Dayukdok ng putikan,
Impit ng kahirapan—
Pasan ng karamihan?
Nasa'n ang katarungan
Nitong ating lipunan,
Binusalan ng yaman?
'Di patas na timbangan
Naka-angkla sa yaman—
Pabor sa mayayaman?
Bulsang nagtatabaan,
Kawastuan ay lulan—
Buwal-katotohanan?
Pangangatog ng laman—
Dikta ng tampalasan;
Inakong kasalanan?
Walang katotohanan,
Huwad na katauhan—
Ang s'yang niluluhuran?
Timbangan ay busalan,
Hustisya'y piniringan;
Dehado— angkan ni Juan?
Bituka nitong Bayan,
Halang ang patakaran;
Baldado ang kat'wiran?
Perlas ng Sinilangan,
Sinilang tampalasan—
Nasa'n ang kalayaan?
Bayan ng karimlan
Ang dapat na pangalan:
Pugad ng kaapihan?
Sintas-kinabukasan
Marahang pinutikan,
Nitong nasa upuan?
Wala sa'tin, sinoman—
Ang dapat na magtangan:
'Di patas na timbangan!
BINABASA MO ANG
Mga Tulang Pinanday ng Talinhaga
PuisiAng mga tulang tampok ay masusing hinabi ng malikot na pag-iisip na tumatalakay sa iba't-ibang isyu sa lilim ng lipunan. Naisulat ang koleksyong ito sa panahon ng kwarantina. Kung may pagkakatulad man sa totoong pangyayari, pangalan o lugar ay pawan...
