*رحاب*
*ما قدرت انوم الليلة ديك بسبب الفرحة، كنت حايمة في الغرفة يمين شمال، لحدي ما جاء وقت الفجر، دخلت الحمام جوة اتوضيت، اتخميت لي بحاجة ما عرفتها هي ملاية ولا شنو بالضبط كدا، لفيتها زي التوب فيني، وقفت متحيرة، بتلفت، هسي القبلة بتكون وين ذاته في بلد الكفار دي؟ أسأل منو ذاتي؟ سيلڤا مثلاً؟والله محن، عاينت بالشباك شفت نور جاي من تحت، فتحت الباب قلت عسى ولعل القى لي زول يوريني القبلة على وين، نزلت الصالة لقيت سيلڤا بتستقبل ليها في زول وبتقول ليه تفضل سيدي، لمن عاينت لقيته استاذ وقاص، في اللحظة ديك ما بين ما مصدقة ودايرة اطير من الفرح، جريت عليه أول حاجة شلت منه فارس مع أنه كان ناايم بس ما ريحته حتى،شلته ووقعت فيه بوس، وقفت سلمت على استاذ وقاص الكان بيضحك في حركتي الطفولية دي، سألته من أخباره واخبار الكل قال لي كويسين الحمد لله بسس راجيين عودتك بفارغ الصبر، قلت ليه هااانت خلاص اهو بكرة نطلع الفيزا بعد بكرة نرجع إن شاء الله...*
_دكتورة
_اتفضل يا استاذ
_ هو انتِ جيتي هنا كيف ولييه ممكن اسأل؟
_ما عارفة ابدأ ليك من وين حتى، كدي اقعد ثواني أنا كنت عايزة اصلي وبجي بحكي ليك طيب؟ وصحي انت عارف القبلة في بلد الكفار دي على وين؟ وهل ممكن القى مصلاية مثلاً مثلاً؟
_اكييد والقبلة على كدا حسب ما بتذكر، اي اي على كدا( قال كدا وهو بيضحك فيني وفي كلامي وبيأشر لي على محل القبلة وقال لسيلڤا احضري لها سجادة)
_الله يفتح عليك ياخ، ياها دي جابتها مشكوورة
*طلعت غرفتي فرشت المصلاية ووقفت اصلي، بعد ما خلصت استغفرت وسبحت ودعيت ربنا وحمدته، بقيت بتلفت عشان القى لي مصحف اقرا منه اتحيرت القى مصحف وين بالسهولة دي، قريت من الحافظاه في راسي ونزلت تحت، لقيت وسن واقفة وحاضنة استاذ وقاص وبتبكي، استاذ وقاص بعدها منه ومسح ليها دموعها واتنهد، قال ليها ما تبكي ومسح ليها على راسها، وشال فارس الكان نايم على الكنبة، أتلفت وشافني...*
_خلصتي يا دكتورة؟
_اي
_تقبل الله، ممكن نمشي من هناا؟
_ويين؟
_فندق بعيد من هنا كدا، يوم بكرة واللي هو الليلة والبعده إن شاء الله حنرجع..
_وقاص حرام عليك يا وقاص، انت ليك سنين ما شفتني وهسي ماشي كدا؟ قلبك ما حن لأختك يا وقاص؟
_وسن، انتِ عارفة غلاوتك عندي قدر شنو، عشان كدا أنا قبلت ادخل البيت دا تاني، عشان خاطرك وعشان دكتورة رحاب، غير كدا انتِ عارفة اني مستحيل ادخل البيت دا
_وقاص ما تقول لي جيت عشانها هي ولا شيء، هي منو ذاتها؟
_وسن مافي داعي للكلام دا حالياً
_لا في وفي انت اخووي أنا ولا اخوها هيي؟( قالتها بانفعال وبصوت عالي)
_وسن وطي صوتك
*فجأة جاء نازل أدهم ومعاه مرته، كانوا مخلوعين وبيسألوا في شنو والصوت دا لشنو؟ أول ما شافوا استاذ وقاص اتصمغوا في محلهم، وبقوا بعاينوا ليه بنظرات غريبة، فجأة ابتهال بدت تدمع، وبتقول ولدي وقاص ولدي، استاذ وقاص قبل وشه ناحيتي وقال لي يلا، مشينا خطوتين كدا وسن جات حاجزتنا بيدها،قالت ليه وقاص فهمني هي هاماك هسي اكتر من عيلتكك؟ هنا استاذ وقاص انفعل، وصرخ...*
_اي عائلة يا وسن؟ عائلتي الاتبرت مني مثلاً؟، الأربعة سنين ما سألوا مني؟ إذا أنا حي او ميت؟ وسن عليك الله خليني في سبيل حالي رجاءً
