*رحاب*
*استغربت وفتحت طلب المراسلة، لقيتها كاتبة "سلام،رحاب كيفك؟ لو سمحتي أنا عايزاك في موضوع ضروري وما بيقدر يساعدني فيه حد غيرك.." هنا اتحيرت زيادة، اساعدها انا؟ وليه أنا بالذات؟ رديت عليها "وعليكم السلام والرحمة، نحمد الله بخير، اتفضلي خير ان شاء الله؟.."، على كدا طلعت من الفيس مدة ما عارفة قدرها كم، قعدت بتونس مع الجماعة، تاني رجعت للفيس لقيتها كاتبة لي "ممكن تقبلي الادد؟ عشان عايزة أكلمك كول ضروري، لو سمحتي؟، رديت ليها "طيب" وبعدها قمت من جنبهم مشيت الغرفة جوة وقبلت الادد، شوية تاني جاتني مكالمة صوتية منها، فتحت الخط، وقلت الو...*
*محتوى المحادثة...*
_ألوو، رحاب كيفك؟
_تمام الحمد لله
_بصراحة كدا أنا اتصلت عليك لموضوع مهم، ممكن نتخلى عن أي خلاف بيناتنا حالياً وتسمعيني؟
_وسن، أنا ما بتهمني الخلافات متى ما قدرت أساعدك حأساعدك
_شكراً شديد، طيب هو الموضوع بيخص أمي
_مالها؟؟
_طلع عندها كانسر
*في اللحظة دي ما عارفة ليه بس انا اتصدمت واتوترت...*
_ااه ربنا يشفيها ويعافيها
_اميين، بس اسمعيني، ماما ما راضية تتعالج، وقالت عايزاك أنتِ ووقاص جنبها في الفترة دي، وانا ضربت ليك لأني عارفة وقاص ما حيسمع منيي، بلييز بلييز تعالوا نيوزيلاند احتمال لما تشوفكم تهدأ وترضى تتعالج، أنتِ بتقدري تقنعي وقاص على الأقل لأنه بيسمع منك
_كيف؟ كيف يعني ما راضية تتعالج؟؟
_عدييل كدا اقسم بالله، بلييز بلييز تعالوا(بصوت باكي ونبرة مخنوقة)
_كدي كدي يا وسن اهدي اهدي حاتكلم ليك مع وقاص طيب
_ جد؟ بتتكلمي جد؟
_ايوة ان شاء الله
_بجد بجد شكراً شديد، وانتِ؟؟
_والله يا وسن انا الله اعلم، ما ظنيت اقدر انفذ ليك طلبك دا
_رحااب بلييز بلييز
_وسن...
_انتِ مشكلتك أهلك هناك في السودان؟
_أممم أيوة
_حنعمل ليهم تذكرة كلهم يجوا معاك بس بليز وافقي
_ما هوو
_ رحاااب( ونبرة صوتها كانت باكية)
_ط طيب وسن انا موافقة اهدي اهدي
_ب بجد؟؟؟رحاااب جادة؟؟
_ايوة جادة، بس لازم أشوف رأي أهلي بالأول
_طيب تمام، شكراً شديد، إذا وافقوا كلميني عشان التذاكر تكون جاهزة بعد بكرة
_بعد بكرة؟؟
_بلييز لأن ماف زمن
_طيب تمام تمام
_يلا باي
_مع السلامة
*تييت قفلت الخط، أفكاري اتضاربت في بعضها هسي دا شنو الوضع الأنا دخلت فيه دا؟ أنا مضطرة اني اسافر وأشوف العالم دي تاني يعني؟ اتنهدت وجدعت الموبايل طلعت برة، لقيتهم في ونستهم ديك، قاطعتهم وقلت ليهم يا جمااااعة ثااانية من وقتكمم عندي كلام مهم عايزة أقوله ثانية بسس يا جماعة...*
_مالك يا بت قولي؟
_أولاً، الموضوع دا بيخصنا أنا ووقاص
_رحاب خلي حراق الروح وقولي طوالي
_بيخصنا؟ احكي احكي
_وسن ضربت ليي
_وسن؟؟
_دقيقة دي مش ياها الكنتِ معاهم في أمريكا؟ القالت توأمك الحقيقية وما أعرف ايش؟
_اييي ياها
_ووسن عايزة شنو؟
_وقاص، أمك طلع عندها كانسر
_ش شنوو؟؟(قالها بتفاجأ وانصدام)
_زي ما سمعت، وسن اتصلت وحكت لي القصة كلها، وقالت ما راضية تتعالج إلا أنا وأنتِ نكون موجودين معاها
_كيف؟ كيف يعني من متين الكلام دا؟ وبعدين كيف ما راضية تتعالج إلا نحن نكون موجودين؟
_ما عارفة من متين دا كل الكلمتني بيه
_سجمي يا بت هيي القال ليك بتقول في الحقيقة منو هي؟
_والله يا مثاني زيي زييك ما عارفة بس نبرة صوتها كانت واضحة وحقيقية فعلاً، قلت شنو يا وقاص؟
_ما عارف انا ما قادر أفهم اي شيء حالياً، كدي دقيقة اتكلم مع وسن دي
_طيب تمام
