*رحاب*
*فتحت عيوني ببطء كدا وشايفة طشاش طشاش، شوية كدا واتضحت الرؤية، كان المحل الحوليني أسود وغريب، بقيت بتلفت واعاين، واسأل نفسي انا وين؟ ودا شنو المكان الغريب دا؟ عاينت لنفسي ولقيت اني مربطة بحبل قوي مع كرسي، لدرجة جسمي كان بيوجعني، بقيت بتهز على أساس أرخي الحبل دا واتفك، فجأة سمعت صوت تصفيق جاي اتجاهي واتسمرت من غير حركة، وكل ما ليه يقرب، شوية شوية وش الزول بدأ يظهر، اول ما اتضح وبقى قريب اتصدمت...*
_انت؟؟؟؟
_ايوة انا يا بت عبد الرؤوف، مصدومة ولا شنوو؟
_دا شنو دا؟ وانا وين يا حقير السمح ليك تعمل عملتك دي منو أصلاً
*ضحك ضحكة خبيثةة كدا، وضرب يد الكرسي بتاعي بقوة وقرب، نظراته كلها كانت خبيثة وفيها حاجة من الغضب...*
_انا يا بت عبد الرؤوف ما محتاج إذن عشان اعمل الحاجة العايز أعملها، فهمتيني ولا لأ
_وانت عايز مني شنو؟؟
_أووو، عايز منك كتير شديد، انتِ الطريق الحيوصلني لانتقامي، بس انتِ من أولها كنتِ عارض لمن رفضتي الزواج، ودي غلطتكك الحتتحاسبي عليها
_دقيقة؟ انت بتتكلم باي منطق؟ وأي انتقام انت مجنون أو شيء؟ بعدين كوني رفضت الزواج دي حاجة ما بتحاسبني عليها انت فهمت؟؟ وفكني أحسن ما تندم
*رجع وضحك بنفس الطريقة الضحك بيها...*
_لا بالجد انتِ واحدة غبية، هه افكك؟ احب ارحب بيك في مقر حيدر عبد الباقي في نيويورك، اهلاً بيك، زوجتي المستقبليةة
_نعمم؟؟ انت مجنون؟ واعي للبتقوله دا؟ دا ما لعب بالمناسبةة احسن ليك فكني خليني أرجع بدربي
_ترجعي وين؟ السودان؟ ولا لأهلك الودعتيهم من غير ما تحسي؟؟
_ياخي بطل كذب وجنون "صرخت في وشه.." وفكني أحسن ليكك
_ما مصدقة صح؟ طيب تعالي معاي اتفضلي..
*فك لي رباطي ومسكني من يدي بتعصيب كدا نفضتها منه، مشيت قدامه وهو مشى وراي طلعت برة لقيت حتى شكل الدنيا دي غريب، انا في مكان ما بيشبه السودان خالص، بقيت بعاين وبتلفت لما شفت لي ناصية من بعيد من فوق ليها علم أمريكا، حسيت إني بقيت ما قادرة أستوعب اي شيء ومسكت راسي، هل انا فعلاً في امريكا؟ لأ مستحيل أكون في أمريكا، كان بيضحك بأعلى صوت عنده وانا خاتة يدي في راسي ومصدومةة، صوته بقى لي مزعج جداً جداً فغطيت اضاني، كل الشايفاه قدامي هسي صورة امي واخواني، لحظة كانت بالنسبة لي خيال خيال، كيف يعني انا في نيويورك بعيد منهم؟، رجعت خطوة لورا، وانا بصرخ "لااااا" افكاري بقت تودي وتجيب، طوالي جريت عليه ومسكته من رقبة قميصه، وبقيت بصرخ عليه...*
_يا حقييررر جبتني هنا كيف وليههه جبتني رجعني سرييع لناس امي رجعنييي
_هسسس هدي هسي صراخك دا ما حيفيدك بأي شيء يا انسة، وماف مجال ترجعي، انا وصلت لهدفي خلاص
_هدفك؟ هدف شنو انت مجنون؟؟
_دي المرة الكم تسأليني السؤال دا؟ ياخ احفظي اعصابك وما تحرقيها خليك رايقة يا زوجتي
_حيدرررر "بصوت عاالي" تاني أوعك تقول لي زوجتي فهمت ورجعني سريع
_"sava"
***نطق الإسم دا وطوالي طلعوا ولد ومعاه بت مسكوني من يدي، حاولت اتفلت منهم بس كانوا ماسكني بقوة ما قدرت، عاين لي باستحقار، وقال للبت "يجب أن تكون جاهزة اليوم على تمام الساعة الثامنة مساء، لا أريد أي تأخير في موعد الزواج"، البت هزت ليه راسها وقالت ليه"علم" صرخت بأعلى صوتي وقلت" لاااا فكني يا حقير، خليني"، مسكوني ودخلوني جوة ورجعوا ربطوني بكرسي، وربطوا لي خشمي بقطعة سوداء عشان ما أصرخ، كنت بحاول أطلع اعلى حس فيني، وما قدرت، دموعي نزلوا وبقيت ببكي من دون صوت، وبقول "يا الله تساعدني، يارب تنقذني..."
