*فجأة سمعت صوت جوطة وصراخ جاي من جوة، ختيت الكباية الفي يدي ومشيت جوة بسرعة أشوف الحاصل، لقيت عمي ومرته واقفين في الصالة وهو كان واقف بصرخ عليها، استغربت وما فهمت أي حاجة، مشيت على أمي الكانت واقفة خاتة يدها في راسها، وبتحاول تدخل توقفه عن صراخه دا، بس ما قدرت، سألتها من الحاصل...*
_يمة دا شنو دا؟ الحاصل شنو؟
_عاد يا بتي ما عارفة أقول ليك شنو ذاته، متشاكلين في موضوع قديم
_كيف يعني قديم؟ هو شنو ذاته؟
_خليه على جنب هسي ما مهم، خلي عمك دا يهدأ لأنه كدا لو استمروا كدا لبكرة ما يسكتوا
_دقيقة دقيقة
*مشيت مسكته، نفض يدي في الأول تاني سحبته بقوة كدا، ووقفت حاجز بينهم الإتنين...*
_عمي استهدأ بالله في شنو؟
_ياخي ما ممكن هي تكون بالأسلوب البشع دا، شايفة؟ شايفة البتتكلمي عنها بالعاطل بتدافع عنك كيف؟ "بنبرة نهرة حادة كدا"
_لا ياخ؟ لمن تعرف أصلها من فصلها تعالوا اتكلموا لي بعداك هه بالله
*لوت خشمها ومشت الغرفة بتاعتهم جنب غرفة أمي، وقفت بعاين مستغربة من كلامها دا هي قاصدة شنو، وليه قالت كدا، والسبب الخلاها تجيب سيرتي وعمي يتعصب عليها كدا المرة دي شنو؟، لأن هو كل مرة بيحاول يوقفها بكلمة كلمتين لما يدافع عني، راسي جاط وأسئلة كتيرة بقت بتدور في بالي، عمي اتحرك من الصالة للحوش برة، وأنا بقيت واقفة في النص لسة بفكر في جواب للأسئلة، قطع لي شرودي دا صوت أمي...*
_رحاب يا بتي، أمشي غيري وارتاحي حبة أمشي "وهي خاتة يدها على راسها ودا وترني زيادة"
_يمة كويسة؟
_اي يا بتي ما تخافي أمشي
_دايراك تحكي لي سبب مشكلتهم دي شنو؟
_يا بتي ماضي ما منه فايدة ساي، أنسي
_الماضي دا متعلق بي؟
*سكتت لحظة كدا، حتى جاوبت...*
_متعلق بيك شنو يا بتي أنسي الموضوع دا وأمشي أسمعي كلامي غيري وإرتاحي
*ومشت على غرفتها، فضلت واقفة ما معاي غير رنا، فقررت أسوقها عشان تحكي لي كل الحاصل، مسكتها من يدها سقتها غرفتي وقعدتها جنبي في السرير...*
_الحاصل شنو يا رنا؟ اتشاكلوا في شنو هم أصلاً؟
_والله ما بعرف نهااائي ما كنت معاهم، لكن ونستهم كانت عادية تقريباً، كانوا بيتكلموا مع أمي ولمن جيت داخلة أدي أمي حبوبها سمعتها بتقول ليهم "عاد يا يمة رحاب سوت ليها ناسات، بتك دي يا سناء خليها عليك" أديت أمي الحبوب وجيت مارقة، من قالت جملتها دي ابتدأ النقاش ووصل للدرجة دي
_بس؟ ما طيب هي طوالي بتتكلم علي كدا وهو بيوقفها بس ما كان بيعصب كدا، الاستجد شنو؟
_ما عارفة والله
_طيب قومي أمشي لمذاكرتك
_طيب
*طلعت وسدت باب الغرفة، بقيت قاعدة بنفس قعدتي دي دقائق كدا، واستغفرت ودعيت ربنا يهدي الجميع، شلت ملابس من دولابي وطلعت للحمام اخدت حمام كدا وجبت الهدوم غسلتها وشريتها في الحبل، سألت رياض من يومه ومن سماح قال بخير الحمد لله، ومشيت لرنا كانت عندها شوية مسائل في الرياضيات اشتغلتها معاها، ورجعت غرفتي مسكت التلفون بدردش، جاتني رسالة من رقم...*
*من ناحية*
*بلسان سماح*
*أثناء ما أنا بتكلم مع أمي كدا، ماشة بين الناس كدا ضربت في واحدة بالغلط، نزلت سماعة التلفون من أضاني...*
_معليش آسفة ما قاصدة؟
_هو كل مرة انتِ ما قاصدة يا أم لسان وقح؟
*استغربت جداً دي منو المتكلمة بس صوتها ما كان غريب علي، أول ما إتلفتت اتفاجأت، كانت هي ذاتها البت بتاعة موقف السيارة...*
_انتِ؟؟
_آي أنا هه اتذكرتيني ولا لسة؟
_يعني يا أياً كان إسمك ممكن تصلحي أسلوبك دا شوية في الكلام؟
_إسمي سارة يا متخلفة، أنا ما بتكلموا معاي بالأسلوب دا
_لا دقيقة ممكن أسألك فاكرة نفسك منو؟ يعني بالجد دي ما طريقة تتكلمي بيها مع الناس، أنا بحاول أتكلم معاك بكل هدوء فالأحسن نتجاوز
_انتِ بتوريني طريقتي الأتكلم بيها؟ أحسن ليك ما تتجاوزي حدودك
_منو فينا الاتجاوز الحدود هسي؟
_انتِ طبعاً
*طبعاً بقيت بعاين ليها بس مت دون ما انطق بكلمة، استغفرت عشان أقدر اتمالك أعصابي، فجات بت تانية وقفت جنبها ختت يدها على كتفها، وبقت تعاين لي بطريقة مستفزة...*
_دي منو يا سرو؟ "سؤال بطريقة استهزائية كدا"
_تتذكري بت الطريق الحكيت ليك عنها وعكرت لي مزاجي؟ بس دي ياها
_جد؟ أو My God طلعت بتقرأ في نفس الجامعة شوفي جنس الصدف البايخة دي
*كانوا بيتكلموا بطريقة مايعة شديد وكل كلامهم مطاعنات، كل العملته إني عملت رايحة واتجاوزت اديتهم ضهري وكنت ماشة، ماشين قدامي وهي بتعاين لي بنظرة مستفزة، حولت عيوني منها وبقيت ماشة في طريقي، لحدي ما طلعت من الجامعة، ومشيت البيت، لقيت المفاجأة...*
يتبع🤎
