*الصوت كان جاي من غرفة أمي، دخلت ولقيتها واقفة مع خالي سامي وجنبها رنا واقفة خايفة بتعاين ليهم، أول ما شافتني جرت علي وجات وقفت جنبي، عاينت ليها باستغراب وسألتها...*
_في شنو دا شنو مالهم جايطين كدا وخالي سامي جاء متين؟
_قال وصل بعد ما أنا جيت من المدرسة بس جاء قبل شوية وقال في راجل جايينا بعد شوية، ما عارفة الراجل دا قصته شنو بس أمي جايطة معاه في موضوعه
_كدي دقيقة انا بفهم الحاصل منهم انتِ أرجعي الغرفة وذاكري
_طيب تمام
*دخلت جوة بعد اتأكدت انها دخلت الغرفة وصفقت بيدي على الخفيف عشان ألفت انتباههم...*
_هيي هي بسم الله أمي وخالي أصواتكم طالعة برة عديل في شنو؟
_يلا قول ليها كلامك دا يا سامي قول
_يا بتي اسمعيني خليني من أمك دي...
*سمعنا صوت دق الباب اتلفتنا لقيناه رياض، قال لينا السلام عليكم ردينا السلام وجاء سلم على خالي...*
_ في زول برة قال عايزك جاء داخل معاي
_وصل؟ لالا خلاص انا ماشي ليه
*طلع وأمي قعدت في السرير الوراها ختت يدها في راسها وقالت لا حول ولا قوة إلا بالله، انا استغربت وبقيت أعاين لرياض وهو يعاين لي، قعدت جنبها ولفيت يدي في كتفها...*
_أمي بسم الله مالك؟ في شنو هو والراجل دا قصته شنو؟
_حييي يا بتي خالك جاب ليه ركوب راس جديد، جاب لينا الراجل دا من وين ما بعرفه
_وماله الراجل دا يعني؟
_جايبه لينا تعارف قال
_تعارف؟؟؟ كيف يعني تعارف يمة؟؟
_تعارف ليك يا بتي
_شنوو؟؟
*اتخلعت وقمت على حيلي بقيت بعاين في أمي مصدومة، وهي منزلة راسها ماسكاه بيدها، ما عرفت أقول ليها شنو، كيف يعني خالي يعمل كدا؟ ولشنو جابه لي تعارف أنا؟؟ راسي جاط واتخبط بالأسئلة في اللحظة ديك، رياض واقف محله بيعاين لي حتى هو مصدوم وما عرف يقول شنو، اخدت نفس كدا ومسحت وشي بيدي، سمعت صوت خالي وهو بيقول "رحاب يا بتي تعالي شويةة.."، اتلفت عليه وانا لسة مصدومة كمان بيناديني عشان امشي اشوفه، ما عملت أي شيء غير إني سألته...*
_ليهه؟؟
_دايرك شوية في موضوع
_وموضوع شنو؟؟
_انتِ تعالي بس وحتعرفي
*مشيت عليه عايزة أشوف نهايته شنو بالضبط كدا، أمي ورياض حاولوا يوقفوني، قلت ليهم يطلعوا معاي وأصريت عليهم يطلعوا معاي، خالي كان ظاهر على وشه إنه مبسوط، طلعنا معاه برة لقينا راجل كدا كبير في العمر، ظاهر عليه النوع المرتاح شديد، حتى نظراته من أول مرة ما ريحتني، قعدت قصاده وأمي ورياض قعدوا جنبي، كان بيعاين لي بطريقة غريبة ومخيفة أصلاً، عم السكوت المكان للحظات كدا، كسره هو بصوته...*
_سلامات، اخباركم يا جماعة
_وعليكم السلام، الحمد لله
_انتِ بت عبد الرؤوف الكبيرة صح؟
_ايوةة، وانت منو؟
_انا صاحب ابوك حيدر عبد الباقي ياخ، الله يرحمه
_اميين، ممكن نقدم ليك اي خدمة؟
_لالا أبداً ما جيت لخدمات، جيت اقدم لصاحبي الاتوفى دا خدمة طلبها مني قبل كدا
_واللي هي؟؟
_اني أطلب يدك على سنة الله ورسوله
_كيف؟؟ ممكن أعرف يا عم انت بتتكلم بأي منطق لأن أبوي ما حصل جاب لينا سيرة لموضوع زي دا أصلاً، وأبوي أساساً مستحيل ما يكلمني بموضوع مهم زي دا
_دي كانت وصيته وخلاني أوعده ما أكلم زول، الموضوع كان بيناتنا حاولت أقنعه يكلمك بسس هو عارفك ما حترضي
_من الآخر كدا يا عم، النقاش دا نهايته عقيمة فخلينا ننهي الموضوع على كدا لأني ما حأقتنع
_رحاب يا بت دا شنو اتكلمي بأدب واحترام
_يا خالي انت دقيقة العرفك شنو إنه أصلاً صادق في كلامه دا؟
_انا عارف الزول دا من زمان بيعرف أبوك، ودي وصيو أبوك انتِ فاهمة؟
_هه مستحيل تكون وصية أبوي وبسس، دا آخر كلامي، معليش لكنن انا ما مستعدة ولا مفكرة للزواج هسي ذاته
_رحااب يا بت
*خالي صرخ علي وانفعل، لأول مرة يصرخ علي ولأول مرة أشوف خالي كدا، اللحظة ديك وقفت بعاين ليه بس، مستغربة هل فعلاً دا خالي؟، وهو ليه بيتصرف كدا...*
_اول مرة أعرف انك ما بتطيعي أبوك
_ما هو يا خالي لو كانت وصيته دي فعلاً كانت على عيني وراسي حأعملها، بس أنا عارفة دي ما وصيته ولا شيء
_يعني نحن كذابين ولا قصدك شنو؟
_لا ما قصدت شيء العفو، بس انا عارفة أبوي كويس
_قصدك شنو يا رحاب؟
_ما قصدي شيء يا خالو والله
_لا قصدك فعلاً
_ما عندي قصد والله وبس
_هسي لو كان عمك مراد كان وافقتي من دون مقدمات صح؟
_ماف فرق بينك وبين عمي يا خالي، بس الموضوع دا حاجة تانية خالص
_لا واضح في فرق وكبير كمان
_أصلاً عمها عارف أبوها كويس يا سامي، مستحيل يقول كلام زي دا وما جاب لي سيرة أصلاً قبل كدا
_قصدك شنو يا سناء؟ انتِ وبتكك قصدكم تكذبوني وكدا صح؟
_يا سامي انت كيف تاخد خطوة زي دي من غير ما تستشيرنا؟
_هه، لا ما عادي جداً كمان بقينا للإستشارة
_سامي، انا ما عايزة أتكلم الكلام دا بس انت اضطريتني اتكلم، انت لو عايز الزول دا، ناسبه لبتك
_سناااء
*ورفع يده عايز يضرب امي رياض مسكه، ونزل ليه يده...*
_كل شيء يا خالي، وانك ترفع يدك على أمي دي حاجة تانية خالص، ما تضطراني اتكلم معاك بأسلوب تاني لأنك مالي وانا محترمك
_محترمني؟ هه فعلاً ونعم الإحترام لكنن، كويس كويس جداً، اسمعي هنا يا سناء، من الليلة تعتبري اخوك سامي مات، وانتوا تعتبروا انه ما عندكم خال اسمه سامي أصلاً، خلي مراد ينفعكم
*وطلع من البيت رزع الباب وراه، الراجل وقف عاين فيني مسافة ونظرته ما كانت بتوحي لخير، حتى لحقه، امي مسكت راسها وبقت تبكي، ورنا جات من جوة كمان بتبكي وخاايفة، قعدنا انا ورياض بنهدي فيهم ونقول ليهم انه هو معصب بس فترة وحيرجع، انا بقول الكلام دا وانا ذاتي كلي استغراب، الحصل لخالي فحأة شنو حوله كدا؟ ليه هو فجأة معاملته اتغيرت كدا وليه بقى بيكره عمي مراد كدا؟ ما عملت ولا شي غير اني استغفرت وقعدت اهدي في أمي، يومين مروا، حتى أمي هدت من زعلها الفي قلبها، كانوا يومين خربوا علي كتير، في نهاية اليوم وأنا راجعة البيت المساء...*
*من ناحية تانية*
*بلسان سماح*
*كنت قاعدة انا وعنان في الجامعة بناكل وبنتونس في الاستراحة شوية، طلعنا كدا عشان نمشي البيت، لقيت مجموعة بنات وأولاد متلميين حولين شيء وهم بيضحكوا ويعلقوا تعليقات ساخرة كدا، فضولي أخدني عشان أشوف الحاصل، مشيت ولقيتهم متلميين حولين واحد قاعد في الأرض ماسك دفتر حاضنه عليه وبيرجف، قلبي ما طاوعني اخليه كدا فلقيت نفسي خشيت بيناتهم ووقفت قدامهم قلت ليهم...*
_في شنو ياخوانا الحاصل شنو؟
_زحي يا هيي زحي لي من العوير دا أأدبه
_لو سمحت، قبل ما تمد يدك على الناس أحسب حساب إنه المرة الجاية ممكن تكون عليك
_عايني يا هيي احسن ليك ما تتدخلي
_عاينوا ليه ياخوانا دا زول ينضرب وتعاملوه كدا؟؟ بعدين هو واحد وانتوا جماعة
_يا هيي
*ما اشتغلت بأي حد مديت ليه يدي وساعدته يقيف، ظاهر عليه من النوع الشخصيته ضعيفة وطفولية، تفكيره طفولي، مرقت من نصهم وهو مرق وراي، شكرني ونصحته بإنه يبقى قوي، وطلعنا...*
_عاد لكنن يا سماح لقيتك قووية يا بت يا قادرة
_هخخ ما قوية لكنن الحق يقال
_حق لكنن....
يتبع...🤎
ومن هنا حتبدأ أحداث تاانيةة🖤🦋 وكل الحب ليكم🌸
