*رياض*
*الوقت كان ماشي متأخر، فلبست سريع وطلعت عشان اقدر ألحق مواصلات توديني المستشفى، فعلاً قدرت ألحق، وصلت بعد ساعة وشيء كدا، دخلت المستشفى ومباشرة مشيت على مكتبها، فتحته، واتصدمت بإني لقيتها ما موجودة، المكتب كان فااضي وما فيه أي حد، سديت الباب وانا مستغرب جداً، يعني وين حتكون مشت في زمن زي دا؟ انا واقف كدا جات ممرضة وقفت قدام المكتب عايزة تدخل، فقلبت على الناحية التانية بحيث أكون مديها ضهري...*
_احمم احمم، السلام عليكم ورحمة الله
_وعليكم السلام، اهليين اتفضل
_لو سمحتي دكتورة رحاب بتعرفيها؟
_اااي أكيد أنا الممرضة المساعدة ليها، اتفضل بقدر أخدمك بأي شيء؟
_لأ بس عارفاها طلعت متيين؟
_أيوة طلعت قبييل
*مع جوابها دا حسيت بنفسي ما قادر استوعب، كيف يعني طلعت قبيل وهي لسة ما وصلت البيت، شكرتها وطلعت مباشرة بقيت بتلفت، حتى وانا ماشي بتلفت، ما عارف أعمل شنو أساساً، وحأقول لأمي شنو، أو أسأل منو حالياً منها، وقفت واتكيت على الحيطة، ما فاهم اي شيء، طلعت التلفون، وحاولت اتصل عليها مرة تانية، بس اداني مغلق، شلته مرة تانية واتصلت على استاذ وقاص، عسى ولعل تكون مع فارس، بعد جرسين رفع الخط، ورد علي، سألته بس اتصدمت زيادة انه هي ما مع فارس وخالته كمان، سكت مسافة وهو لسة بيقول "ألو ألو"...*
_أأ اي يا استاذ معليش
_في شنو ان شاء الله خير؟ الدكتورة ما رجعت البيت لحدي هسي؟
_لالا ما رجعت، طلعت قبل ساعة او أكتر وما وصلت لحدي الآن البيت، مع إنها المفروض تكون وصلت
_سألت أي زول من معارفها؟
_صاحباتها والحجة سألتهم، جيت المستشفى ما لقيتها
_ووين انت؟
_جنب المستشفى
_خلاص أرجاني انا جايي اااا
_ماف داعي يا استاذ خليك
_لا في داعي أكيد انت هسي الحيساعدك منو تفتشها؟ خليك قبلك يا زول دقائق وبصل ليك
_تسلم شديد يا خوة
_الله يسلمك دقائق
*نزلت السماعة ودخلت الموبايل في الجيب، ربعت يديني ووقفت منتظر، فجأة سمعت صوت شيء اتخبط مع الأرض من ناحيتي التانية، اتلفت فلقيتها بت والدم كان بينزف من يدها، طوالي بركت وحاولت أصحيها بس ما صحت، تقريباً كانت مجروحة جرح عميق في يدها، سندتها على حيلها ودخلت بيها المستشفى مباشرة، أخدوها ممرضتين لغرفة العمليات الصغرى، وقفت انتظرت شوية، وجات الممرضة قالت انها كويسة حالياً بس لسة ما واعية وصاخية، ما كنت عارف أخليها في حالتها ديك ولا أعمل شنو بالضبط، فطلبت من الممرضة تسألها من اهلها وكدا لمن تصحى عشان يجوا يسوقوها، طلعت برة ولقيت استاذ وقاص وصل، ركبت معاه وسلمت عليه ودور السيارة...*
_بتعرف أماكن تانية ممكن دكتورة تمشيها؟
_البحر، بس دا بالنهار، أو المكتبة بتحب المكتبات
_طيب تقريباً في مكتبة إسمها بوكتينو قريبة من هنا يلا نشوفها
_طيب
*وصلنا مكتبة بوكتينو ونزلنا دخلنا بنفتش عليها، وبنسأل أي زول إذا مرت عليه، بس للأسف ماف زول شافها، اتحيرنا وبقينا لافين بالعربية أي محل بيمر علينا بنسأل...*
*من ناحية تانية*
*طلعت برة ومشيت عليها، عنان حاولت توقفني بس ما سمعت منها، اول ما خلصت واتلفتت علي اتخلعت، وقفت وربعت يديني، وبقيت بعاين ليها وهي بتعاين لي بنظرات كلها قرف، غضيت النظر عن نظراتها وسألتها...*
_خلصتي؟
_وانتِ عايزة مني شنو كمان؟ خلصت ما خلصت دي حاجة ما تخصك
_والله ياخ انا ما بيهمني اتدخل في خصوصياتك ولا شيء بس جيت احذرك
_تحذريني؟؟ وانتِ منو كمان عشان تحذريني؟
_ولا شيء، عايزة احذرك من البتتكلمي معاه بالأسلوب دا، نهايته ما حتكون كويسة الطريق دا
_يا سلام؟؟ وانتِ منو كمان عشان توريني الصح من الغلط؟ اسمعي هنا يا الراخية اضانك خليك بعيدة بالله، انتِ مجرد واحدة تافهةة، وانتِ كمان بتحبي ولا ناسية؟
_الحمد لله حب عفيف جداً وما قاعدة اخوض فيه اكثر من اللازم
_ياااخي؟؟
_شوفي هو في حب ممكن يفتح ليك درب رضا وحب تاني ممكن يسد ليك كل الأبواب في وشك، والبتتكلمي معاه دا بيستغلك
_نعمم؟؟«بنهرة» هو دقيقة انتِ قايلة نفسك منو بالجد؟ اوعك ثم اوعك تاني تتدخلي في حاجة ما بتخصك وإلا والله حتشوفي شيء ما يعجبك، انصحي نفسك بالله وامشي بعيد
_أولاً ما تصرخي، ثانياً انا قلت العندي، واللهم بلغت فاشهد
*على صوت صراخها دا امي جاتنا مخلوعة، قالت لينا في شنو؟، فجاوبتها وانا بعاين لعزة...*
_ماف حاجة يمة، بس مجرد نصيحة ما حبت تتقبلها، انتِ امشي نومي، يلا تصبحي على خير
_تلاقيه يا بتي
*مشيت غرفتي ورقدت في السرير واتنهدت، جات عنان قعدت جنبي، وبقت بتلعب بالملاية...*
_هسي كان في داعي انتِ عارفاها هايجة ساي بت الناس دي
_والله قلت اعمل واجبي ليس إلا، في النهاية هي حرة
_ياخي قربت اجي واديها كفين شوف دي
_انسي انسي يلا انا عايزة انوم تصبحي على خير
_تلاقيهه
*قمت وقفلت نور الغرفة وجيت رقدت، سرحت في السقف مدة كدا وشالني النوم...*
*في الصباح*
*رياض*
*نحن بنفتش من ليلة امس، بفتش وكأنه الدنيا دي بقت ضيقة جداً علي، ما قادر افكر ما قادر استوعب، كل البفكر فيه هو الحصل ليها شنوو؟؟ كل شوية كان استاذ وقاص بيصبرني ويديني امل إنه ممكن نلقاها، بس ماف فايدة، كل دقيقة بتمر كنت بحس باليأس زيادة، استاذ وقاص سايق العربية بس من دون أي جدوى، عسى بعد كدا عيوننا تلمحها ساي، سألنا كل الناس الممكن نسألهم، حتى الما ممكن نسألهم وصفناها ليهم، بس ماف حد شافها، استاذ وقاص ما كان قادر يركز في السواقة، لدرجة قرب يتصادم مع حد، وقف العربية ونزل القزاز اعتذر ليه، كان ماسك يده اليمين بيده التانية...*
_ما اكون أذيتك بس يا عمي؟
_لالا يا ولدي، دا ما بسببك، بس انت مالك سايق كدا؟
_ والله يا عمي ما قادر اركز بس معليش
_مالك؟ معليش يا ولدي عمك شوية فضولي
_ لالا العفو ياخ، عندنا بتنا ضايعة بنفتش عليها، ما عارفين عنها حاجة
_يا جامع يا رقيب، تصدق يا ولدي انا أمس انضربت بسبب ناس خطفوا ليهم بت دكتورة قدام عيوني وما قدرت اسوي ليهم شيء، قدر ما ناديت زول يساعدني بس ماف زول جاء، مشيت اشتكيت عليهم أمس بس قالوا عايزين معلومات عن البت وانا ما عندي ولا معلومة
_دقيقة يا عمي قلت دكتورة؟ وصف لي شكلها كيف؟
_والله يا ولدي ما قادر اتذكر عديل الوقت كان ظلام، بس متذكر ملامح وشها شفتها بالكشاف
_اها اوصفها لينا يا عمي
_هسي وشك دا بيذكرني بيها يا ولدي
_دقيقة بس يا عميي.. رياض عندك صورة ليها؟
_اااي ثواني.. هاك ياها دي
_اها ياها دي يا عمي؟
_ياها.. ياها ذاااتها يا ولدي سبحان الله
*هنا نحن اتصدمنا وبقينا نعاين لبعض، استاذ وقاص طلب منه انه يطلع معانا، بعد ما عرف انه دي هي ذاتها رحاب، اتحركنا طوالي على مركز الشرطة...*
يتبع🤎...
في الحلقة الجاية ان شاء الله حنعرف منو الخطف رحاب ليه وعشان شنو خطفها؟؟، ووين ودوها، شكراً بحب💜🦋
