*رحاب*
_خير ان شاء الله
*ساقوني من يدي على عجل، ما كنت فاهمة اي شيء، دخلوني المكتب لقيت دكتور هزاع واقف وظاهر عليه معصب جداً...*
_نعم
_نعمم؟؟ ولسة عندك نفس تقولي نعم؟؟ ممكن أفهم دا شنو الحصل يا آنسة؟؟(بصراخ وبصوت عالي)
_حصل؟ بالنسبة؟؟
_بالنسبة للمريض الموكل ليك تشخصيه في الغرفة 411؟؟
_ما حصل شيء، حصل المفروض يحصل
_كييف بتقولي لي المفروض يحصل؟ دي حياة إنسان يا إنسانة حياة إنسان
_ممكن ما تصرخ لأني ما فاهماك
_انتِ طبيبة بالله؟ المريض دا حصل ليه شنو بالضبط
*بقيت ما فاهمة اي شيء أو هو بيتكلم عن شنو بالضبط، بقيت بعاين ليه وبعاين للممرض الواقف بالجنبة ماسك في يده أوراق، مشيت وشلت الأوراق من يده وبقيت بقرأ بعيوني فيها، لقيت مكتوب تقرير عن خطأ طبي حصل في غرفة 411 أدى إلى وفاة مريض، استغربت لأني خليت المريض كويس جداً، وجاء الدكتور تاني عقب على تفحيصي ووافقني في الحالة...*
_انا متأكدة إني فحصت المريض تمام
_وبيحصل ليه كدا؟ انتِ يا إنسانة واعية؟ واعية؟؟؟( وعلت نبرة صوته زيادة)
_انا واعية تماماً، ممكن ما تعلي صوتك؟ عشان تقدر تفهم
_يا إنسانة أفهم شنو؟ خطأ طبي؟ ومن أول يوم؟ حأفهم شنو؟ غير إنك ما طبيبة أصلاً؟ دي حياة إنسان دي سمعة مستشفى فاهمة؟؟...
_لو سمحت خليك عندك، أنا ما أجريت أي خطأ طبي
_أفهم انه التقرير كاتبنه غلط أو شنو بالضبط؟؟
_ما بعرف بس ممكن...
*قبل ما اتم كلامي، جات داخلة سيستر وكانت مستعجلة وبتتنفس بسرعة، قالت ليه أعتذر يا سيدي لكن يجب أن تأتي معنا بسرعة للغرفة "114" فقد حدث خطأ طبي فادح...*
_ماذا؟ أليست "411"؟
_لا سيدي، ربما قد حدث خطأ أثناء كتابة أو طباعة هذا التقرير بسرعة
_حسناً حسناً
*كل العمله مشى بسرعة معاها، ختيت الورقة على التربيزة بنرفزة، حسيت بأعصابي شوية وحتنهار، اتنهدت وطلعت برة المكتب بسرعة، نزلت تحت ومشيت على اتجاه الباب مباشرة، قبل ما أصل وقفني صوت بسمة وهي بتنده علي"رحاب يا بت"...*
_بت ماشة وين أنتِ لسة الدوام ما خلص
_راجعة يا بسمة راجعة بس
_مالك يا بت في شنو؟
_ولا اي شيء بس انا زهجت
_زهجتي من شنو؟ كدي تعالي براحة كدا احكي لي... اها في شنو ومالك؟؟
_يعني الواحد لما يكون ما متأكد من حاجة بشاكل في الهواء ساي؟
_كدي دقيقة دقيقة منو الما متأكد ودا شنو؟؟ حصل ليك شنو يا بت دا أول يوم يادابه
_وخربه علي الأستاذ العظيم المغرور دكتور هزاع ولا مين ما كان دا
_حصل شنو؟؟
_الليلة المفروض تكون أول حالة تشخيص بالنسبة لي كإختبار، وتعيين للقبول والإستمرارية، أنا أصلاً المريض المفروض أفحصه المريض في الغرفة رقم"411" وفعلاً مشيت فحصته وكانت نتيجة الفحص حقيقية وناجحة، جوا اتنين ممرضات ساقوني ليه وقالوا طالبني، بقى شغال فيني كلام طالع نازل ومرض ولاب لاب لاب بسبب خطأ في التقرير الكاتبنه ليه إنه حصل خطأ طبي أدى إلى وفاة مريض قلبية في الغرفة "411" وهو أصلاً حصل في الغرفة رقم "114" ودا خطأ مطبعي، استغفر الله العظيم يارب أنا ما عايزة استمر مع الدكتور دا خلاص خلاص
_اهدي اهدي روقي شوية يا بت، سوء تفاهم ما اكتر وبيتعدل إن شاء الله بس ألزمي الصبر لأنه دكتور هزاع دا صعب شديد ومحتاج تصبري معاه
_طيب تمام فهمنا لكن يراعي لغيره ولإنه ممكن يكون على خطأ مرات يعني... حسبي الله
_روقي روقي هسي ما تنفعلي
_استغفر الله العظيم، خليني أقوم أمشي بالله
_يا بت روقي ها روقي استني شوية... عايني ليه ياهو داك ماشي على مكتبه... رحاب يا بت استني ماشة وين رحاااب...
