لن أُفلت يدكِ

«الفصل السادس عشر»

حد كان مستني الفصل ولا بلح؟😂

البارت كله أسئلة غير مُجاوب عليها، والإجابة هتيجي منكم.

____________________

جلست شهيرة بهدوء بجوار آسيا على الفراش، وعلى وجهها تلك البسمة الجميلة، ربتت على ساق آسيا وهتفت برفق:
-عاملة ايه، جبتي الفستان؟

رمقتها آسيا بشك، وهتفت:
-فيه ايه يا شهيرة؟

هزت رأسها بتساؤل:
-ايه؟

اعتدلت آسيا في جلستها، وتململت بعدم راحة قائلة:
-أول مرة تكلميني بالنبرة دي! أنتي عايزة ايه؟

ابتسمت شهيرة بهدوء، وجلست مستديرة لآسيا، وبصوتٍ رائق ونبرة لطيفة:
-اللي اسمه داغر دا..مهددك؟

رفعت حاجبيها بدهشة وصاحت:
-No!

التقطت شهيرة كفها برقة قائلة:
-أومال مالك؟

فغرت آسيا فاهها، وأفلتت يدها مجيبة بذهول:
-مالك أنتي؟

كشّرت عن أنيابها، وصرخت بإنفعال شديد:
-أنتي اللي مالك يا آسيا؟ قاعدة امبارح قدامهم هادية وموافقة على كل كلمة بيقولوها! موافقة ع العريس مع إنه مش مقامنا، موافقة ع الجواز بكرا مع إنه بدري، فيه ايه؟ أنتي كنتي ضاربة حاجة إمبارح ولا ايه؟ انطقي يا بت.

انكمشت آسيا في نفسها بهلع رامقة شهيرة بذعر من كلماتها المندفعة، فتنفست شهيرة محاولة تهدئة ثورتها، وابتسمت ثانيةً بهدوء:
-لو فيه حاجة، قوليلي وأنا أساعدك! أنتي عندي زي شاكيرا.

عقدت آسيا حاحبيها بشك، ونفخت صدرها بقوة، ونهضت بإصرار مُشيرة على باب الغرفة، وبصوتٍ حاد صارم هتفت:
-get out يا شهيرة.

رمقتها شهيرة بنظرة حارقة، وانتفضت واقفة بغضب مُشهِرة إصبعها في وجه آسيا بتحذير:
-بس افتكري إن أنا جيت عشان أساعدك، وأنتي رفضتي يا آسيا.

افتر ثغر آسيا عن بسمة ساخرة، وقالت بتهكم:
-مطلبتش مساعدتك.

تنهدت شهيرة بغيظ، وتحركت بسرعة خارجة من الغرفة، قد عرضت خداماتها على آسيا وهي رفضت، إذًا فهي قد فعلت ما عليها وأكثر.

أوصدت آسيا الباب خلفها بالمِفتاح، وتحركت للخزانة وأخرجت زجاجة كحول أخرى، فتحت الغطاء وجلست على الفراش دافعة الكثير منها في فمها.

✦❥❥❥✦

كانت أسمهان تجلس على أريكتها أمام التلفاز المُغلق، وعلى ساقيها حاسوبها تعبث به، وبالشقة ينتشر صوت فيروز العذب بأغنيتها الرقيقة، وأسمهان تدندن معها بنعومة تارة، وتصمت لتصب جام تركيزها على ما تفعله تارة أخرى، في ظل إنسجامها رن هاتفها فالتقطته وفتحت الخط دون رؤية المتصل:
-ايه يا تميم.