلك هدومك وانا مغمض عيني
نظرت له جميلة بشك ليردف
عاصي: انا مابقولش اني كنت مغمض عيني بس...
قبل انا يكمل جملته اندفعت جميلة نحوه تلكمه بيدها وهي تردف
جميلة(بغيظ يشوبه الخجل): سافل وقليل الادب وماشوفتش ثانية تربية
كان عاصي يحاول تفادي لكماتها وسط ضحكاته التي زلزلت قلبها ليقوم بتكتيف يديها خلف ظهرها ويجذبها ليلتصق صدره بصدرها هامسا
عاصي(وهو ينظر لها بخبث): دا احنا قلبنا قوي ومابقناش بنخاف
احمر وجه جميلة بخجل من حركته المفاجأة وقربه منها بذلك الشكل لتضغط دون وعي من على شفتيها ليردف هو بخبث
عاصي(وهو ينظر لشفتيها): انا مش قولتلك المرة الجاية بعقاب
انتبهت جميلة لجملته وقبل أن تعترض او تحاول الابتعاد اسرع هو بوضع يد اسفل ركبيتها والاخرى على ظهرها ليحملها بين يديه بخفة كالريشة لتتمسك برقبته بتلقائية وهي تردف بارتباك
جميلة(بارتباك وخجل): انت .. رايح بيا فين؟
عاصي(بنبرة خبيثة): ولا حاجة هنعمل بروڤة لشهر العسل
قالها بغمزة عابثة وتحرك لغرفته بهدوء .. غاب الوحش مع جميلته في دنياهم الجميلة التي بدأوا في وضع ركائزها فهل سيستطيعون ان يبنوها بعيد عن ظلام عالمهم ام سيطيح القدر بهم في دومات وصراعات عديدة بالتأكيد ستؤثر على حكاية الجميلة التي عشقت الوحش
كاااااااااااااااات .. كفاية كدا النهاردة