*سماح*
*حسيت بحيلي اتهد من كتر الضرب والبكاء، امي قالت لي خليك حاجيب ليك موية عشان تهدي، طلعت برة وانا تاكية في الحيطة بعدم حيل، جاتني عزة قالت لي سماح سماح تعاليي...*
_في شنو؟
_تعاليي بس
_طيب
_دقيقة هاك الطرحة دي قبل ما تمرقي
_طيب
*شلت الطرحة وجدعتها في راسي جدع بس، مسكتني من يدي وطلعنا برة، لقيت رياض واقف مع أمي وعنان، لما شافني وقفت بعيد ونزلت راسي تاني ببكي، جاء علي ومسكني من معصمي، وجراني عليه ضماني، بقى يهدي فيني...*
_سمااح، يعني أنتِ مفتكرة حتبقي لزول غير رياض؟؟ لا والله
_انا تعبت يا رياض كل العارفاه اني تعبت
_ما عاش اليتعبك، سماح وحاة الخلقني وختاك في قلبي، لغيري ما حتبقي، وانا حالف
*فجأة عمي جاء داخل ومعاه وليد، رياض لما شافه فكاني ومشى عليه، مسكه من رقبة قميصه وكان غضبان شديد وبيصرخ فيه...*
_انت كيييف تسمح لنفسك أساساً ترفع يدك عليها؟؟؟
_احترم نفسك يا ولد(بنبرة عالية) انت منو ذاتك وجاي من وين تهددني في نص بيتي؟
_انا القلت عني ولد شوارع وحابيها
_اااا بالله، وجيت مثلاً عشان تحضر عرسها يا الخايب؟؟
_احترم نفسكك، جيت هنا عشان لازم تعرف انك ما لازم تلمس شعرة منها تاني، وإلا ما عارف العواقب حتكون شنو
_اطلع من هنا ياولد، وسماح لغير وليد ولدي ما بتبقى فهمت؟؟
_هه، وانا جيت عشان تعرف انه سماح لغير رياض عبد الرؤوف ما بتبقى، سماح حبيتها عشان تبقى لي، ما عشان تبقى لزول غيري
_هه، شافع بالله داير تعمل شنو مثلاً
_عاين اختانا يا بتاع سماح دي بت عمي ولغير ود عمها ما بتبقى
_كلمة رجال؟
_كلمة رجال
_طيب تمام الليلة حنعرف منو فينا الراجل... عناان
_تمام ثواني
*عنان جابت ليها علبتين حمر كدا، ومدت لرياض واحدة، رياض فتحها وكان فيها دبلة، عمي ووليد اتصدموا لما شافوها، رياض قبل علي، ومد لي يده، وانا برجف مديت يدي، شال الدبلة ولبسني ليها، عنان فتحت لي العلبة التانية ومدتها لي عشان أشيل الخاتم، بقيت بعاين في رياض، وفي عمي الحسيته شوية وحيكسر الصالة الواقفين فيها دي، عنان شالتها ومسكتني ليها، بيد راجفة دخلتها في يده، عنان صفقت وقالت بصوت عالي"انتصرنااااااووو"، بقيت بعاين لرياض الكان بعاين لي بنظرات انتصار، الدموع في عيوني بس الفرحة الجواي برضها كانت ما بتتوصف، بجد حمدت ربنا ألف مرة على اللحظة ديك، وقبلت على أمي وعزة العيونهم كانت مدمعة وبيضحكوا، جريت على أمي وحضنتها وحضنت عزة، فجأة عمي وولده جوا على رياض عمي أداه كف بكل قوة، ومسكه من رقبة قميصه، لدرجة حسيت حيخنقه، بس رياض وقف بكل برود بعاين ليه...*
_يا واطي يا حقير يا....(أكرمكم الله) انت كيف تسمح لنفسك تخت خاتم في يدها منو انت؟ الليلة والله ما بخليك
_حتعمل شنو يعني؟ خطبتها قدامك وخلاص، بعدين شوف أبوي سيدك وسيد أمثالك، أوعك تجيب سيرته بالعاطل تمام؟
_اجيب سيرة ابوك وسيرة سيرته ذاته
_احترم نفسكك، وإلا والله أنا عملت الخطوة الأولى بس لو نفذت التانية اتأكد انك حتدمر تماماً، فمراعاةً لإنك عم سماح أنا ساكت
_كويس الليلة قايلني بخليك...
