بسم الله الرحمن الرحيم
قبل نبدأ في قراءة الرواية حابة اقول انه الرواية دي قيد الكتابة .. يعني ان شاء الله اول ما الكاتبة تنزل بارت انا بانزل ..
قراءة ممتعة
ــــــــــــــــــــــــــــــــــــــــ
_رحاب، يا بت رحاب تعالي ألحقيي سرييعععع
*على صوت كوراكها دا انا دخلت فيني خلعة، ونزلت تحت بسرعة ووراي مثاني، ومشيت اشوف الحاصل عليها شنو*
_في شنو يمة؟ بسم الله الحاصل شنو؟
_هاك التلفون دا الدكتور قال عايزك مستعجل
_طيب اديني.. الو وعليكم السلام يا دكتور مصطفى، شنو؟ طفل؟ طيب انا جاية حالاً ما تلفت وتلقاني جنبك يلا يلا...
*قفلت الخط وجدعت الموبايل، بصراحة ما كنت منتبهة لبست العباية كيف عدلة قلبة اللهم بسس، وما قدرت، أفرز اللحظة ديك كنت حاسة بتوتر ولا خوف ولا شنو، لفحت اللابكوت والتلفون، وجريت على الشارع ركبت ركشة، بقيت بهز في رجلي وبقول لسيد الركشة يسرع، لحدي ما وصلت هناك، ونزلت دخلت زي المجنونة... *
_دك دكتور مصطفى وين وين الطفل؟
_جوة جوة أدخلي
*بعد مرور ساعة، لما هديت حالة الطفل وقدر يستعيد نشاطه، طلبت من أهل الطفل يجوا داخلين، بصراحة الغريبة كان الطفل ما ببكي بصوت عالي ولا بصرخ زي كل الأطفال، لا بالعكس كان ببكي بس بدون صوت، وبيسكت مرة تانية، وانا شايلاه بلعب فيه وهديته بسكويت عشان اخفف عنه، جوني اهله داخلين، كانوا مرة وراجلها ظاهرين صغار في العمر، وناس تبارك الله زي ما بيقولوا مروقة... *
_السلام عليكم
_وعليكم السلام ورحمة الله، اتفضلوا
_يا دكتورة، طمنينا على الصغير دا ياخ
_والله يا استاذ ياهو هسي حلاته فل الفل، هو بيعاني من ثقب قلب صح؟
_ايوة من اتولد للصراحة
_طيب لمن كنت بترضعيه حصلت ليه مضاعفات زي دي؟
_لالا والله يا دكتورة، ما كان مؤثر عليه للدرجة دي
_أهممم طيب طبيعي تحصل ليه مضاعفات زي دي لمن يكبر الضغط حيبقى عليه اثقل، وهو أبكم؟
_ايي
_هسي انا بكتب ليه ادوية يلتزم بيها، ولو قالوا لي ما اخدتها بزعل منك يا شطور سمح؟
*كتبت ليه الأدوية واديتها لاهله، الصراحة حبيت الطفل شديد وبالجد حنني وحننتني روقته وبسمته البريئة، وارتحت جداً بعد ارتاح لي، اخدوا الطفل وروشتة الادوية ومشوا تشكروني جداً، بقيت قاعدة ولفيت بكرسيني لفة، واخدت نفس، وسمعت صوت دق الباب، رفعت راسي ولقيت دكتور مصطفى واقف... *
_ممكن ادخل؟!
_اكيد اتفضل يا دكتور
_طيب، اااه يا دكتورة عايز اسألك، ملفات المرضى الاسماءهم كذا وكذا *بيعرض في الأسماء.. * موجودة كلها؟
_ايوة حالياً كنت براجع فيهم بس جات الحالة المستعجلة
_طيب، دكتورة، بتمنى تكوني فكرتي في الموضوع العرضته ليك قبل اسبوع
_دكتور مصطفى، تقريباً انا أديتك اجابة واضحة ومقنعة قبل كدا، ممكن نكون أصحاب، بس صراحة ما عندي استعداد لإرتباط عموماً، بتعرفني ما بحب الإرتباطات خارج نطاق الحلال، وانا عارفاك زول دغري، بس برضه ما عندي استعداد ولا بقدر اناسبك وحأظلمك معاي، ربنا يديك بت الحلال الأحسن مني والتسعدك، وهسي عن إذنك عندي ملفات ضرورية اراجعها عشان بكرة حأستقبل اصحاب الحالات، يلا...
*قمت من الكرسي وشلت حاجاتي الجات معاي، بالإضافة لإنه في ممرضة جات ودخلت أدتني ملف الطفل الكان معاي قبل شوية، فشلته معاي وطلعت ركبت ركشة، الطريق كله كنت بفكر في الطفل، ما بستقبل حالات أطفال كتير، غالب البستقبلهم بيكونوا كبار السن، وصلت البيت وكانت الحتة كلها ظلام، عرفت إنه الكهرباء قطعت، دخلت البيت ولقيتهم قاعدين في الحوش، ورياض ورنا مشغلين الكشاف بذاكروا، وأمي وأبوي بتناقشوا بحدة بس من غير صوت عالي... *
_رحاب، الله جابك يا بتي، تعالي شوفي أبوك دا
_ماله ابوي يمة؟
_تعالي فهميه إنه ما صح الهو بيعمل فيه دا
_بنيتي الفنجرية، تعالي بس النفهمك أمك دي ما حتفهم كدا
*مشيت وقعدت قصاد سريره في الأرض، وقلبي كان مقبوض من العايز يقوله... *
يتبع🤎
