لن أُفلت يدكِ

«الفصل السابع»

بعتذر البارت اتأخر عشان كنت فاقدة الشغف وورايا هم كتير

Enjoy with part..🐥♥

___________________________

تحرك أنس بإنهاك خلف والده بعدما خرج أخيرًّا من الزنزانة النتنة بمن فيها، استقل المقعد بجوار والده وانطلقت السيارة بهم، وعمَّ الصمت قليلًا قبل أن يبادر بـ :
-عرفتوا البت دي مين؟

أخرج والده سيجار فاخر من عُلبة بجيبه وأشعلها منفثًا دخانها قبل أن يهتف بلامبالاة:
-لأ البت فص ملح وداب وعامةً مش مهم، المهم إنك خرجت منها

استدار برأسه له وتابع:
-البركة فيك بقا، تقف قدام الصحافة وتنفي إن فيه علاقة بينك وبين البت دي والبت التانية اللي اتقفشت معاك في الشقة مش ناقصين فضايح أنا داخل على إنتخابات..

لوى أنس شفتيه حانقًا وأعرض عن النظر في وجه والده والتف إلى نافذة السيارة صامتًا...

✦❥❥❥✦

تنحنح حاتم وأردف بجدية:
-ودلوقتي عايزكم تستعدوا لأن الشغل اللي هناك مهم ومحتاج مننا مجهود، ومنه نريح شوية من ضغط الشغل هنا

اومأ الموظفون وأومأ لهم حاتم سامحًا لهم بالنهوض ففعلوا، وكذلك نهض حاتم بعدما ابتسم إبتسامة خفيفة مُطمَئِنة ..

✦❥❥❥✦

زفرت أسمهان بملل قائلة وهي تؤرجح قدمها:
-ما تخلصي يا آسيا كل دا بتجهزي شنطتك! احنا طالعين رحلة يومين مش سنة! خلصي أي طقمين هيقضوا الغرض..

سمعت صوت آسيا الساخر من حجرة تغيير الملابس:
-انتي مجنونة؟ عايزاني أروح بطقمين بس؟ وأقعد أبدل فيهم مثلًا؟

زمت أسمهان شفتيها بحيرة وقالت بعدها:
-وايه يعني ..ما أنا هعمل كده!

قهقهت آسيا وهي ترتكز بذراعيها على إطار باب الحجرة قائلة:
-انتي غيري، أنا آسيا الجوادي من سابع المستحيلات ألبس نفس الطقم مرتين!

قالتها وعادت للداخل لتحزم حقائبها ..بينما لوت أسمهان شفتيها وصمتت ..

✦❥❥❥✦

قام الموظفون بتجهيز كل ما يلزم للعمل غدًا في "شرم الشيخ" كما أخبرهم حاتم؛ وبالطبع فرِح الجميع فمن الذي يرفض العمل في شرم الشيخ بلد السياحة والجمال والمناظر الخلابة!
وكان لحاتم سببًا لذلك وهو الوجود بجوار إبنته، لذلك لم يخبرها وفضَّل أن تكون مفاجأة -سعيدة- لها عندما تراهُ يقف أمام غرفتها بفندق هناك!

وضعت زينات آخر قطعة ملابس لإبنها في الحقيبة وقالت:
-والنبي ما أنا عارفة لازمتها ايه الشحططة دي، شرم ايه وهبل ايه من امتى وانتو بتروحوا سفريات شغل!