*بعد مرور شهر*
*رحاب*
*مر شهر كامل والمياه عادت لمجاريها، رجعت اشتغل في المستشفى، بس المرة دي الرقابة علي كانت مشددة عديل،خوفاً من إنه تتكرر نفس القصة تاني، فارس بقى يقول لي دكتولتي عمتوو، ما مصدقة إنه بقى يناديني كدا ياخوانا، عمي رجع عطبرة، هو وخالي سامي اتشاكلوا لدرجة وصلوا إنه كان عادي ممكن يتضاربوا، لأنه خالي سامي هو الكان الخيط الرابط بين حيدر وهدفه من القصة دي، اتجاوزت القصة عادي، بس في الفترة دي لاحظت في حاجات كتيرة متغيرة، وأولهم علاقة سماح ورياض، سماح ما كانت عارفة برجعتي للسودان إلا بعد ما مر اسبوعين من رجعتي؟ معقولة مثلاً رياض ما يكون مكلمها؟ وحتى لمن عرفت، اتصدمت بإنها ما عارفة بتفاصيل قصة خطفي، مع إنها كانت بتقول لي ماف حاجة، بسس انا واثقة وعارفة إنه في حاجة، حتى لمن تتواصل معاي وتسأل، كانت بتسأل من حالي أنا وأمي ورنا، يعني حتى حتة إنها تسأل من رياض زي زمان اتجاوزتها، في يوم، كنت قااعدة في غرفتي براجع مع رنا، جاء رياض داخل وكان زهجان شديد، فقلت اعمل لي حركة واروق ليه مزاجه، واقدر افهم منه كل حاجة، قمت ظبطت عصير ليمون فريش، ومعاه كيك، وشلت وديت ليه، لمن استغرب هو ذاته...*
_اتفضل يا استاذ شوف اختكك الظريفة دي سوت ليك شنو؟
_خير ان شاء الله، اختي ما ليها بالعادة تجيب لي موية ذاته
_شنوو؟؟ عيد كلامك دا تاني عيد؟ اختك مالهااا؟؟
_لالا خلاص ما قلت شيء(قالها وهو بيضحك)
_اااي اي بالله افرد خلقتك دي ما تكرفس لي وشك دا تاني
_ابيت
_ببو، شيل اتسمم
_يلا ما هو لازم تتمي معروفك دا
_نيننييي عارفاك حتقول لي ادلك ليك راسك الكبير دا
_عليكك نووور يا مكنةة
_اترزع
_اخخخخ يلا يلا
*رقد في رجليني وبديت ادلك ليه وهو بياكل في الكيك، بعد حسيته استكان، قلت ليه رياض عايزة أسألك سؤال ممكن؟ قال لي قولي...*
_مالك انت وسماح؟ أنا ملاحظة ليكم الفترة الفاتت دي كلها ما على بعضكم
_ولا شيء، انسي بس
_رياض، شوف يا اخوي دس منهم كلهم إلا أنا، مااالكم؟؟
_انسي يا رحاب، ماف شيء بسس
_طيب ما حأضغط عليك هسي، بس لابد تجي وتحكي لي فهمت؟
*وطلعت من غرفته وانا في مية سؤال في راسي، أنا عارفة رياض راسه قوي قدر شنو، ومستحيل يحكي حاجة ما عايز يحكيها بالسهولة دي، عشان كدا ما حاولت معاه كتير، فكرت أسأل سماح، بس هي كمان عنيدة زيه واكتر، لما فتحت التلفون جاتني مكالمة واردة من وقاص، فتحت المكالمة واتكلمت معاه مدة كدا، وقال لي امتحانات رنا باقي ليها اسبوعين بس، بعد الامتحانات نعمل لمة كدا عشان نفسياتها تتحسن، فقلت ليه ظاابط قدام، قفلت منه الخط وسمعت الباب بيدق، مشيت فتحت لقيتها مثاني معاها ماجد أخوها، دخلوا جوة وماجد مشى لرياض بغادي، وانا ومثاني قعدنا مع أمي في غرفتها بنتونس...*
*رنا*
*مر شهر كامل، بأحداثه ورجع كل شيء زي ما كان، وجود رحاب بيناتنا، بس الحاجة الوحيدة الحصلت إضافية في حياتي، ماجد، ماجد كان إضافة حقيقية في حياتي، خلاني أحس بسعادة وبإطمئنان، ناحية حاجات كتيرة، وأولها الإنجليزي الما قصر وكان بيشرح لي على طول، أخواني ما كانوا بيلقوا لي وقت على طول، بس هو طوالي كان بيلقى لي، حتى لو ما عنده وقت، يمكن انا منظوري أو الحاجة الحاساها اتجاهه هو ما بيبادلني بيها، بس حتى لو ما بيبادلني بيها يكفي اني حاسة بالسعادة وهو كدا مكتفي، كنت قاعدة بذاكر عادي، بس المرة دي كانت العصرة كبيرة علي جداً، لأنه امتحانات الشهادة كان باقي ليها اسبوعين بس، كنت خايفة شديد وحاسة بالتوتر، الساعة السمعت صوت ماجد برة وكان بيسلم، حسيت بفرحة، كنت عايزة أمشي برة أسلم عليه بس رجعت بخطوتي وقعدت في محلي، مسكت كتابي تاني وواصلت في قرايتي...*
_بتت، رناااا
_اهاااا
_رناااا
_رحاب مالك يا سجم
_تعالي سلمي على مثاني
_واااي كان تقولي ليها تجي هنا أنا عندي قراية ما فاضية
_قومي يا متخلفة
_واااااي
*طلعت برة الصالة بقيت بتلفت رحاب دي وينها وبتناديني من وين ذاته؟، طلعت برة الحوش بقيت بتلفت فجأة لقيت ماجد قدامي، اتخلعت..*
_بسسم الله، جيت طالع من وين انت؟
_من السماء الحمراء يا خوافة
_واااو ياخ ما ناقصة ظرافة انا، جيت اسلم على أختك كمان الاقيهم اختفوا غااايته
_أصلاً نادوك عشاني أنا وكدا
_عشاانك؟؟ ولشنو انت مالك كمان؟
_انت بس فالحة للمساخة دي، غمضي عيونك ديل يا أم لسان
_اغمضهم ليه؟؟؟
_غمضيهم بس قلنا
_طيب امري لله، اها غمضتهم وبعد داك؟
_فتحيهم، مفاااجأة
*أول ما فتحت عيوني لقيته شايل بوكس كدا وماديه لي، وعليه استيك نوت ملفوفة ومربطة عليه بطريقة حلوة شديد، اتفاجأت وبقيت انطط، شلته منه وقلت ليه ماااجد، قال لي عيونه يا مجنونة، بقيت بفتح في البوكس، اتجاوزت الاستيك نوت ومسكتها في يدي، لقيت ساعة وعطر، ومعاها دفتر ملون وقلم حبر من النوع البيكون كم لون في قلم واحد...*
_لعيونك يا مجنونة، عارفك متنشنة وخايفة، بس زي ما قلت ليك خوف ما معانا ودايرنك تطلعي دكتورتنا التانية، سمعتي؟
