*الصبح صحيت على صوت المنبه جنبي، صحصحت وقفلته، نزلت من على السرير وطلعت الحوش اتوضيت ولبست عبايتي بتاعة الصلاة وفرشت مصلايتي وبديت أصلي، بعد خلصت جريت المصحف ناحيتي وبديت اقرأ، سرحت مع التلاوة كدا لحدي ما الواطة بدت تفتح، فوقفت وطبقت المصلاية ختيتها ع تربيزة وختيت عليها المصحف ومشيت على المطبخ بديت أحضر في الشاي، أول ما خلصت كدا قفلت النار وكبيته في السيرمس وطلعت مشيت لرنا الكانت نايمة جنب أمي، صحيتها براحة كدا عشان أمي ما تنخلع...*
_يلا قومي عشان تصلي وتذاكري شوية
_بتكاسل: يخخ خليني نايمة شوية بس شوية
_لا ماف شوية قومي
*قامت على حيلها نزلت وهي بتطنطن، ضحكت من دون صوت على طنطنتها دي، وطلعت وراها، مشت الغرفة شالت هدومها ومشت على الحمام وانا كويت ليها هدومها بتاعة المدرسة، في الزمن دا امي صحت صبحت عليها وبستها في رأسها اتوضت وفرشت مصلايتها عشان تصلي، بعد خلصت رنا جات طالعة جبت ليهم الشاي وجبت حاجات التسريح سرحت لرنا شعرها، وسمعت ليها القصيدة، لميت العدة وغسلتها ومشيت شلت لي (جيب_شورت) أسود معاه تيشيرت رمادي وسرحت شعري لوراء، كنت حاسة بفرحة لأني حأشوف فارس الليلة، لبست عبايتي السوداء وطرحتي السوداء واسبورتيني الأسود وكله أسود في أسود عدا لابكوتي وجيت مارقةة(يا ستير مالك عاملة زيي كدا هههخخ)، اول ما طلعت من البيت لقيت مازن في وشي وقربت أصدم فيه...*
_على وين على وين والحماس دا كله شنو من الصباح؟
_على المستشفى طبعاً، بعدين انت كل مرة خالعني كدا مالك؟
_مزاجااااات
_أيواااا مزاجات أمشي مني بتشاكل معاك
_لا ماف الليلة حأوصلك انا ماف مواصلات
_مالها بلعتها الأرض؟ بطل ياخ خليني أمشي
_مافي يا رداحة يعني مافي
*كنت عايزة أمشي فحجزني ووقف قدامي...*
_قلنا ماف يعني ماااف
_مااازن ما تأخرني
_والله العظيم حأتصرف معاك بشكل تاني
_اوفف طيب طيب، أصلاً انت الصحاك بدري كدا شنو؟
_من الصبح صاحيين أنا ورياض
_شطار والله
_بطلي عولاقك دا وارح يلا أركبي
*ركبت في المقاعد الوراء وهو ركب مقعد السائق، طلعت ملف من شنطتي فتحته وبديت أقلب في صفحاته، اندمجت مع الملف والفيه لحد ما انتبهت لصوت مازن...*
_أها يا سيد
_أنا والله أخلاق زي دي ما لاقتني ماشاء الله طولة بال عجيبة
