*سمعت صوت صراخ قوي من برة، طلعت برة الغرفة لقيت ناس كتييرة ملمومة حولين زول، بصرخوا ورجال واقفين راجين يعزوا، عرفتها دي حبوبة وصلت، مشيت ووقفت بعيد مع الرجال شوية، لحدي ما بعدوا منها وكان في فرقة مناسبة أدخل ليها، فسلمت عليها واستلمتني بالأحضان، صبرتها وطبطبت عليها وطلعت مع مازن وانس والجماعة كلهم دقينا الصيوان، وملينا الحفاظات، وهكذا اليوم كان ماشي مليان لحد ما بعد الظهر...*
*من ناحية*
*بلسان رحاب*
*كنت قاعدة في غرفتي في الأرض وخاتة راسي بين رجولي، سرحانة وأفكاري كلها متضاربة في بعضها، رفعت راسي وغمضت عيوني واتنهدت، بقيت مغمضاهم لحد ما سمعت صوت باب الغرفة فتح، فتحتهم وقبلت أشوف منو، لقيتها سماح، قمت على حيلي وسلمت عليها حضنتها مدة كدا، وفكيتها قعدت وقعدتني في السرير جنبها....*
_رحوبتي انتِ كويسة؟
_كويسة ما تخافي
_لا أحكي عليك الله
_ما تخافي يا بت كويسة والله، انتِ كيف؟ الليلة مشيتي الجامعة؟
_أي وطلعت بدري شوية بس لاقاني موقف في الطريق أخرني
_موقف شنو؟
_خليك كدي بعدين بحكي ليك إرتاحي هسي شوفي عيونك كيف، انا مارقة أشوف باقي الناس برة طيب؟
_طيب تمام
*قامت وعايزة تتحرك ناحية الباب، وقفتها بسؤالي...*
_شفتي رياض؟
*سكتت لحظة، وجاوبت لي من غير ما تلتفت علي...*
_لا لسة بشوفه بعدين في الوقت المناسب
*بلسان سماح*
*ما عارفة أنا اتوترت من سؤالها دا ليه، طلعت وسدت الباب ومشيت غرفة أمها وسلمت عليها وعلى رنا الكانت قاعدة جنبها بس، وكان في حجة كبيرة كدا سلمت عليها وعزيتها، وطلعت برة لحقتني رنا ووقفتني...*
_سماحوو
_رنوية الحلوة، كيفك الليلة؟
_بخير الحمد لله انتِ كيف؟
_كوويسة حمد لله، ماشة وين؟
_المطبخ، ماشة أشوف بقية الناس شغالة شنو
_طيب سمح، انا مصدعة وتعبانة
_امشي لرحاب في الغرفة هناك براها،وأنا بجيب ليكم الأكل والعصير ارتاحي شوية
_حاااضر يا أحن مرت أخو
*وضمتني،لحظة قالت جملتها دي قلبي بقى يضرب شديد...*
_يا بت دا شنو البتقوليه دا، أمشي جوة وارتاحي يلا
_سمح سمح
*فاتت هي الغرفة وأنا مشيت المطبخ، سلمت على مرافي ورصيت الأكل وشلت جك عصير مشيت على الغرفة لقيت رحاب بتدلك لرنا في راسها، ختيت ليهم العصير والأكل ووصيتهم ياكلوا كوويس، وطلعت رجعت تاني اشتغل مع مرافي والجماعة...*
*بلسان رحاب*
*بعد دلكت لرنا راسها بالزيت، غسلت يدي وكلمتها تاكل وتسبقني وتاخد مسكن وتنوم شوية...*
_ اااا وصحي بعد كدا لازم تمشي المدرسة انتِ
_يخخ ما ماشة ولا عندي نفس أمشي
_ ما ينفع الكلام دا خالص، لازم تمشي يا رنا عشان على الأقل التعب التعبه أبوي ما يروح، ولا كيف؟
_صح، طيب ان شاء الله
_يلا أكلي وأرقدي شوية، ماشة أشوف أمي أخدت أدويتها ولا لأ وأقعد مع حبوبة شوية
_طيب
*طلعت برة وسديت الباب، غسلت يدي من الزيت الفيها ونفضتها مشيت غرفة أمي، بستها في راسها وسلمت على حبوبة، طلعت المطبخ جبت شوية أكل لأمي وحبوبة...*
_أكلوا سرعة ما تقولوا لي ما عايزين، يمة عشان حبوبك كمان، وانتِ يا حبوبة لازم تاكلي كمان عشان صحتك
_بنيتي الدكتورة، خليني يا بتي ياخ
_لالا يا حبوبة، بعدين انتِ ليه بتعملي كدا؟ أبويا ما مات وذكراه لسة بيناتنا، أنا عارفة إنك كنتِ برة البلد وبعيدة وأي شيء لكن كدا انتِ بتعذبي يابا، وماف زول يعذبه يا جماعة رجاء
_بنية وليدي، سمحح
_أيوة كدا يخخ، يلا يمة ونهائي ما بتقعدي كدا حاسرحلك شعرك
_لا يا بتي...
_قلنا شنو أسي يمة؟
_سمحح
_تعالي اقعدي أكلي ها
_لالا يا حبوبة أنا أكلي هناك في الأوضة خليته، أكلوا ورح
*بقوا ياكلوا وأنا واقفة قبلي، بعد خلصوا رفعت الصينية وديتها وقعدت سرحت لأمي شعرها وجمكته ليها اتنين، دلكت ليها رجليها وأديتها الحبوب أخدتها، مرقت بعد اطمئنيت عليها خالص، مشيت المطبخ اشتغلت مع البنات، لحدي المساء كدا شغالين، بعد المغرب كدا اتلمينا كلنا في غرفتي ورنا كانت صحت في الوقت ذاته، وبقوا بيتونسوا، بنتذكر أبوي ونترحم عليه، سماح قامت على حيلها عايزة تمرق، فنادتها إيناس(أخت أنس ود خالتي)....*
_على وين يا مزة بدري كدا؟
_بدري من عمرك، لازم أمشي البيت بعد كدا
_أقعدي شويةة يخخ
_ما بقدر والله اتأخر على أمي لأنها براها
_طيب تمام ما تنسي تجي تاني
_عان ما بتمشي براك والله
_رحاب يا بت عادي
_عادي شنو؟ والله ما بتمشي براك
_يا بت خلي بمشي براي والله ما فيها شيء
_لا فيها
_وووب
_خلي رياض يوديك
_رياض؟ رياض شنو يا بت جنيتي؟
_لا ما جنيت، ورح معاي ليه
*قبل ما تنطق بكلمة سقتها، ولحسن الحظ نحن مارقين كدا لاقينا رياض في طريقنا، فكلمته يوديها....*
_طيب تمام
_يلا أنا ماشة، دقيقة زي في زول بناديني بالباب الخلفي أشوف في شنو
_يلا طيب
*نداء بصوت رنا*
_يا بت يا رحاب، تعالي شوفي منو الجاك
_جاية جاية
*بلسان رياض*
*وأخيراً شفتها، وأخيراً عيوني شافتها ونفسي ارتاحتها، كنت واقف بتأمل فيها ساعة، نزلت رأسها وهمست لي بصوت واطي "رياض، ورح الناس بعاينوا ليك"، انتبهت على نفسي وطلعنا، ركبنا سواء مواصلات والطريق كله بتأمل فيها، ما عارف ليه أنا مرتاح معاها جداً، لمن نزلنا وبقينا ماشين على رجولنا، كسرت الصمت الكان بيناتنا طول الطريق...*
_سماح
_نعم
_كويسة؟
_الحمد لله، انت كويس؟
_كويس الحمد لله
_حمد لله، استنى هنا يا رياض دقيقة
_طيب
*وقفنا جنب بقالة هي دخلت وأنا وقفت برة مستنيها، لحد ما جات طلعت شايلة معاها كيس...*
_تعال أقعد هنا شوية في المصطبة دي
_ليه؟
_بس تعال
_طيب
*قعدنا،اتأملت السماء فجأة لقيتها مدت لي سندوتش ومعاه كرستالة عصير، استغربت وعاينت فيها...*
_ما تعاين لي كدا أنا عارفاك ما أكلت شيء من الصباح
_وكيف؟
_المهم عارفة ما شغلتك، وحركة دفعت دي ما تتعولق فيني اعتبر دا حق المواصلات الدفعته لي، شيل ياخ
*شلته منها، ولسة بعاين فيها مستغرب، كيف عرفت إني ما أكلت من الصباح؟،بديت أكل وهي بتاكل وبتعاين بالناحية التانية...*
*بلسان سماح*
*موترني شديد بنظراته دي وما قادرة أعاين ليه، بعد خلصنا اتقدمنا تاني لحدي ما وصلت البيت، ودعته ودخلت جوة، بس أول ما دخلت....**
يتبع...🤎
