*رحاب*
*سمعت صوت سيلڤا فرقعت راسي ليها، قمت على حيلي...*
_سيدتي
_اهلاً سيلڤا، ماذا هناك؟
_يطلبون رؤيتك بالأسفل، أيمكنك النزول معي؟؟
*في نفسي قلت هم عايزين شنو كمان؟، اخدت تنهيدة وقلت ليها موافقة، نزلت معاها تحت لقيتهم التلاتة قاعدين في الصالة، وكان معاهم بتهم دي ونظراتها لي كانت غريبة وكيف كيف، حسيت بيها مغيوظة مني أو حاجة بالشكل دا، ما اشتغلت بيها كتير وقفت جنب الأريكة ربعت يديني ومنتظراهم يقولوا العايزين يقولوه...*
_كدي اقعدي أول يا بتي
_لا شكراً، ممكن تقولوا العايزين تقولوه
_يا بتي، انتِ رغبتك شنو؟؟
_كيف يعني؟
_حتمشيي ولا حتقعدي معانا؟، طبعاً ليك حرية الإختيار
_أفتكر الجواب واضح، انا حأرجع لأهلي
_طيب يا بتي، فيزتك بكرة تكون جاهزة
*حسيت في وشوشهم شيء من الزعل، بس اتجاهلت الموضوع، رجعت الغرفة، وقعدت في الكرسي القصادي كنت مخنووقة، بقيت بفكر طيب هم مادام أهلي انا ليه ما قادرة أتقبلهم؟، ليه انا حاسة بكل الرفض دا اتجاههم؟، في شيء نافرني منهم، قطع تفكيري دا صوت كان صوت وسن دي، بقت تعاين لي بنظرات مليانة قرف، رجعت خصل شعرها لوراء، وبقت تقلب في عيونها، مسكت موبايلها بقت شغالة بيه وتاني قلبت الشاشة على وشي، قريت الإسم "وقاص أدهم" وكانت صفحة في الفيس، تاني رجعت التلفون من وشي وقفلته، وسألتني...*
_بتعرفي؟
_أيوة
_وبتعرفيه من وين؟
_حكاية طويلة
_ما تقولي لي حكاية طويلة من وين؟؟
_لو سمحتي ممكن تتكلمي بأسلوب؟
_عايني انا سألتك فجاوبي وبس
_كان أبو طفل مريض عندي، اي استفسار؟
_يعني انتِ دكتورة؟
_ايوة
_اممم (بقرف ونظرات مستحقرة)
_ممكن أعرفف بتسألي ليه؟
_مش انتِ رحاب عبد الرؤوف؟
_ايوة
_معناتها بجد بيفتش فيك انتِ، دي صورتك صح؟
_ أيوة
*وقتها بقيت على يقين انه دا هو استاذ وقاص بيسأل مني، بس علاقته بوسن دي شنو؟ وهي ليه بتسأل منه بالذات؟، بقيت بفكر لثانية، بعدها اتذكرت لمن حيدر كان بيحكي عن إنه عندهم اخ بس هو مختلف مع أبوه، واتذكرت قصة استاذ وقاص مع أهله، استجمعت وربطت الأحداث واكتشفت انه استاذ وقاص دا أخوها، سرعان ما سألتها..*
_استاذ وقاص اخوك؟
_يب
_ممكن تقولي ليه اني هنا؟
_كلمته، قال جاييك بكرة
_ممكن تديني اتكلم معاه ثانية؟
*بقت تعاين لي من فوق لتحت، حسيت نفسي غبية لمن طلبت منها الطلب دا، جدعت لي التلفون في الكرسي وقالت لسيلڤا تلحقه ليها تحت بعد أخلص، في اللحظة ديك مسكت اعصابي عشان ما أكسر ليها موبايلها دا، مسكته ودخلت الشات تبع استاذ وقاص، كان أونلاين فكتبت ليه "السلام عليكم، استاذ وقاص كيفك؟.." رد لي بعد ثانيتين...*
*محتوى المحادثة*
_وعليكم السلام، مالك يا وسن استاذ وقاص دي شنو؟
_معاك رحاب
*قرأ الرسالة، ورد بعد مساافة..*
_رحاب؟ دكتوورة؟
_ايي ياها ذاتها
_أووو دكتورة، افتحي كوول سريع بالله
