*قلبي كان مقبوض من العايز يقوله، فشبكت يديني مع بعض وهزيت ليه راسي عشان يحكيي...*
_أها يا بتي، الموضوع....
*فجأة جات الكهرباء قبل ما يتم كلامه، ورنا صرخت ورياض ضربها بالشيت حقه، وعملت لي بوسة عبر الهواء... *
_ياخ مح مح والله رجلك باردة عديل كدا
_هههخخ سمح امشي امشي جوة يلا تمي باقي قرايتك، وانتظريني لحدي ما اجي اسرح ليك شعرك تمام؟
_حااااضر
_يلا يلا كنتِ عاملة لي زحمة ذاته
_رياض اسكت احسن ليك
_امشوا جوة يا أولاد يلا
_حاضر يا حاج
*كل واحد لملم دفاتره وشيتاته وكتبه ومشى على غرفته، فضلنا أنا وأمي وابوي في الحوش... *
_احكي يابا
_يا بنيتي، إنتِ عارفة عمك مراد دا بته النينة حتعرس، فقررنا أنا وهو نقوم بكرة عطبرة، الواجب يا بتي مستنينا ياخ
_ابوي ضروري تمشي انت؟ طيب رجليك يابا هناك ماف زول حيهتم بيك تمام
*ابوي كان استاذ جغرافيا زمان، وزمن كان بيقري كان في رحلة استكشافية لطلاب أدبي في واحدة من المدارس الكان بيقري فيها، وكان مشرف عليها هو، في الوقت داك أبوي صحته كانت تمام، بس شاء ربنا في الرحلة دي حصل حادث بالسيارة حقة المعلمين، في منهم الماتوا، ابوي الحمد لله ربنا كتب ليه عمر جديد، بس رجع لينا وهو مشلول، ومن الزمان داك وهو متقاعد، كانت اخر سنة لي في الجامعة، اتخرجت والحمد لله وضعنا كويس حالياً... *
_يا بتي أكان على رجولي هينة، اخوي وعارفه ما بقصر مني، وواجبه علي حررم ما اخليه
_يابا
_ها يا بتي، انتِ واعية كلمي أمك دي
*اخدت نفس طوييل، وهزيت ليه براسي.. *
_عارفاك يا ابوي، عارفاك زول حارة وضراعك اخدر، ربنا يتم ليها على خير، بس اوعدني تهتم بنفسك
_أوعدك على طوول يا بتي الله يخليك ياخ
*باسني على جبيني، وابتسمت ليه ابتسامة باهتة كدا... *
_أمري لله، خلي بالك يا عبد الرؤوف، النقوم نستف ليك شنطك
_ايوة كدا يا ام رحاب، ما تخافي ما بيحصل شيء ان شاء الله، انتوا كمان حتجوا هناك قريب..
_اي ان شاء الله، حامشي اسوي ليك العشاء
*اتحركت على المطبخ وامي اتحركت تستف شنطه، المفروض علينا كان نمشي مع ابوي بس رنا عندها امتحانات وانا ما بقدر اخلي شغلي حالياً، انا في المطبخ واقفة وشاردة قلبي ما كان مرتاح لسفرة ابوي دي نهائي، وبرضه حسيت بأمي ما مرتاحة، بس ابوي وانا بعرفه لازم ينفذ الفي باله، بقيت بحضر فيه لحدي ما انتهيت، رصيته في الصينية ومشيت بيه في الحوش واتلمينا كلنا للعشاء، قمت أول واحدة من الصينية ما كان عندي نفس، قمت وغسلت يدي، ومشيت على غرفتي انا ورنا، بقيت قاعدة وماسكة جزء من الملفات بقلب براجع فيهم، لحدي ما جات رنا، وقعدت لي في رجولي سرحتها ونامت، ااه صح، رنا ممتحنة شهادة سودانية، ورياض في تانية جامعة، بقيت مساهرة مع الملفات لحدي ما خلصتها، رتبتها ونمت... *
*في الصباح *
*صحيت بنفس الروتين المعتاد، صبحت على أبوي وبسته على جبينه وودعته، واخدت رضا أمي، وطلع معاي رياض كالعادة، هو مشى على جامعته، وانا وصلت المستشفى وبديت دوامي، كنت شغالة كويس، لحدي ما جاء الظهر بس.... *
يتبع🤎
